Read Southern Rengma Naga 2 BINYOH 30 Bible Online

2 BINYOH 30 - Southern Rengma Naga bible

2 BINYOH 30

¹Temi dan le shye keri gü ka, gwenkho to nyu Nkenkelo Nga rühvu lomvu la, nshün kebin püshükeda nyu chonmvu lo temi kechon le Jerusalem nyu kequen bin kemvu genyu. Tsügenyu Raja Hezekiah, a-hensin kedanyu, lo Jerusalem temi dan le shyehvu gü ka tsü nga titse kenthon lo, tson-o raja gü le jolo nipe Israel lo Juda temi aphu tsüshü. A-le lesü thu pe Efraim lo Manasseh tsipwen tsüo anyugun no Jerusalem nyu Kershvuka nyu ryü Npugü, Israel nyu Sunggigü kerühvu nyu Nkenkelo Nga lo tse koshü.

⁴Raja gü lo temi dan le anyugun le rhikelo hile anyugun kenyüla,

⁵tson-o anyugun le tesozin Dan ka gü tezin zin Beersheba keti no ryü Jerusalem nyu kequen-o himhundyü nyeki temi chon-o tejvü gü then-o Nkenkelo Nga lotse Israel nyu aphu koshü.

⁶Lilonyu dan le Raja gü lo a-hensin nyu kedanyu dan le johokeshü hontse Juda lo Israel kazü aphu ka gü hihontse anyugun koshü: “Israel nyu temi dan, Assiria nyu le kazü gü lokelo ka hagun nsen shü. Ntsoka Abraham, Isaac, Jakob Npugü Sunggigü ki raniryülo, lo a-le rani hagun ki ryüti.

⁷Hagun pvübon nyu lo hagun pvünyu Israel nyu hontse Npugü hagun Sunggigü jozenkemvu thyü nyalo. A-le shaja pe anyugun tsüsa kela hagun ko hyu bin nyo.

⁸Anyugun hontse hagun nyun rüla nya, ai Npugü jozen lo. Npugü hagun Sunggigü le kethonthen thyü nshün kela Jerusalem Kershvuka nyu ryülo, tson-o a-no hagun ge a-nyunta sin mvu nrün genyu a-rüshvu lo.

⁹Hagun le Npugü ki raniryü lo yatselo hagun shvunye tenzen-o dothyü tinkela dan le anyugun shwinjün-o no rani kaki ryü lati. Npugü hagun Sunggigü le a-jvü gwa lo me shwinjün hü nyo, hagun le rani akiryü lo a-le hagun zen loti.”

¹⁰Lilonyu dan le Efraim lo Manasseh tsipwen kazü nyu nyida aphu ka, lo tesozin Zebulun tsipwen keti gü, ai temi dan le anyugun shwinyü lo nkhinla.

¹¹Tson-e Asher, Manasseh lo Zebulun tsipwen ka temi peha le Jerusalem ki ryü nyü so.

¹²Sunggigü le Juda dan nyu thathyü shüo temi dan nyun thyü kerhün pe no Raja gü lo a-hensin kedanyu dan ale johokeshü then-o a-jozenlo.

¹³Shye hvu gü ka temi kechon le kebu no shükemvu Tensü ketyü Nga titse Jerusalem nyu kequen lo.

¹⁴Anyugun le Jerusalem nyu rüshvu kehü lo tharün kegwa ro kehü kershvubin aphu sen gü Kidron ketejon ki shwela.

¹⁵Tson-o shye jonryü pezi nyü NKenkelo Nga genyu ro kethyü tanyü nyu dan dushvulo. Püshükeda nyu lo Levinyu nshün kemvu dan ko keja sao anyugun npfü anyugun thyü kenshün pe Npugü tsülo, lo ntsoka we anyugun le Kershvuka nyu rope kerüshvu thyü logwa.

¹⁶Sunggigü temi gü Mosa tejvü nyu thu kebin hontse anyugun le Kershvuka nyu anyugun bin ka bin lo. Levinyu le rotho kethyü tezi gü pe püshükeda nyu tsüshü. lo tsüdan le kejen pe kershvubin ge shü.

¹⁷Temi kechon le nshün kemvu genyu Nkenkelo tanyü nyu dan dushvu lomvula, tsügenyu Levinyu le anyugun sunka dushvuo tanyü nyu dan thyü kenshün pe Npugü tsüshü.

¹⁸Tsünyeki Efraim, Manasseh, Issachar lo Zebulun tsipwen nyu keryü temi kechon le a-thyü kenshün lo kemvu genyu Nkenkelo Nga kegwa thyü lomvula. Raja Hezekiah le anyugun genyu hihontse kehithyü shü:

¹⁹“O Npugü, agun pvübon nyu Sunggigü, nkegwa gü nyu a-nyun aphu sen nrüshvu kebin dan kemu jü pe tsülo, anyugun le thyükenshün kethyü jvünyu a-nyu thyü nshün lomvu yatse-e.”

²⁰Npugü le Hezekiah kehi kenishü; a-le temi dan kemu jüshü lo anyugun nthyü nnyü mvulo.

²¹Tson-o jon tsenyü Jerusalem nyu kequen kebin temi dan le Kebuloshü kemvu Nga thyüo sherhün salo, lo Levinyu lo püshükeda nyu dan le khenyütsen anyugun kekvu aphu sen-o Npugü shwe shü.

²²Hezekiah le Levinyu dan le Npugü kerüshvu tho kethyü nyu ketsen pe gwasa tse keshü genyu anyugun shwe shü. Anyugun le jon tsenyü rope kerüshvu thyü pe Npugü, anyugun pvübon nyu Sunggigü tsü kethyü thyü pen kela siki,

²³anyugun le jon tsenyü nga niti tse rhilo. Tson-o anyugun le shekerhün thyü tsü ko nga lo.

²⁴Raja Hezekiah le methu tse 1,000 lo tanyü 7,000 tse pe temi dan no boshvu tyülo tse khipe tsü shü, lo a-hensin kedanyu dan ko methu tse kecha 1,000 lo tanyü 10,000 khi nipe anyugun tsüshü. Püshükedanyu kechon le a-thyü kenshün lo.

²⁵Tson-o aphu sherhünlo- Juda temi, püshükedanyu, Levinyu, tesozin keryü nyu, lo tesin le Israel lo Juda nyu dan nyu bin tinkela nyu metse.

²⁶Jerusalem nyida gü le shekerhün thyü, David nyugü Raja Solomon gwenkho siki hihontse thyü shwikemvu genyu.

²⁷Püshükeda nyu lo Levinyu dan le Npugü no jochü pe temi dan tsülo tse hishü. Sunggigü le tsangge bin-o anyugun kehi lolo.