Read Southern Rengma Naga 2 BINYOH 31 Bible Online

2 BINYOH 31 - Southern Rengma Naga bible

2 BINYOH 31

¹Nga pen kela siki Israel nyu temi aphu Juda nyida nmeme tse nyu gü tso kesen dan bose, teromen züo khikho pe terogi Asherah ketsü dan phünla, lo kershvubin lo rüshvu kehü bin dan nkela. Anyugun le Juda, Benjamin, Efraim lo Manasseh kazü aphu ka tsü hontse thyüla; tson-o anyugun aphu kaki rani ryüla.

²Raja Hezekiah le püshükeda nyu lo Levinyu penso nipe nmeme tse no a-tho thyü nilo. Hile rope kerüshvu, o kepfüshe kerüshvu khi keshü, Kerüshvuka nyu kerüshvu ka thatho kethyü, Npugü keshwe, lo Kerüshvuka nyu bin kecha cha ka chenkeno khikeshü.

³A-npfü a-senru dan nyu a-le lonyü lo khejetsen rope kerüshvu, Sabbath nyü kerüshvu, shyekeshün lo Nga kecha ka sen mvulo keshvu Npugü tejvü nyu kebin hontse khishü.

⁴Tsünyeki, raja gü le Jerusalem temi no püshükeda nyu lo Levinyu le hyulo kezü kho senryü tsü lotse zoshü, tson-o anyugun no anyugun gwenkho aphu khipe Npugü tejvü nyu kebin dan thyülo nrün genyu.

⁵Ahza gü khishü nyemhun, Israel nyu temi le anyugun shye kegwatsin, vainzu, oliv terzü, khuzü, lo low nyu hyukelo kecha dan jwe senryü, lo anyugun kebin aphu nme senryü.

⁶Juda nyida dan ka keyhun nyu aphu methu lo tanyü tseryü ka nme senryü lo anyugun le khikho pe Npugü anyugun sunggigü ketsü jwe kechon senryü.

⁷Shye shen gü ka jwe khishü so, lo tsüsiki shyezi ryüo khishü zin gun keryü khwe pe nthun la.

⁸Raja Hezekiah lo a-hensin kedanyu dan le mele tha dikho khishü layo tsü shwishüo Npugü shwe lo a-temi Israel nyu dan-e shwe shü.

⁹Raja gü le jwe hidan rüla pe püshükedanyu lo Levinyu ka zoshü,

¹⁰tsontsin püshükengun gü Azariah, Zadok tsipwen gü le a-ka zoshü, “Temi dan le anyugun jwe sen Kershvuka gü ki ryü bin kela genyu tyütsübu keho lo kechon rüche bin laso. Npugü le jochü pe a-temi dan tsü kela genyu agun le hi aphu hyulo laso.”

¹¹Raja gü le ahza shüo anyugun le Kershvuka khoka süsen ndolo,

¹²tson-o jwe lo jün tseryü ka nme tsü aphu pe kequenlo. Lo a-zan le Conaniah tse kethyü Levinyu nme no tsü kentsen gü thyü lo a-sikezen gü Shimei no a-keche gü thyü lo.

¹³Levinyu min tseryü no au hensin nyu tha thyü lotse shü: Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath, lo Benaiah. Hi aphu raja Hezekiah lo Püshükengun gü Azariah au kendo ka thyüshü.

¹⁴Imnah nyugü Kore Levinyu gü, Kershvuka nphozin khinrun kekhwe sokeda tsin gü no mele jwe pe Npugü ketsü lo kenjün pe anyugun ketsü kentsen gü thyü lo.

¹⁵Püshükeda nyu le kebin nyida kecha dan ka le, joketsin zo-o Levinyu kecha dan le hitho nyu a-keche shü: Ede, Miniamin, Jeshua, Shemaiah, Amariah, lo Shecaniah. Anyugun le ketyüketsü kenjün ketun kü pe anyugun pfünyu Levinyu le nyutho thyü bin yo tsüdan tsüshü,

¹⁶pfüphun rüchün mvuo. Anyugun le peche nyu chen shenryü nmvue tsü soki nyu khenyütsen Kershvuka gü nyu thatho thyü bin kehü keda keshe rüchün-o a-jün pe tsüshü.

¹⁷Püshükeda nyu le pfüphun rüchün-o thatho pe tsüshü lo Levinyu chen nki lo tsüso kela nyu le a-danda thyüo thatho pe tenyen shü.

¹⁸Anyugun nunyu, nyenyu, lo anyugun nngü kebin kecha dan zen-o zan thu kerhün la, lihi gwenkho ka-e kenshün tho thyü nrün ndo bin mvulo keshvu genyu.

¹⁹Lo pe Aaron tsipwen tenyen keshü nyida dan ka kebin Püshükeda nmvue nyida hidan hon senru chvükelo bin dan ka kebin nyu genyu khvu pfülo kegwa temi dan le püshükeda kami nyu peche nyu aphu lo Levinyu pfüphun ka a-zan thu kelo nyu ligü higü-e genyu ketyüketsü kenjün shü hü.

²⁰Juda kazü aphu nyu Raja Hezekiah le nyu le njü lo nyu le Npugü a-Sunggigü kenyü yo tsü thyü.

²¹A-le Kershvuka genyu lo tejvü gü then-o thyü keshü aphu genyu gwakenye lo, a-le Sunggigü jozen shü lo rühvuo thyü.