Read Southern Rengma Naga 2 BINYOH 35 Bible Online

2 BINYOH 35 - Southern Rengma Naga bible

2 BINYOH 35

¹Raja Josiah le Npugü kerühvu ka Jerusalem nyu Nkenkelo Nga lo; shye kerigü jonryü pezi nyü Nga gü genyu senru dushvulo.

²A-le püshükedanyu ju no Kershvuka nyu lotho thyü nrün pe tenyen shü lo thyü kegwa thyü lotse anyugun thyü kepeche shü.

³A-le Levinyu, lo Israel senkethyü nyu thyü kenshün pe Npugü tsükela dan kako jo hidan zoshü: “Kenshün Kejozenkelo Khinpha gü pe David nyugü Raja Solomon le thyü keshü Kershvuka gü nyu shülo. Hagun no tsü pen-o lika gü hika gü tse sin mvuso, ai hagun le Npugü hagun Sunggigü lo a-temi Israel nyu lothyü ti.

⁴Raja David lo a-nyugü Solomon au le pfüphun rüchün-o lotho pe hagun tenyen keshü hontse Kershvuka günyu hagun bin ka binlo,

⁵hagun peha le Israel nyu temi kami nme me kechelo nrün genyu hagun npfü temi ketsenlo.

⁶Hagun le NKenkelo Nga genyu tanyü lo tenyü dushvu ti. Tsügenyu ntsoka hagun thyükenshün lo lo hagun pfünyu Israel nyu no Npugü le pe Mosa tsükeshü thenlo nrün genyu kerüshvu dan ndolo.”

⁷Nkenkelo Nga gü ka temi dan no sen nrün genyu, Raja Josiah le a-npfü a-hon tanyü, tanyü nyu, tenyü bwe tse yie shenryü lo methu tse yie shen tse khishü.

⁸A-hensin kedanyu juka, temi dan, püshükedanyu lo Levinyu no sen nrün khishü. Lo Kershvuka günyu kedanyu- Püshükengun gü Hilkiah, Zechariah lo Jehiel tse le tanyü nyu lo tenyü bwe yie hvuo tsi tsero lo methu tse tsishen pe Nga ka kerüshvu thyü nrün genyu püshükedanyu dan tsüshü.

⁹Levinyu sharhi ju-Conaniah, Shemaiah lo a-sikezen gü Nethanel, Hashabiah, Jeiel, lo Jozabad tse le tanyü nyu lo tenyü bwe yie pvün lo methu tse tsipvün pe Levinyu no kerüshvu thyü lo tse khishü.

¹⁰Nkenkelo Nga genyu tha aphu ndolo ntsin, Raja gü le johokeshü hontse püshükedanyu lo Levinyu le anyugun bin ka bin lo.

¹¹Tanyü nyu lo tenyü dan dushvu kelo siki, Levinyu le tsüdan gi nila, lo püshükeda nyu le tezi gü kejen pe kershvubin nye shü.

¹²Tson-o anyugun le senru rope rüshvu nrün genyu kami mi thyüo temi dan kenjün shü, Mosa tejvü nyu zokeshü hontse anyugun no rüshvu lo nrün genyu.

¹³Levinyu le NKenkelo Nga genyu ro kethyü tsü pe mah so ge hun lo-o then kehü jvü hontse kerüshvu thyü kenshün tsü pe la keshe, keda lo ketse khun nyu nilo-o whütse pe temi dan kenjün shü.

¹⁴Tsonkela siki Levinyu le anyugun lo Aaron tsipwen püshükedanyu genyu ndolo, püshükedanyu dan le senru apentha lo rora kethyü thyükeshvu dan robin-o tsang nzün kebin genyu.

¹⁵Levinyu Asaph pfüphun ka lükethyü nyu dan le Raja David le zokeshü hontse anyugun tenyen keshü bin thyü keshü ka bin: Asaph, Heman, lo raja gü sidyükesha gü; Jehuthun.Kershvuka chonrha ka rikhun nyu le anyugun bin nken mvu, Levinyu le anyu genyu Nkenkelo Nga ndo shü kela genyu.

¹⁶Tson-o Raja Josiah le johokeshü hontse, tsünyü Npugü kerüshvu, Nkenkelo Nga, lo kershvubin gü ge rope kerüshvu aphu thyülo.

¹⁷Jon tsenyü Israel nyu le tsünyu kehü nyu aphu Nkenkelo lo Kebushükemvu Tensü Nga gü tsü thenlo.

¹⁸Sidyükesha gü Samuel gerho NKenkelo Nga pe hi hontse shwimvu. Himhundyü Raja nyu nme-e Nkenkelo Nga pe Raja Josiah, Püshükedanyu, Levinyu, Juda, Israel lo Jerusalem temi le Nga kethyü higü hontse mvu,

¹⁹Josiah le raja thyü kelo chen tseryüo tetse ka.

²⁰Raja Josiah le Kershvuka gü genyu tha hi aphu thyülo kela siki, Ijipt Raja Neco le a-rihü zen Eufrates züri ka Carchemish nyu kega titse ryü,

²¹ai Neco le jolo hi nipe Josiah tsüshü: “Ale teri thyü kebin higü le nge mvule, Juda Raja gü. Ale nzen terithyü titse ryü mvu, ai ashwikerüchün nyuzen kega titse bin nle, lo Sunggigü le ano whütse lo tse aka zo laso. Sunggigü le akipon, tsügenyu a ntsun nya, nmvu yatselo a-le n nke lati.”

²²Ai Josiah le terithyü titse rhilo la. Sunggigü le Raja Neco ge bin-o zokebin tsü a-le nyü mvula, tson-o a-joja kecha thyü pvülo-o Megiddo ketejon ki teribin nyu güla.

²³Terithyü kebin ka Ijipt nyu tholevü tsi le Raja Josiah shwela. A-le a-gonyu dan ka, “Azen tin lalo; ale jün sa laso!” tsonshü.

²⁴Anyugun le a-gari nyu apen shwi pe a-le zen kehü gari kecha günyu shülo-o a-zen Jerusalem ki ryü. A-le silao pe Rajanyu sika nyu sunla. Juda lo Jerusalem temi aphu a-kesi chechü.

²⁵Sidyükesha gü Jeremiah le raja Josiah chekechü lü nme thyüshü. Tsü le Israel nyu peche lo tenu-e lükethyü nyu le a-chekechüka lühigü kethyü no anyugun jvü thyü hü. Lü hile chekechü lüthu kequen kenjü nyu hyulo.

²⁶Josiah le thyü keshü aphu a-le Npugü kerüshvu, a-le tejvü gü zen kehü,

²⁷lo a-rüla kerika gü kenkhin keti aphu Israel lo Juda raja rüla nyu thu kü bin nyo.