Read Southern Rengma Naga 2 BINYOH 26 Bible Online

2 BINYOH 26 - Southern Rengma Naga bible

2 BINYOH 26

¹Juda temi aphu Amaziah nyugü a-keyhun chen tseryüo tsero kela gü kejü pe a-pvü sunka raja thyülo.

²(Amaziah kesi siki Uzziah le Elath loni lo-o nyida gü thyü nilo.)

³Uzziah le a-keyhun chen tseryüo tsero ka Raja thyülo lo a-le chen hen pvün kenyhun Jerusalem nyu raja thyü. A-jvü zan le Jecoliah, a-le Jerusalem nyu.

⁴A-pvü tsinhi then-o a-le nyu le Npugü kenyü yo tsüthyü.

⁵Zechariah le yhun kebin then a-le a-nyun aphu sen Npugü lothyü lo, lo Sunggigü le jochü pe a-tsü shü.

⁶Uzziah ale Filistian nyu zen terithyü gü. A-le Gath, Jamnia, lo Ashdod nyida dan chwida borholao Ashdod khoka nyida dan lo Filistian kecha ki-e chwida khwe lola.

⁷Sunggigü le a-cheo a-le Filistian nyu, Gurbaal ka yhun kebin Arab nyu lo Meunit nyu tse sokvu lola.

⁸Ammon nyu le khajana pe Uzziah tsü, tson-o a-le kvusa chwiryüo Ijipt keti a-rüla zo gunla.

⁹Uzziah le Jerusalem khinrun a-qün gü ka, ketejon ki kegü khinrun ka, lo chwida keni ka tse rikhun bin khwelo-o tsü thyü ketsela.

¹⁰A-le nkhünzin rincho phaki lo ketejon ki senru kechon nkin kebin genyu lojvü ki rikhun bin thyü shü lo zülvu kechon tso shü. A-le low ketsü le a-kenyü kethyü genyu temi dan thu keyhun pe rincho ki vain sen shü lo kazü kebwe dan pe low tsülo.

¹¹A-le teri genyu rihü kechon ndo njü. A-hensin ka kebin kethu hvu Jeiel lo Maaseiah au no Raja gü zen thathyü kehü Nahaniah hensin nyu bin-o tsü ntsen hü.

¹²Kedanyu, 2,600 no a-rihü dan ntsen hü.

¹³Lo anyugun hensin ka raja gü cheo terithyü salo kegwa shüpahü temi 307,500.

¹⁴Uzziah le gida, mi, tegi perün, tegi mirün, tholevü lo tho, lo kezeü nrün genyu tso tse pe a-rihü dan tsüshü.

¹⁵Jerusalem nyu a-temi thakeshün füshü kehü dan le nyida gü tsokhwe lo a-qün danka bin-o tholevü lo tso keda shweshü nrün kanyü thyüshü. A-le Sunggigü kipon keche hyukelo genyu liki hiki mele a-rüla zo sü gun lao a-le kvusa lola.

¹⁶Ai Raja Uzziah le nkolo ntsin a-le ketekho lo lao tsügenyu chela. A-le Kershvuka gü nyu yü gü tharünkegwa kershvubin ge tharün kegwa ro titse keso ka Npugü a-Sunggigü mhundyü ka mula.

¹⁷Püshükeda gü Azariah le püshükeda kenko lo kepeche temi hentetse zen raja gü then

¹⁸gü a-khin. Anyugun le zoshü, “Uzziah! Nle tharün kegwa rope Npugü kishü zümvu. Aaron tsipwen no lotho higü thyü titse thyükenshü lo kela püshükedanyu nti gile. Kenshünbin higü ka bin nyao tin lalo. Nle Npugü Sunggigü mhundyü ka mu laso, lo Sunggigü jochü nle hyusin loho.”

¹⁹Uzziah le tharün kegwa kero khun sen-o Kershvuka nyu tharünkegwa kero kershvubin khoka sobin. A-le püshükedanyu dan ge a-nyunta bin, tsontsin whütse a-senpfü ge nyuh le ketyü le chwiryü la.

²⁰Azariah lo püshükeda kechanyu jule Raja gü senpfü shwishüo nshvula, tson-o a-no Kershvuka nyu chwila lotse a-nila. Npugü le shaja pe a-tsü kela genyu a-ko nmhe chwila.

²¹Tson-o Raja Uzziah le nyuh le ketyü tsügenyu nshün mvubin-o a-kesi ti. A-le Kershvuka gü nyu yü nilo mvula, thatho aphu khelao a-npfü a-kanyu bin tinla, tson-o a-nyugü Jotham le kazü gü ketsen tinla.

²²Amoz nyugü sidyükesha gü Isaiah le raja Uzziah le a-raja gwenkho ka thyü keshü kecha aphu thu njü.

²³Uzziah le silao raja nyu sika bin nyu a-sun ai a-le nyuh le tyü kethyü genyu pe rajanyu sika nyu sun mvula. A-nyugü Jotham le a-sunka raja thyülo.