Read Southern Rengma Naga 2 BINYOH 7 Bible Online

2 BINYOH 7 - Southern Rengma Naga bible

2 BINYOH 7

¹Raja Solomon le kehithyü kheshü ntsin tsangge mah le tsüryüo kerüshvu thyü keshü tsü rola, lo Npugü kehü keben gü le Kershvuka gü sü lola.

²Keben gü le Kershvuka sü kela genyu püshükedanyu le tsünyu yülo mvula,

³Israel nyu le tsangge mah le tsükeryü lo keben le Kershvuka sülo kela hyu shüo tso pe kazü la kethyü so nkhün tsügü Sunggigü rüshvu lo a-kegwa lo a-le kethonthen so kehü genyu a-shwe.

⁴Tson-o Solomon lo temi aphu senru dushvu pe Npugü rüshvu.

⁵A-le methu 22,000 lo tanyü 120,000 dushvu pe kepfüshe kerüshvu thyü. Tson-o a-le lo temi dan aphu Kershvuka gü thyükenshün lo.

⁶Püshükedanyu le anyugun bin ka solo, lo Levinyu le so anyugun denzin ntsun-o Raja David le khikeshü lükhin dan sen Npugü shwe lüthyüo David le anyugun no thyü lotse keshü hontse, “A-keso le Kethonthen le,” tson. Temi aphu so kebin ka püshükeda nyu dan le shukhun shü.

⁷Solomon le kahun lvu Kershvuka mhundyü nyu kebin gü thyü kenshünlo, tson-o tsüka, apentha rope kerüshvu, shyeni pe kerüshvu, lo kepfüshe kerüshvu thyü keshü dan pe rora thyülo. A-le thyükeshü lazo kershvubin gü le tha hokeshü hi aphu pe rüshvu titse kethyü le sheritsin kela genyu.

⁸Solomon lo Israel nyu aphu jon tsenyü thennyu bin nga lo. Tesozin Hamath kazü kenchon ki lo tesinzin Ijipt terhi ki temi danda le ryü.

⁹Anyugun le jon tsenyü kershvubin thyükenshün lo, tson-o jon tsenyü bin sin-o ngalo jon kenkhin gü nyü anyugun le kehun kekhe jvü nme thyülo,

¹⁰lo tsüsinyü, shye tsenyü gü jon nki kenshen nyü Solomon le temi dan nipe ka ki shüla. Npugü le jochü pe Israel nyu, David, lo Solomon ketsü aphu genyu anyugun sherhün sala.

¹¹Raja Solomon le Kershvuka lo rajaka, a-le thyü titse ndo kebin aphu thyü pen lo kela siki,

¹²khejenyu Npugü le a-yhühyu thyüshü. Npugü le a-ka zoshü, “Ale nkehi nyülo laso, lo ale Kershvuka higü nyu rora thyü pe a ketsübin thyü titse keshü gü lolo laso,

¹³Lihi gwenkho ka-e ale tsangri shü mvula, nmvue tsekhvu nipe low tyü la, nmvue kenpen nipe atemi ge shüla-e,

¹⁴anyugun le serikemvu tha thyü kehü nyu rani a kiryüo kehithyü yatselo ale tsangge bin-o anyugun kehinyü shüti, tson-o anyu kemu jüshü lo anyu kazü thyü ngwa nishü ti.

¹⁵Ale Kershvuka higü nrio hinyu kehithyü keshü aphu nyü bin ti,

¹⁶tsünyu kethonthen arüshvu hüti tse ale kejülo lo thyükenshün lo kela genyu. Gwenkho aphu nyu ale tsü nri lo ntsen bin ti.

¹⁷Nle npvü David hontse ketsin thyüo a lothyü, a tejvü dan thyüzen lo ale johokeshü aphu thyü hü yatselo,

¹⁸ale npvü David ka a-nyenyu no a-zintse Israel nyu so gon hüti tse zoshwi keshü gü tsü ale then ti.

¹⁹Ai nle lo ntemi le ale pe hagun ketsü a tejvü lo a johokeshü thyü zen mvuo tero kecha rüshvu,

²⁰tson yatselo ale pe hagun tsükeshü kazü gü nyu hagun khipe shwe lati, lo a kershvubin thyü titse ale thyünshün kelo Kershvuka higü khe lati. Tson-o lika hika-e me no tsü shwi nyü lo nkhin lati.

²¹“Ntsoka Kershvuka gü rühvu sa bin nyo, ai tsü nken kegü nyu aphu a-dun thyüo, ‘Nyu genyu Npugü le kazü higü lo Kershvuka higü ge hihontse thyü layo?’ tse ketso ti.

²²Lo me le zo-o, ‘Anyugun le Npugü anyu Sunggigü, Ijipt ki anyu pvübon nyu zenchwi keryü gü khekela genyu yale. Anyugun le tero kecha then-o tsüdan rüshvu tinla. Tsügenyu Npugü le kenke kenmhü hi senryü anyugun ge shü laso.’ ”