Read Southern Rengma Naga 2 BINYOH 5 Bible Online

2 BINYOH 5 - Southern Rengma Naga bible

2 BINYOH 5

¹Raja Solomon le Kershvuka nyu thatho aphu thyü penlo ntsin, a-pvü David le thyükenshün pe Npugü tsükela rakagi, suna lo kanyü kecha aphu pe Kershvuka kenya katsen günyu shüla.

²Tsüselo Raja Solomon le David nyida Zion nyu Npugü Kejozenkelo Khinpha gü pen gü Kershvuka nyu shüti tseo Israel nyu tsipwen lo pfüphun sharhinyu aphu ko pe Jerusalem nyu kequenlo.

³Anyugun aphu then nyu kebin nga gwenkho ka ryü kequenlo.

⁴Sharhinyu aphu ryü kequenlo ntsin Levinyu le Kejozenkelo Khinpha gü penso lo-o

⁵pen Kershvuka ki ryü. Püshükedanyu lo Levinyu tsele Npugü kehü phika gü lo tsünyu kanyü aphu sen Kershvuka kiryü.

⁶Raja Solomon lo Israel nyu temi aphu Kejozenkelo Khinpha mhundyü nyu tanyü lo methu kechon pe kerüshvu thyüo chonritsin-o swülo buhola.

⁷Tson-o püshükedanyu le Kejozenkelo Khinpha gü pen-o Kershvuka nyu yü gü Kenshüntsin Bin nyu cherub hvu sekin hensin nyu shüla.

⁸Au sekin sükhun pe Khinpha lo kepenvü hen lola.

⁹Kepenvü hvu te tsü ligü higü Kenshüntsin Bin khenpfü ka so-o hyu logwa, ai bin kecha nmeka bin-o hyumvu. (Nthu keti kepenvü le tsüka bin.)

¹⁰Kejozenkelo Khinpha gü nyu, Israel nyu le Ijipt nyu bin-o chwiryü kejü ka Npugü le temi dan zen Sinai ka Kejozenkelo Mosa le tso pon hvu pe keshü tsü nyeki thame ndi.

¹¹Püshükedanyu tsüka kebin aphu, a-le dan lihi ka bin-e a-npvü a-thyü kenshün külo. Lo Levinyu lükethyü nyu aphu Asaph, Heman, Jeduthun lo anyugun pfüphun temi aphu linen phinya sen hü. Levinyu le nphozin kershvubin khoka so-o cymbal lo harp sen hü, lo püshükedanyu tsio nki le shu sen-o anyugun zen hü. Lükethyü nyu le shu kekhun, cymbal lo lükhin kecha kenra to-o hihontse Npugü shwe-o lüthyü: “Npugü shwelo, a-le gwa kethyü genyu, Lo a-keso le kethonthen.” Püshükedanyu le Kershvuka nyu chwiryü ntsin whütse Npugü kehü nmhu keben kenshwe le süto tse lola, tson-o anyugun le kerüshvu tho thyü binlo shvula.