Read Southern Rengma Naga 2 BINYOH 1 Bible Online

2 BINYOH 1 - Southern Rengma Naga bible

2 BINYOH 1

¹Raja David nyugü Solomon le Israel nyu rajaphen gü sen tsekha lo, lo Npugü a-Sunggigü le jochü pe a-tsüo a-thyü pe kvusa shü.

²Raja Solomon le ahza pe yie so keda, tsiso keda, sorkari tho nyu kedanyu aphu, kami pe aphu lo temi kechanyu aphu tsüshü,

³anyugun no a-zen-o Gibeon nyu kershvubin ka gü lotse ahza hoshü. Npugü gogü Mosa le tehenyhun kemvu ki thyükelo Npugü kehü phika gü pe tsüka shü kethyü genyu anyugun le tsü nyu gü.

⁴(Kejozenkelo Khinpha gü we Raja David le Kiriath Jearim ki sen keryü ka thyü keshü Jerusalem nyu bin.)

⁵Lazo pe kethyü kershvubin, Hur nyu Uri nyugü Bazalel le thyü keshü tsüko Gibeon ki Npugü kehü phika gü mhundyü ka bin zun. Raja Solomon lo temi aphu tsüka Npugü rüshvu.

⁶Raja gü le Phika gü mhundyü nyu lazo pe kethyü kershvubin ge senru pe Npugü rüshvu shü; a-le senru yie me dushvuo apentha pe tsü ge roshü.

⁷Tsüje Sunggigü le Solomon yhühyu thyüo a-ka ketsoshü, “Nle ano nyu lope ntsü nyü bin nla?”

⁸Solomon le zoshü, “Nle apvü David sosa kehü tsinshü, lo ntsoka nle ano a-sunka raja thyülo laso.

⁹O Npugü Sunggigü, nle apvü ka zoshwi keshü gü thyü pen shülo. Nle a lope temi chonrio swülo bukeho so raja thyüshü laso,

¹⁰temi hidan ketsen nrün genyu ale sen mvulo shvukebin kensü lo tedo kegwa pe atsülo. Tsonkemvu we ale dikipon ntemi danda higü ketsen lo tila?”

¹¹Sunggigü le Solomon ka zoshü, “Nle a-kenjü gü kejülo laso. Nle kenya nmvue teshwe nmvue nshwikerüchün nyu kesi, nmvue n npfü ngenyu yhunkethon hi nrün sunka atemi ale nno a-so raja thyü keshü dan ketsenlo nrün genyu kensü lo tedo kegwa hibin nyo.

¹²Ale kensü lo tedo kegwa pe ntsüti. Lo tsü nyeki, himhundyü hyulomvu nmvue hisiki raja nme-e hyulo keho kenya lo zan kechwi pe ntsü ti.”

¹³Tson-o Solomon le Npugü kehü phika le kebin bin Gibeon ka ranio Jerusalem ki ryüla. A-le tsünyu Israel nyu so gon.

¹⁴A-le kerugari yie me-o tsizi lo keru shüpahü yie tseryü kenyhun pen solo. Tsüdan peha no Jerusalem nyu bin lo a-sen no nyida lika hika binlo.

¹⁵A-raja gwenkho ka rakagi lo suna le Jerusalem nyu kesü thyü pe tso hontse lo sedar sen le kesü kela thyü pe tinkü sen hontse la.

¹⁶Raja gü mi nyu le Musri lo Kilikia nyu keru jwe kehü dan,

¹⁷lo Ijipt ki kerugari kejwe tsü ketsen lola. A-le keru lo kerugari pe Hitnyu lo Siria nyu raja dan ki shüo, kerugari nme le rakagi tsi tsero lo keru nme le tsime-o henpvün thyü.