Read Southern Rengma Naga 2 BINYOH 14 Bible Online

2 BINYOH 14 - Southern Rengma Naga bible

2 BINYOH 14

¹Raja Abijah le silao pe David nyida nyu raja nyu sika nyu sunla. A-nyugü Asa le a-sunka raja thyülo. Asa hensin nyu chen tseryü kazü gü le bwe lo.

²Asa le nyu le njü lo gwayo tsü thyüo Npugü a-Sunggigü kenyü thyülo.

³A-le tesin kershvubin, lo Sunggigü shakemvu kershvubin dan borhola, kenshün tso kesen bose la lo Asherah terogi menkezü duthü la.

⁴A-le Juda temi dan no Npugü anyugun pvübon nyu Sunggigü kendo thyü, a-senkethyü lo a-johokeshü thyüzen lotse ahza shü.

⁵A-le Juda nyida dan no tero kershvubin lo tharünkegwa kershvubin bokenmhe kela genyu a-keda hensin rajaphen le bwen rüyülo.

⁶A-gwenkho ka a-le chwida khwe pe Juda nyida dan hun lo, lo Npugü le kebwen pe a-ketsü genyu chen tekü-tseryü teri ndilo.

⁷A-le Juda temi dan ka zoshü, “Ngun chwida lo tsokhwen dan thyü lo-o khinrun khinla lo khincha shüla tile. Ngun le Npugü ngun Sunggigü kendo thyü kelo genyu kazü gü ketsen loso. A-le lizin hizin ngun khwen ntsenlo laso.” Tson-o anyugun le thatho thyü lo gwakenyelo.

⁸Raja Asa le Juda temi rihü gida lo min kesen 300,000 lo Benjamin temi gida lo tholevü kesen 280,000 le bin. A-nyugun aphu kepeche lo chün kegwa thyü kela temi.

⁹A-zan le Zerah tse kethyü Sudan nyu nme le rihü 1000,000 lo terigari tsishen zen Juda hü ryü Mareshah tila.

¹⁰Asa le a-zen kenren titse chwi lo anyugun le lizin hizin Mareshah khoka Zephathah ketejon nyu gwen ndolo.

¹¹Asa le Npugü a-Sunggigü ka kehi thyüshü, “O Npugü nle nne satse kvukemvu rihü gü che pe kekvu gü hontse shü logwa. O Npugü, agun Sunggigü, ntsoka agun che shülo, agun le ntenyen lo nzan nyu rihü danda higü nren titse ryü kebin genyu. Npugü, nle agun Sunggigü; temi nme-e nnyeki kvu keloi ndi.”

¹²Asa lo Juda nyu rihü dan le Sudan rihü dan whe, lo Npugü le kvulo la. Anyugun le tinla,

¹³lo Asa lo a-rihü dan le anyugun hü gü Gerar ti. Tson-o Sudan nyu kechon ga lao, rihü dan le rani ryü anyugun nrenlo mvula. Npugü lo a-rihü dan le anyugun sokvu lola, lo rihü dan le anyugun hon kechon khilo.

¹⁴Tsüselo anyugun le Gerar lo tsü kehun nyida dan nkela, kechamvule tsüki temi dan le Npugü rüla shape anyugun kerüshvu kela genyu. Rihü dan le nyida tsüdan aphu lolo-o kanyü kechon khilo.

¹⁵Anyugun le tanyü kekhwen nyu kensenbin peha ko wheo tanyü lo ut kechon ten lola. Tson-o anyugun le Jerusalem ki niryüla.