Read Southern Rengma Naga 2 BINYOH 24 Bible Online

2 BINYOH 24 - Southern Rengma Naga bible

2 BINYOH 24

¹Joash le a-keyhun chen tsenyü ka Juda raja thyülo, lo a-le chen henzi Jerusalem nyu raja thyü. A-jvü le Zibiah, a-le Beersheba nyida nyu temi.

²Püshükeda gü Jehoiada le yhun kebin then Joash le Npugü kenyü thyü hü.

³Jehoiada le Raja Joash nu mihvu fü pe tsüo a-le a-nyu peche lo tenu-e bin lo.

⁴A-le gwenkho peha raja thyü bin kela siki Kershvuka gü thyü ketseni kethyü rhilo.

⁵A-le Püshükeda nyu lo Levinyu no Juda nyida dan ki gü chen kechwi Kershvuka thyü ketseni nrün genyu pisa sen kekü shvulo lotse ahza shü. A-le anyugun no whütse lotse zoshü, ai Levinyu dan le ntsüla,

⁶tsügenyu a-le anyugun sharhi gü Jehoiada ko shüo ketsoshü, “Nyuthyüo Levinyu no Npugü gogü Mosa le Npugü kehü Phika gü keche genyu temi dan ka khilo kehü khajana tsü Juda lo Jerusalem temi ka shvu shü mvula?”

⁷(Tenunyu serikemvu gü Athaliah kethen dan le Kershvuka bokecha lo kenshün kanyü kechon pe Baal kerüshvu ka sen la.)

⁸Raja gü le Levinyu dan no khinpha nme thyülo-o pe Kershvuka gü khenpfü ka shü lotse ahza shü.

⁹Tson-o anyugun le jolo nipe Jerusalem lo Juda aphu ka shüo ligü higü-e no Sunggigü gogü Mosa le tehenyhun kemvu ki shvu terikeshü khajana gü sen Npugü ki ryü lo tse shü.

¹⁰Hile temi lo anyugun sharhi dan kenyü lao anyugun khajana pisa sen ryü khinpha gü süla.

¹¹Khenyütsen Levinyu le khinpha gü sen raja gü hensin ka tsü kentsen gü ki shühü. Lihi gwenkho ka-e tsüle süla lo raja bin nyu kethu gü lo püshükengun gü le nikeshü gü tse le pisa khishwi lolao khinpha gü rani pe a-bin ka shü lahü. Tsü hontseo anyugun le pisa kechon kequen lola.

¹²Raja gü lo Jehoiada au le pisa pe Kershvuka thyü ketseni kebin keshwi nyu tsüshüo tsüdan le pe tso keyhenyu, mistrinyu, lo tegi kecha nyu tsüo tsüdan le ka gü thyü ketseni.

¹³Thatho kethyü nyu phu kekvu thyüo anyugun le Kershvuka gü thyü pe a-kerika hontse nkoni lola.

¹⁴Thyü ketseni kethyü tho pen kelo siki suna lo rakagi nsen kebin dan pe Raja gü lo Jehoiada au tsüshü, au le tsü pe Kershvuka nyu sen nrün khun lo lalü dan thyülo. Jehoiada le yhun kebin then, Kershvuka gü nyu kerüshvu thyü zin bin hü,

¹⁵A-le püshü sao a-keyhun chen tseio shenryü ti lo-o sila.

¹⁶A-le Israel nyu temi genyu, Sunggigü genyu lo Kershvuka gü genyu thatho thyü keshü kerüchün genyu anyugun le a-lope David nyida nyu raja nyu sika ka sunla.

¹⁷Ai Jehoiada le sila laryü Juda sharhi dan le Raja Joash nthon pe no anyugun khwenyü la.

¹⁸Tson-o temi dan le Npugü Kershvuka nyu anyugun pvübon nyu Sunggigü rüshvu mvulao terogi Asherah men kezü dan rüshvu sola. Thyüzü kela kemu higü genyu Npugü le nyunkekhü senryü Juda lo Jerusalem ge shüla.

¹⁹Npugü le sidyükeshanyu nishüo anyugun no petsü lo-o rani a-kiryü lotse shü, ai temi dan le nyü mvula.

²⁰Tsüselo Sunggigü kapu gü le püshükeda gü Jehoiada nyugü Zechariah ge ryüla. Tsontsin a-le temi le a-hyulo kegwa bin ka solo-o nrao, “Npugü Sunggigü le nyuthyüo hagun le a-johokeshü zen mvuo kenke kenmhü senryü hagun npfü hagun ge shü güjü nla tse ketso bin nle! Hagun le a-khekela genyu a-ko hagun khe laso!”

²¹Raja Joash le anyugun zen kerhün-o Zechariah ntsun lola, tson-o raja gü le ahza shüo temi dan le Kershvuka mhun nyu tso pe Zechariah jon shvula.

²²Raja gü le Zechariah a-pvü Jehoiada le a-ge gwa pen-o thathyü keshü nmhinlao Zechariah boshvula. Zechariah le sigü kejü ka nrao, “Hagun le nyuthyü bin yo Npugü no hyushüo shaja pe hagun tsülo!”

²³Tsü chen seryü ki, Siria nyu rihü dan le ryü Juda lo Jerusalem wheo sharhinyu aphu dushvula lo kanyü kechon jün pfüo Damaska ki nigun la.

²⁴Siria nyu rihü le kerho, ai Npugü le anyugun no Juda nyu rihü kechon sokvu lola, temi dan le anyugun pvübon nyu Sunggigü khekela genyu. Hihontseo shaja pe Raja Joash tsüla.

²⁵A-le jün sala, tson-o shwikerüchün nyu le rani kela siki a-hensin kedanyu mihvu le a-le püshükeda gü Jehoiada nyugü boshvu kela khen zo-o a-zhü nyu a-boshvula. A-lope David nyida nyu sunla ai raja nyu sika nyu mvu.

²⁶(A-boshvu kela hvu le Shimeath tse kethyü Amon nyu tenunyu nme nyugü Zabad lo Shimrith tse kethyü Moab nyu tenunyu nme nyugü Jehozabad.)

²⁷Joash nyenyu dan rüla, sidyü jozo a-ntsun kethyü, lo dihontse a-le Kershvuka thyü ketseni yo tsü rüla le Raja nyu dan rüla kethu lesü ka bin. A-nyugü Amaziah le a-sunka raja thyülo.