Read Southern Rengma Naga 2 BINYOH 23 Bible Online

2 BINYOH 23 - Southern Rengma Naga bible

2 BINYOH 23

¹Chen tsero siki Püshükeda gü Jehoiada le thatho thyü keshü gwenkho so tse rhilo. A-le rihüdan so keda nyu minpvün zen kejozenlo: Jeroham nyugü Azariah, Jehohanan nyugü Ishmael, Obed nyugü Azariah, Adaiah nyugü Maaseiah lo Zichri nyugü Elishaphat.

²Anyugun le njwen-o Juda nyida aphu nyu gü Levinyu lo pfüphun pe kesen nyu aphu zen Jerusalem nyu ryülo.

³Anyugun aphu Kershvuka gü nyu kequen-o raja gü nyugü Joash zen kejozenlo. Jehoiada le anyugun ka zoshü, “Raja sikela gü nyu le hika re! Npugü le Raja David tsipwen no raja thyüti tse zoshü kenjü hontse ntsoka a-no raja thyü lati.

⁴Ngun hihontse thyüti. Sabbath nyü püshükedanyu lo Levinyu le thatho thyü ryülo, anyugun jünshen jünme no Kershvuka gü khenpfü dan rikhun,

⁵kecha jünme no rajaka rikhun, lo a-sen no khinrun binjwe ka n bin ti. Temi aphu Kershvuka kamhun nyu kehun ti.

⁶Püshükedanyu lo Levinyu lotho thyü kebin nyu nti a-me temi nme-e no Kershvuka nyu yüryü loho. Anyugun thyükenshün kela genyu anyu le yüryü logwa, ai temi kechanyu we Npugü le zo keshü zen-o tegwen kibin mvuloshvu.

⁷Levinyu le anyugun zhethon tho sen-o raja gü hun pfüo raja gü le lika hika güe a-zen bin ti. Ligü higü Kershvuka gü nyu yü titse gü kethyü nyu dushvu lalo!”

⁸Levinyu lo Juda temi le Jehoiada le zokeshü thenlo. Temi dan le Sabbath nyü lotho thyü tseo gun kejü dan hoshü lamvu, tsügenyu kedanyu dan le thatho nyu ryü lo tin kejü ko tse hyulo.

⁹Jehoiada le Raja David hon Kershvuka nyu bin kenjü mi lo gida dan pe kedanyu ju tsüshü.

¹⁰A-le temi dan no zhethon tho sen-o Kershvuka mhundyü zin aphu hunpfüo raja gü ntsen kebin ndoshü.

¹¹Tsüselo Jehoiada le Joash zen chwiryü Rajaperün pe npfü shü, lo raja thyü kebin tejvü lesü pe a-ben nyu shü. Tson-o akhipe Raja thyü shü. Püshükeda gü Jehoiada lo a-nyu dan le terzü pe Joash yün shü lo temi aphu sen-o, “Raja no yhun kethon gü thyü lo!” tsonshü.

¹²Athaliah le temi le raja gü shwe kebin khwenyülo-o tin Kershvuka ki temi danda le kehun kebin ka ryü.

¹³Tsüka a-le raja keshün gü le Kershvuka khenpfü ka kachon gü khoka sobin lo rihü so kedanyu lo shu kekhun nyu le a-hun pfü kebin hyulo. Temi aphu shekerhün thyü sen, shu khun, lo Kershvuka nyu lükethyü nyu le lükhin sen sharhi thyüo shekerhün thyü bin. A-le a-phi sürhen nrao, “Ketetsin! Ketetsin” tseso.

¹⁴Jehoiada le Kershvuka khoka Athaliah boshvula nyümvuo rihü sokeda nyu ko shüo anyugun ka zoshü, “Rikhun nyu janyu a-zen tinla, lo ligü higü tsügi kenishwishü titse ndo kethyü gü boshvula.”

¹⁵Anyugun le a-sü lo-o zen rajaka ki gü, Keru khinrun ka a-boshvula.

¹⁶Püshükeda gü Jehoiada le Raja Joash lo temi dan no a-zen kerhün-o anyugun le Npugü temi thyü titse kejozenkelo nme thyülo.

¹⁷Tson-o anyugun aphu Baal kershvuka ki gü tsü borho la. Anyugun le tsünyu kershvubin lo teromen dan boren la, lo kershvubin mhundyü nyu Baal püshükeda gü Mattan boshvu la.

¹⁸Jehoiada le Kershvuka gü nyu thatho dan pe püshükeda nyu lo Levinyu tenyen la. Anyugun no Raja David le thatho pe anyugun jünthyü keshü lo Mosa tejvü then-o pe Npugü ketsü kerüshvu dan ro nrün genyu. Lü kethyü lo shekerhün tho dan kope anyugun tenyen shü.

¹⁹Jehoiada le nshün kemvu lihi-e no yüryü mvu nrün genyu rikhun nyu pe Kershvuka khenpfü dan ka ko shüla.

²⁰Rihü so kedanyu, sharhinyu, kedanyu, lo temi aphu Jehoiada zen kethen-o Kershvuka gü nyu raja gü zenryü rajaka nyu shü shü. Anyugun le khenpfü lvü günyu yüo raja gü le a-rajakhün ge dunlo.

²¹Temi aphu a-kenyü hola, lo Athaliah boshvu kela siki nyida gü le je tsela.