Read Southern Rengma Naga EZRA 1 Bible Online

EZRA 1 - Southern Rengma Naga bible

EZRA 1

¹Persia Raja gü Sairus le raja thyü kelo chen keri gü ka, Npugü le a-le Jeremiah mün nyu zokeshü tsü no ketsin thyü ryü. A-le Sairus nyun thukeyhun pe no johokeshü hi thu lo-o a-raja lojvü aphu nyu swü tetso shü lotse nishwi shü:

²“Hile Persia nyu Raja gü Sairus johokeshü. Tsang Npugü Sunggigü le a lope kazü a-pentha so raja thyüshü lo ano Juda kazü nyu Jerusalem ka a-genyu Kershvuka nme thyü lotse atenyen shü laso.

³Npugü no hagun a-temi aphu zen hülo nda. Hagun le Jerusalem nyu gü, Jerusalem nyu a-rüshvu kehü gü Npugü, Israel nyu Sunggigü Kershvuka gü thyü ketsü niti.

⁴Me rünyi ki kehü a-temi ligü higü rani nrün genyu keche senmvulo shvubin yatselo, anyugun kajon nyu no keche shüti. Anyugun no rakagi, suna, kanyü lo senru pe tsüdan tsü shüti, lo jwe pe Jerusalem nyu Sunggigü kershvue hoshü mvulo shvu.”

⁵Tsüselo Juda lo Benjamin tsipwen pfüphun pe thyü kebin dan, püshükedanyu, Levinyu lo kechanyu ligü higü Sunggigü le anyun thukeyhun keshü dan le gü Jerusalem nyu Npugü Kershvuka gü thyü ketsüni titse ndalo.

⁶Lo anyugun kajon nyu aphu tha kechon pe anyu keche shü: rakagi, suna, lalü, senru lo thamin ketsen kechae lo Kershvuka gü genyu ko tha hoshü.

⁷Sairus le Nebuchadnezzar gwenkho ka Jerusalem Kershvuka nyu khisen gü a-terodan kanyu shükela khun honpen dan ko rani shü.

⁸A-le tsüdan khipe Raja gü kenyaka nyu kedagü Mithredath ben ka shüo tsü gü le swü pe Juda Ahng gü Sheshbazzar tsüshü,

⁹tsüdan le hi: kerüshvu ka kesen suna khun — 30 rakagi khun — 1,000 khun kecha — 29 suna khun keshe — 30 rakagi khun keshe — 410 lalü kecha — 1,000

¹¹Aphu kesin le suna lo rakagi khun 5400 lo kanyü kecha, Sheshbazzar lo me rünyi ki kehü kecha dan le Babilon ki sen Jerusalem nyu gü.