Read Southern Rengma Naga 2 BINYOH 36 Bible Online

2 BINYOH 36 - Southern Rengma Naga bible

2 BINYOH 36

¹Juda temi dan le Josiah nyugü Joahaz kejü lo-o yün pe no Jerusalem nyu raja thyülo.

²Joahaz le a-keyhun chen nki kenshen ka Juda raja thyülo, lo a-le shyeshen Jerusalem nyu raja thyü.

³Ijipt raja Neco le a-ten pe dothyü lola, tson-o Juda nyu no rakagi kilogram 3,400 lo suna kilogram 34 tse pe khajana shü.

⁴Neco le Joahaz tsa gü Eliakim pe Juda raja thyüla lo a-zan tho kela pe Jehoiakim tsela. Neco le Joahaz zen Ijipt ki güla.

⁵Jehoiakim le a-keyhun chen nki pvün ka Juda raja thyülo, lo a-le chen tseryü nme Jerusalem nyu raja thyü. A-le Npugü a-Sunggigü mhundyü nyu kemu thyüla.

⁶Babilon nyu raja Nebuchadnezzar le Juda hüla, tson-o Jehoiakim tenlo-o tegiron pe phin zen Babilon ki güla.

⁷Nebuchadnezzar le Kershvuka nyu kenya peha pfü lola, lo sen gü Babilon ki a-rajaka nyu shübin.

⁸Jehoiakim le thyü keshü aphu, a-le kentsükenche lo kemu thyü kela sin-o Israel lo Juda raja dan rüla ka thu njü. A-nyugü Jehoiachin le a-sunka raja thyülo.

⁹Jehoiachin le a-keyhun chen tseryüo tetse ka Juda raja thyülo, lo a-le shyeshen-o jonryü Jerusalem nyu raja thyü. A-ko Npugü mhundyü nyu mula.

¹⁰Tsenbwe gwenkho le keryü ka raja Nebuchadnezzar le Jehoiachin tenlo, lo Kershvuka gü nyu kenya khipfüo Babilon ki güla. Tson-o Nebuchadnezzar le Jehoiachin a-nyo Zedekiah pe Juda lo Jerusalem raja thyü shü.

¹¹Zedekiah le a-keyhun chen nki nme ka Juda raja thyülo, lo a-le chen tseryü nme Jerusalem nyu raja thyü.

¹²A-le Npugü mhundyü nyu kemu thyüla lo tsenyo-o sidyükesha gü Jeremiah le Npugü jo gü kezo nyü mvula.

¹³Zedekiah le a-kemvu thyü pe a-no a-jozen titse Sunggigü zan nyu swe kebin gü raja Nebuchadnezzar ntsun sola. A-le a-nyun kelu lo-o Npugü, Israel nyu Sunggigü ki ryü mvuo a-nyun rü tinla.

¹⁴Tsünyeki Juda sharhinyu, püshükedanyu, lo temi dan le anyu hun kebin senye dan then-o teromen rüshvu, tson-o Npugü le a-npfü thyükenshün keshü Kershvuka gü nrhula.

¹⁵Npugü anyugun pvübon nyu Sunggigü le anyu lo Kershvuka gü nrho shü kenyü genyu sidyükesha nyu nipe a-temi dan no pütsülo lo tse zozin bin.

¹⁶Ai anyugun le Sunggigü jolonyu shwinyü, a-jo pe lihi kemvu thyüo a-sidyükeshanyu shwinyü, tsontseo kenkhin ki Npugü le a-temi dan ge a-nyunta ritsin lao nrhilo mvula.

¹⁷Tsügenyu Npugü le Babilon nyu raja zenryü anyugun whe. Raja gü le Kershvuka nyu-e selo dan dushvula. A-le nche püshü, peche tenu, kehonyu lo kesherhün nyu-e temi nme njün mvu.

¹⁸Babilon nyu raja gü le Kershvuka gü khin lo-o, tsünyu kenya, raja lo a-hensin kedanyu kenya aphu pfüo Babilon ki güla.

¹⁹A-le Kershvuka, nyida gü, lo tsünyu rajaka dan lo kenya aphu rola, lo nyida gü chwida borenla.

²⁰A-le rhün kebin nyu aphu zen Babilon ki güla, anyugun le tsüki a-lothyü lo a-tsipwen dan dothyü bin-o Persia nyu raja le sokeryü ti.

²¹Tson-o Npugü le sidyükesha gü Jeremiah ge bin-o nyu zoshü yo tsü thyü penla; “Temi dan ale Sabbath chen dan then mvu kela tsü kethun la nrün genyu kazü güno chen hentsenyü nrun bin ti.

²²Persia nyu Sirus le raja thyükelo chen keri gü ka, Npugü le a-le sidyükesha gü Jeremiah ka nyu zoshü yo tsü no ketsin thyü ryü. A-le Sirus thu keyhun pe no a-raja hensin lika hika-e jo higü swü tetso shülo tse thu pe nishü.

²³Hile Persia nyu raja gü Sirus johokeshü, “Npugü Tsang Sunggigü le akhipe kazü apentha so raja thyüshü, lo Juda kazü nyu Jerusalem ka a-genyu Kershvuka nme thyüshü lotse a tenyen shü laso. Tsügenyu ntsoka hagun senyu le Sunggigü temi yo aphu tsüki gun lolo, Npugü hagun Sunggigü no hagun zen hü nda.”