Read Southern Rengma Naga 2 BINYOH 13 Bible Online

2 BINYOH 13 - Southern Rengma Naga bible

2 BINYOH 13

¹Israel raja Jeroboam le raja thyükelo chen tseryüo tetse ka, Abijah le Juda raja thyülo,

²lo a-le chen shen Jerusalem nyu raja thyü. A-jvü le Gibeah nyida nyu Uriel nyugi Micaiah. Abijah lo Jeroboam au janyu teri le soryü la.

³Abijah le rihü lak pezi penso lola lo Jeroboam le rihü lak tetse no tsü ntsun titse ndolo.

⁴Rihü dan le Efraim rincho ki keteno. Raja Abijah le Zemaraim kazüthun ge kü gü Jeroboam lo Israel nyu dan koshü: “Akhwe nyülo!” tse a-le zoshü.

⁵“Npugü Israel Sunggigü le David zen-o borhola lokeho kejozenkelo nme thyüo kethonthen Israel nyu so raja kethyü pe a-le lo a-nyenyu tsü kela hagun le shamvu ole?

⁶Nebat nyugü Jeroboam le a-raja gü Solomon ntsun sola.

⁷Tsontseo kenkhin ki a-le serikemvu nyu dan me ko kequen lo-o zen Solomon nyugü Rehoboam khwenyü mvuso, tsü gü le ncheri lo a-sikesha kendizun genyu anyugun nyhe lo mvula.

⁸Ntsoka hagun le Npugü le khipe David nyenyu ketsü raja gü zen kenren titse bin nyo. Hagun rihü danda le Jeroboam le pe hagun tero gü thyü titse thyükeshü suna pe kecha methutse dan sen hü.

⁹Hagun le Aaron tsipwen, püshükedanyu, lo Levinyu dan hü shwila. Tson-o anyugun bin ka senye kecha dan hontse püshükeda kejü lola. Ligü higü methutse nme nmvue tanyü tsenyü sen keryü gü le a-npfü a-thyü kenshün pe hagun tero hontse kethyü nyu püshükeda thyülo lahü.

¹⁰“Ai agun we Npugü ngun Sunggigü lothyü lo a-khela mvule. Aaron nyenyu püshükeda dan le anyugun thothyü lo Levinyu le anyugun keche hü nle.

¹¹Lonyü kheje tsen anyugun le tharün kegwa lo senru apentha rope a-rüshvu hü. Anyugun le tensü pe miz kenshün ge a-rüshvu lo khejetsen suna makenben bin ge mah nben shü hü. Agun le Npugü le johokeshü thyü hü, ai hagun we a-khela so.

¹²Sunggigü npfü agun sharhi, lo a-püshükeda dan le shukhun pe agun ko shülo hagun zen terithyü titse ndo-o hika bin nle. Israel nyu temi dan, hagun pvübon nyu Npugü Sunggigü zen kenren nya ta! Hagun le kvulo kemvui le!”

¹³Tson kebin ka Jeroboam le a-rihü peha nipe no sizin kipon Juda nyu rihü dan tson khwe bin, lo a-sen le mhundyüzin anyu zen kentsun bin.

¹⁴Juda nyu dan le shwishü laryü anyugun hunpfülo kela hyulo. Anyugun le nra Npugü ka keche hishüo püshükedanyu dan le shukhun shü.

¹⁵Tsüselo Juda nyu dan le nra sen shüo, Abijah no anyugun tsonrio tsüdan whe so; Sunggigü le Jeroboam lo Israel nyu rihü dan so kvula.

¹⁶Israel nyu le Juda nyu dan mhundyü tinla, lo Sunggigü le Juda nyu dan no anyugun nyekvu lola.

¹⁷Abijah lo a-rihü dan le Israel nyu boshvula Israel nyu shüpahü kegwa lak pvün boshvula.

¹⁸Tson-o Juda temi dan le Npugü, anyugun pvübon nyu Sunggigü tenyen kethyü genyu Israel nyu so kvulo.

¹⁹Abijah le Jeroboam hügü a-nyida peha nkhenlo la: Bethel, Jeshanah, lo Ephron, lo nyida hidan khoka rünyi dan.

²⁰Abijah raja gwenkho ka Jeroboam le a-kekvu hyunilo mvula. Tson-o kenkhin ki Npugü le a-vüshvula.

²¹Lo Abijah le kvu kenye so ryülo. A-le a-nu mitseryü pezi, lo anyu peche nki kenyhun, lo tenu tseryüo tsero le bin.

²²Abijah le nyu zo lo thyüshü yo a-rüla a-sen le sidyükesha gü Iddo rüla kethu lesü ka bin nyo.