Read Southern Rengma Naga 2 BINYOH 12 Bible Online

2 BINYOH 12 - Southern Rengma Naga bible

2 BINYOH 12

¹Rehoboam le Raja thyüo kekvu senlo nyemhun a-le lo a-temi dan le Npugü tejvü gü khela.

²Rehoboam le Raja thyükelo chen pvün chen anyugun le Npugü ge joketsin zomvu kela genyu shaja hyulo. Ijipt nyu raja Shishak le Jerusalem whe,

³a-le terigari yie meo tsi hvu, keruge temi yie hentsero, lo shüpahü Libya nyu, Sukkitnyu, Sudan nyu rihü swülo bukeho sin-o zenryü.

⁴A-le Juda nyida chwida kebin dan lolo-o kela Jerusalem keti ryü.

⁵Tsüselo, sidyükesha gü Shemaiah le Raja Rehoboam lo Juda nyu sharhi dan le Shishak kebuo ryü Jerusalem nyu kequen kebin ka gü. A-le anyugun ka zoshü, “Npugü le hagun ka johi zobin nle: ‘Hagun le akhela tsügenyu ale hagun khepe Shishak ben nyu shü laso.’ ”

⁶Tsontsin Raja gü lo sharhinyu ju le anyugun le mu laso tse zo-o, “Npugü le nyuthyü bin yo tsü le njü le tse shalo.”

⁷Npugü le hi hyu shüo a-le Shemaiah ka zo nishü, “Anyugun le anyu kemu shalo kela genyu, ale anyugun nke loho. Ai Shishak le anyugun whe kethyü ka ale anyu kenishü ti. Anyun kenthün aphu pe Jerusalem nyu shü mvu lati,

⁸ai Shishak le anyugun so kvulo lati, tson-o anyugun le a lokethyü lo kazü nyu kedanyu lokethyü au kecha kethyü le kebin sha loti.”

⁹Raja Shishak le Jerusalem nyu ryüo Kershvuka gü lo rajaka nyu kenya dan khilo la. A-le Raja gü Solomon le suna pe gida kethyü sin-o tha aphu khilo la.

¹⁰Tsü sunka Rehoboam le lazo pe gida thyü lo-o pe rajaka khinrun rikhun nyu so keda dan tenyen shü.

¹¹Raja gü le Kershvuka ki kegun tsen rikhun nyu le gida dan sen güo sen niryü rikhun nyu katsen günyu bin lahü.

¹²A-le tsenyo-o Npugü hensin ryü kela genyu Npugü nyunkekhü nyu a-nke shü lamvu, tson-o Juda genyu gwenkho gü le gwa bin lo.

¹³Rehoboam le Jerusalem raja thyüo kvu kenyelo. A-le a-keyhun chen henzi nme ka raja thyülo, tson-o Npugü le Israel nyu kazü aphu nyu a-kershvubin thyü titse kejükelo Jerusalem nyu chen tseryüo tsenyü raja thyü. Rehoboam a-jvü zan le Naamah a-le Ammon nyu temi.

¹⁴A-le nyu le gwamvu yo tsü thyü la, Npugü kendo gü fü mvu kela genyu.

¹⁵Rehoboam tho kerika gü kenkhin keti lo anyugun kaminyu rüla le sidyükesha gü Shemaiah lo sidyükesha gü Iddo au rüla ka kethu lesü ka bin. Rehoboam lo Jeroboam au jaka teri le bin zin ryü.

¹⁶Rehoboam le silao pe David nyida nyu raja nyu sika nyu sunla, tson-o anyugü Abijah le a-sunka raja thyülo.