Read Southern Rengma Naga 2 BINYOH 20 Bible Online

2 BINYOH 20 - Southern Rengma Naga bible

2 BINYOH 20

¹Tsüsiki Moab lo Ammon nyu rihü dan le Meunite nyu rihü pe anyugun sin zen ryü Juda hü.

²Lilonyu peha le ryüo Raja Jehoshaphat ka zoshü: “Edom nyu rihü danda le n whe titse kesi zida lidan zin ryüzhü nle. Anyugun le Hazazon Tamar lolo laso.” (Hile Engedi zan kecha gü.)

³Jehoshaphat le a-kerülao NPugü ka tsonketsin hi. Tson-o a-le a-kazü nyu temi aphu no nyen lo tse ahza shü.

⁴Juda nyida aphu nyu temi le nyhun-o Jerusalem kiryü Npugü ka kehi thyü,

⁵tson-o anyugun lo Jerusalem nyu temi tse Kershvuka mhun keshün gü nyu kequenlo. Raja Jehoshaphat le gü anyugun mhundyü ka solo-o

⁶Kehithyü nra tetso-o, “Agun pvübon nyu NPugü Sunggigü, nle tsangge bin-o kazü senye aphu so keda thyü hü. Nle kvu lo gonsao temi nme-e n ntsun loho.

⁷Nle agun Sunggigü. N temi Israel nyu le ketu-o kazü higü nyu keryü ka, nle hika yhun kebin nyu hü lao kazü gü pe npvü gü Abraham tsipwen no kethonthen gwen lotse tsüshü.

⁸Anyugun le hinyu yhun-o n kerühvu nyu Kershvuka nme thyü shü,

⁹teri, kenpen, nmvue chenda kenke lihi-e anyugun ge ryü yatselo nrüshvu kehü bin Kershvuka higü mhundyü ka solo nrün shao. Anyugun gwen keshvu ka nka hi shülo nle anyugun kehi nyü lo-o anyu kenishwi shü nrün genyu.

¹⁰“Ntsoka Ammon, Moab lo Edom nyu le agun whe bin laso. Agun pvübon nyu le Ijipt nyu chwikeryü ka nle anyugun no tsü dan kazü nyu yü mvu, tsügenyu agun pvübon nyu le anyugun terhon gü lao anyugun nke mvula.

¹¹Anyugun we nle pe agun ketsü kazü gü nyu agun hüshwi pe agun kethuni titse bin laso.

¹²Nle agun Sunggigü! Agun le agun whe kebin rihü danda higü mhundyü nyu agun kekvu ndi kela genyu shaja pe anyugun tsülo. Agun le nyuthyü tiyo shamvuo nka keche nri bin nle.”

¹³Juda temi aphu, anyugun nunyu lo nyenyu zen-o Kershvuka gü ka sobin,

¹⁴Lo Npugü kapu gü le danda tsü nyu kehü Levinyu nme ge ryü la. A-zan le Zechariah nyugü Jahaziel; a-le Asaph pfüphun nyu, Asaph tsipwen Mattaniah, Jeiel, lo Benaiah ka yhun ryü.

¹⁵Jahaziel le zoshü, “Raja gü lo Juda lo Jerusalem temi aphu, Npugü le kezo le rihü danda higü teno nshvu nmvue hagun shese nya. Teri gü le hagun gemvu ai Sunggigü le ti.

¹⁶Senduki anyugun le Ziz kazükenchon ka ryülo gü anyugun whelo. Hagun le Jeruel tehennyu rünyi khoka ketejon teka anyugun teno ti.

¹⁷Hagun le teri thyü kemvui. Hagun gwen ndo lo-o khwe binlo; lo Npugü le kvukelo pe hagun ketsü hagun le hyuti. Juda lo Jerusalem temi dan, hagun kenyun sun nmvue nshvunya. Chwi gü teri nyu gülo, lo Npugü le hagun zen hüti!”

¹⁸Tsüselo Raja Jehoshaphat le a-mhunpfü nkhün tsüla, lo temi aphu nkhün tsügü Npugü rüshvu.

¹⁹Kohath lo Korah pfüphun Levinyu dan le so-o nra tetso-o Npugü Israel nyu Sunggigü shwe shü.

²⁰Tsüsinyü temi dan le lonyü nshwe chwio Tekoa khoka tehen nyu rünyi ki gü. Anyugun le chwikejü ka Jehoshaphat le jo hidan zoshü: “Juda lo Jerusalem temi dan! Npugü hagun Sunggigü tenyen lo, lo hagun le sun nko bin loti. A-sidyükeshanyu le nyu zoyo tenyenlo, lo hagun le gwa loti.”

²¹Temi dan zen kegwensha kela siki raja gü le lükethyü nyu peha no kenshün thokethyü ka sen kehü bola ketseyho ben-o rihü dan mhundyü ri lüthyü: “Npugü shwe! A-keso le kethonthen le,” tson lotse ahza shü!”

²²Anyugun le lüthyü so ntsin, Npugü le anyugun hüryü kebin rihü dan no nshvu lola.

²³Ammon nyu lo Moab nyu tse le Edom nyu rihü dan wheo tsü nke shüla, tsüselo anyugun khinyu nyu nren ni sola.

²⁴Juda nyu rihü dan le kazükesi gü ki tsokhwe nme tilo-o anyugun rinyu shwishü laryü aphu sipe kazünyu keto keryü kebin hyulo. Temi nme-e tin lomvu.

²⁵Jehoshaphat lo a-rihü dan le anyugun kanyü khilo titse gü kethyü ka methu, kanyü, phinya lo thamin ketsen kechon hyulo. Anyugun le jon shen bin-o kanyü jün kequen, ai chonritsin-o aphu pfülo mvula.

²⁶Jonzi nyü anyugun le Beracah ketejon nyu kehun-o Npugü shwelo, a-tho aphu genyu. Tsügenyu ketejon gü pe “Beracah” tse kola.

²⁷Jehoshaphat le Npugü le anyugun shwikerüchün nyu sokvulo kela genyu a-rihü dan zen Jerusalem nyu niryüla.

²⁸Anyugun le nyida gü tikelo ka harp sen lüthyü lo shu khun-o Kershvuka ki gü.

²⁹Npugü le dihontse Israel nyu shwikerüchün nyu sokvu loyo tsünyü kelo senye aphu a-kerüshvu la,

³⁰tsügenyu Jehoshaphat le bwenye tse keda thyülo, lo Sunggigü le lizin hizin aphu kenshvu kendi pe a-tsü.

³¹Jehoshaphat le a-keyhun chen shenryü pvün ka Juda raja thyülo, tson-o chen nkipvün Jerusalem nyu raja thyü. A-jvü le Shilhi nyugi Azubah.

³²A-le a-pvü Asa hontse Npugü mhundyü ka nyu le njü yo tsüthyü;

³³ai tero kerüshvubin dan nke lamvu. Tson-o temi dan le a-nyun apentha sen anyugun pvübon nyu Sunggigü kerüshvu nyu ryü mvu.

³⁴Jehoshaphat le raja thyükelo keri ka gü kenkhin keti, a-le thyükeshü aphu Hanani nyugü Jehu rüla kethu lesü ka thu njü, tsü le Israel raja dan rüla peha.

³⁵Gwengwa me raja Jehoshaphat le Israel raja Ahaziah serikemvu kechon thyü keshü gü au kengü hü.

³⁶Au le Eziongeber run kensenbin ka züda nyu gü kehü run cha.

³⁷Ai Marashah rünyi nyu Dodavahu nyu gü Eliezer le Jehoshaphat no pütsü lolo tse a-rhoshü, “Nle Ahaziah zen kengü kethyü genyu Npugü le hai le thyü keshü nke lati.” Lo run dan le nren lao tsonchü lomvu la.