Read Southern Rengma Naga EZRA 3 Bible Online

EZRA 3 - Southern Rengma Naga bible

EZRA 3

¹Shye tsenyü gü tsüle Israel nyu temi aphu anyu rünyi nyu bin lola. Tson-o anyu aphu Jerusalem nyu kequenlo,

²Jehozadak nyugü Joshua lo atsasikezen püshükeda dan, lo Shealtiel nyugü Zerubbabel lo a-shvunye dan tse le Israel nyu Sunggigü kershvubin thyü ketsü nilo, tson-o Sunggigü temi gü Mosa Tejvü Lesü nyu thyülo tse keshü hontse anyugun le rora dan ro nrün genyu.

³Me kazü ki dothyü tseo nikeryü dan le kazü tsügü nyu yhun kebin dan n shvu bin-e himhundyü bin ka kershvubin thyünilo. Tsüle anyu le lonyü lo kheje rora thyüzin kehü tsü pe tsü ge ro niso.

⁴Anyugun le then nrün jvü günyu kebin hontse then nyu Nga gü rühvulo; khenyütsen tsünyü thyümvulo keshvu rora dan thyülo;

⁵lo tsünyeki apentha pe rola kehü then nrün jvü nyu rora, lo Shye keshün Nga, lo kehun-o Npugü rüshvu kehü kecha aphu lo a-kendo nyu tha khipe Npugü ketsü aphu thyülo.

⁶Temi dan le Kershvuka gü thyü ketsü niso mvuzun yatse-e, anyu le shye tsenyü gü jon kerinyü rora dan rope Npugü tsü sola.

⁷Temi dan le pisa khishüo pe tso keyhenyu lo tesen mistrinyu chünthyü lo ketyü ketsü, vainzu, lo oliv ter khishüo nipe Ture lo Sidon nyida dan ka Lebanon ge Sedar sen kelu, tsü sen-o zida nyu tse Joppa ki ryü nrün genyu. Hi aphu Persianyu raja gü Sairus hokum lolo-o thyü.

⁸Anyugun le rani Jerusalem Kershvuka bin nyu ryü kelosiki chenhvu gü shyehvu ka thatho thyüso. Zerubbabel, Joshua lo anyu kazünyu temi a-sen dan, Püshükedanyu, Levinyu me rünyi ki dothyü tseo rani Jerusalem ki keryü nyu aphu kengüo thatho gü thyü. Levinyu chen nki lo tsü so nyu aphu no Kershvuka gü thyü ketsüni kethyü tho kethyü nyu dan shwi.

⁹Jeshua Levinyu gü, a-nyudan lo a-shvunye, Kadmiel lo a-nyudan (Hodaviah pfüphun) tse ko tsüdan zen kengüo Kershvuka gü thyüni kethyü shwi. (Henadad pfüphun Levinyu dan le anyugun keche shü.)

¹⁰Temi dan le Kershvuka phasin gü thyüso ntsin püshükeda nyu le anyugun mirün ketseyho ben lo shu tezen sen tse anyu bin ka binlo Asaph pfüphun Levinyu dan le cymbals sen solo. Anyugun le Raja David gwenkho ka thyüzen keryü hontse Npugü shwe shü.

¹¹Anyugun le lüthyü Npugü shweo korüs gü thyü nini. “Npugü le gwa, lo a-le Israel nyu keso tsüle kethonthen le.” Tsonshüo temi aphu a-kekvu aphu sen Npugü shweo sen shü, Npugü Kershvuka phasin thyüso kela genyu.

¹²Püshükedanyu, Levinyu, lo pfüphun pe thyü kebin Püshünyu Kershvuka kerigü hyukela nyu kechon le Kershvuka phasin pe shükelo shwishüo chü solo. Ai tsünyu kebin kechanyu dan le a-shekerhün genyu nra sen shü.

¹³Tson-o temi nme-e shekerhün khwe lo kechü kenra shakekho lomvu la, anyugun kenra khwe le tetso sao nithen ki nyülo kela genyu.