Read Southern Rengma Naga 2 BINYOH 15 Bible Online

2 BINYOH 15 - Southern Rengma Naga bible

2 BINYOH 15

¹Sunggigü kapu gü le Oded nyugü Azariah ge ryü,

²tson-o a-le gü Raja Asa teno. A-le so, “Raja Asa, Juda lo Benjamin temi aphu akhwe nyülo! Hagun le Npugü zen kehü then a-le hagun zen hü. Hagun le a-fü yatselo a-le hagun no a-hyu loti, ai hagun le rani laya tselo a-le hagun khe lati.

³Gwenkho kethon Israel nyu le Ketsin Sunggigü sen mvuo yhun, püshükedanyu no anyugun senthyü mvu lo tejvü ndi laso.

⁴Ai kenjün kethyü le keryüka, anyugun le Israel nyu Npugü Sunggigü ki raniryü. Anyugun le a-füo a-hyulo.

⁵Tsü jon ka we temi nme-e nyunbwen-o ryü lo gü lomvu, kazü lika hika-e kenjün kethyü lo kevükeben le bin kela genyu.

⁶Senye nme le senye kecha gü nshwe, nyida nme le nyida kecha gü nshwe tse hü, Sunggigü le kenjün kethyü lo shekese senryü anyugun ge shü kela genyu.

⁷Ai hagun we nko binlo,lo nyunkhinya. Hagun le thyü nrün tho gü chün thyü pe hagun tsüti.”

⁸Asa le Oded nyugü Azariah le sidyü jo zokeshü nyüo peche lo. A-le Juda lo Benjamin kazü nyu teromen aphu lo Efraim rincho ki a-le nkhen kelo nyida nyu teromen tse aphu khila. A-le Kershvuka kamhun nyu kebin kershvubin ko ketsükela nilo.

⁹Efraim, Manasseh lo Simeon temi kechon le Asa kipon ryüo a-rajaphen nyu yhun tinla, Npugü le a-zen kehü hyu kela genyu. Asa le anyugun aphu lo Juda lo Benjamin temi tse koshü.

¹⁰Anyugun le asa le raja thyükelo chen tseryü pvün gü shye shen ka Jerusalem nyu kequenlo.

¹¹Tsünyü anyugun le terithyü gü khikelo pe rora thyü pe Npugü kishü: Methu 700 lo tanyü 7,000.

¹²Anyugun le anyugun nyun lo keyhun aphu sen Npugü, anyu bon nyu Sunggigü rüshvu hü titse kejozenkelo thyülo.

¹³Ligü higü Npugü rüshvu kemvu gü nche nmvue püshü, peche nmvue tenu metse boshvula.

¹⁴Anyugun le nra sen-o Kejozenkelo hi zen ti tse Npugü zan nyu swe la njüo sen lo shu khun shü.

¹⁵Juda temi dan aphu anyugun nyun aphu sen-o kejozenkelo hi gü thyü kela genyu a-kenyüla. Anyugun le anyu kenyü ho tse Npugü rüshvu lo a-le anyugun kerüshvu lolo-o lizin hizin kengü kegwa pe anyugun tsüshü.

¹⁶Raja Asa le a-gü Maacah no raja a-jvügi thyü mvula, tsügi le kentsü kenchen terogi asherah men nme thyü keshü genyu. Asa le teromen gü dushe shüo dukhodura pe Kidron Ketejon nyu rola.

¹⁷Asa le kazü gü nyu tero kerüshvubin aphu nke lamvu yatse-e a-le a-rhünthen Npugü mhundyü nyu joketsin zo bin-o ti.

¹⁸A-le a-pvü Abijah le thyükenshün pe Sunggigü tsükela aphu lo a-le a-npfü thyü kenshün kela suna lo rakagi kanyü-e senryü Kershvuka nyu shüla.

¹⁹A-le raja thyükelo chen shenryü pvün mhundyü we teri thyü mvula.