Read Southern Rengma Naga 1 BINYOH 28 Bible Online

1 BINYOH 28 - Southern Rengma Naga bible

1 BINYOH 28

¹Raja David le Israel nyu kedanyu aphu no Jerusalem nyu kequen lo lotse ahza shü. Tson-o tsipwen ka kedanyu, rajaphen ketsen kehü kedanyu, pfüphun sharhinyu, raja gü hon dan, a-senru lo a-nyu shwintsen kehü nyu, rajaka nyu kedanyu aphu, shüpahü sharhinyu lo temi a-zan kentsen nyu aphu Jerusalem nyu kequenlo.

²David le anyugun mhundyü nyu solo-o anyugun ka: “A kazü temi dan, a-khwenyülo. Ale Kejozenkelo Khinpha, Npugü ngun Sunggigü phabin gü genyu binzin nrün ka nme thyü nyü. Ale Kershvuka nme thyü pe a-rüshvu titse ndoshü,

³ai ale shüpahü nyu nme laryü temi kechon zitsun kela genyu a-le ano tsü thyü mvu letse laso.

⁴Npugü, Israel nyu Sunggigü le ale lo anyenyu no kethonthen Israel nyu so keda thyü titse kejülo. A-le Juda tsipwen pe sharhi thyü titse kejülo, Juda nyu apvü kami kejülo. Kami tsügü aphu dan nyu akejü pe ano Israel nyu aphu so gon kethyü le a-kendo la.

⁵A-le anyu peche kechon pe atsüshü, lo tsü aphu dan nyu a-le Solomon no Npugü rajaphen, Israel nyu so gon titse kejü shü.

⁶“Npugü le aka zoshü, ‘A Kershvuka thyü nrün gü le nnyugü Solomon.’ Ale a-kejü pe anyu thyülo laso, lo ale a-pvü thyü ti.

⁷A-le ntsoka thyü kebin hontse nyu yhün-o a tejvü lo a johokeshü aphu thyü zen hü yatselo ale a-rajaphen no kethonthen bin ti.”

⁸“Tsügenyu a temi dan, n gun Sunggigü lo Israel nyu aphu kehun kebin higü mhundyü nyu, hagun no kazü kegwa higü sen zin bin lo, tson-o kela nipe shenhe kekcha dan tsüo kethonthen sen lo nrün genyu n gun Sunggigü le joho pe n gun ketsü aphu nyu yhün-o thyü zen lo lotse ale hagun zen shü bin nle.”

⁹Lo a-le Solomon ka zoshü, “Anyugü, nnyu aphu sen-o thyü nyü ho tse npvü le rüshvu kehü Sunggigü sha lo a-lothyü hülo tse ale nkesin shü bin nle. A-le ngun kerüchün lo nle nnyü kehü aphu shabin. Nle a-ki gülo a-le nzen loti; ai nle rani lalo a-le kethonthen nkhe lati.

¹⁰Nno a-kenshün Kershvuka thyü titse a-le nkejülo kela nle sha mvu loshvu. Ntsoka tsü thyülo- thyü titse rüchün-o thyülo.”

¹¹Tson-o David le Kershvuka gü aphu, kenya lo keshü katsen dan, lo katsen kecha aphu, tsünyu kemu dan jüshü kehü Kenshüntsin Bin ndosen kebin pe Solomon tsüshü.

¹²A-le a-nyun nyu jokerabin kamhun, katsen thyü pe tsü kehun, Kershvuka nyu kanyü dan, lo jwe thyü kenshün pe Npugü tsükela hon pe keshü katsen thyü titse rhikebin ko pe a-tsüshü.

¹³David le püshükedanyu lo Levinyu no Kershvuka nyu thatho dan thyülo Kershvuka nyu lalü aphu ketsen-o anyugun lotho thyü titse rhi kebin ko pe a-tsüshü.

¹⁴Rakagi lo suna dikho sen lalü dan thyü tiyo pe a-ka zoshü,

¹⁵lamp nmeme lo a-kedunbin,

¹⁶tensü thün pe Sunggigü kerüshvu hon loshü nrün rakagi lo suna miz dan nme me kethyü.

¹⁷A-le suna ketsin dikho sen-o kenrho chen, khun, lo laki thyü tiyo, lo rakagi lo suna dikho sen-o khun dan thyü tiyo,

¹⁸lo suna ketsin dikho sen-o rün kegwa pe ro kehü kershvubin lo a sekhin sükhun pe Npugü Kejozenkelo Khinpha gü hen kebin Cherubim thyü tiyo zoshü.

¹⁹Raja David le zoshü, “Hi aphu Npugü le a-npvü ano thyü lotse zo keshü hontse ndo kebin thu kü bin nle.”

²⁰David le anyugü Solomon ka zoshü, “Peche lo nko bin lo. Thatho thyü solo, thame no nkhin la nya. Ale a-lothyü kehü Npugü Sunggigü le nzen hüti. A-le nkhela loho, nle a-Kershvuka nyu thatho thyü nrün thyü penlo kemvuthen a-le nzen hüti.

²¹Püshükedanyu lo Levinyu no Kershvuka nyu thatho thyü nrün tenyen shü laso. Temi tha lihi-e thyü keshanyu aphu n keche shü nyü ho bin nyo, temi aphu lo anyugun sharhi nyu le njozen ti.”