Read Southern Rengma Naga EZRA 4 Bible Online

EZRA 4 - Southern Rengma Naga bible

EZRA 4

¹Juda lo Benjamin shwikerüchün nyu le, me kazü ki bin tinlao nikeryü dan le, Israel nyu Sunggigü, Npugü Kershvuka gü thyüni bin nle tse kethyü nyülo.

²Tsügenyu anyugun le gü Zerubbabel lo pfüphun pe dan shwishüo anyugun ka zoshü, “Agun no hagun zen kengüo Kershvuka gü thyü ta. Agun ko hagun le rüshvu kehü Sunggigü tsü rüshvu hü nle, lo Assiria nyu raja gü Esarhaddon le agun nipe hinyu keshü gerho agun ko rora thyü pe a-tsü hü nle,” tsonshü.

³Zerubbabel, Joshua, lo pfüphun pe ju le anyu ka zoshü,“ Npugü agun Sunggigü Kershvuka kethyü genyu hagun keche sen mvue gwa le, Persianyu Raja gü Sairus le johope agun tsü keshü hontse agun le agun npfü tsü thyü tile.”

⁴Tsontsin tsünyu yhun kebin dan le Juda nyu no thatho thyü mvula nrün genyu anyu nyun thyü nkun lo anyugun ntsun sola.

⁵Anyugun le Persia nyu kedanyu no Juda nyu ntsun nrün genyu jvü jwe kope tsüdan tsü. Anyugun le Sairus raja gwenkho ka gü Darius raja gwenkho keti hihontse thyü.

⁶Ahasurus le raja thyülo terika, Juda lo Jerusalem nyu yhun kebin shwikerüchün nyu dan le anyugun ntsun-o lesü thu senryü.

⁷Lo Persia raja Artaxerxes gwünkho ka, Bishlam, Miothredah, Tabeel, lo tsüdan zenkengü kehü dan le lesü nme thu nishü. Aramic khwe ki lesü tsügü thushü, tson-o swüo zokela shü.

⁸Ahng gü Rehun lo kazüsakethü tsügü nyu kethu gü Shimshai au ko Jerusalem rüla hihontse thushü:

⁹“Ahng gü Rehun lo kazüsakethü gü nyu kethu gü Shimshai lo au zenkengü kehü, kerathü nyu lo kedanyu kecha aphu, nduka Erech, Babilon, lo Elam kazü Susa nyu bin kehü nyu dan,

¹⁰lo Ashurbanipal keda lo kekvu gü le anyugun kanyu zenryü Samaria nyida gü lo Eufrates nkhünzin kazü sakethü gü nyu lika hika kebin dan ki keshü.”

¹¹Lesü gü nyu hi thushü: “Eufrates nkhünzin kebin dan le pe Raja Artaxerxes tsü keshü.

¹²“Agun le Raja gü nno n lojvü kecha ki kehü Juda nyu dan le hikiryü Jerusalem nyu bin lo njüo serikemvu kekevü nyida gü tsü thyüni kebin shalo nyü. Anyugun le chwida gü thyüni bin laso lo whütse tsü thyüpen kelai le.

¹³Raja gü, nyida higü thyüni lo-o chwida khwenpen lolo, temi dan le khajana shümvu lao raja khajana le rhokvu lati.

¹⁴Agun le Raja gü hensin kebin genyu, hihontse thyükela hyunyü mvu, tsügenyu agun le zoshü kebin gü le

¹⁵nno nbon nyu le thu pe bin kenjü dan füshwi lotse ahza shülo. Tsonyatselo, ndukanyu nyida higü hile a-zintse kevü lo kenjün kethyü pe Raja nyu lo kazüsakethü so kekvu kesen nyu tsü kehü nle hyu loti. A-zintse a-temi dan le ketsenlo rü. Higenyu nyida gü nke lale.

¹⁶Tsügenyu nyida higü thyünilo lo a-chwida thyüpenlo yatselo, Raja gü nled Eufrates nkhünzin kazüsakethü gü hi ketsen lohola tsentsü tse agun le rüchün bin nle.”

¹⁷Raja gü le anyugun jokeni kethyü hi nishü: “Ahng Rehun, kazü sakethü gü nyu kethu Shimshai lo au zenkengüo yhun kehü dan kelu shü le.

¹⁸“Hagun le nikeshü lesü gü tsü swüshü lo jokela pe azenshü laso.

¹⁹Ale ahza shüo shwikegwa thyü kegun ka, ketsin ndukanyu Jerusalem kekvu kesen rajanyu ju le n ntsun-o ketekhi lo kevükeben shü kehü hyulo laso.

²⁰Raja kvu sa sa kethyü le tsünyu raja thyüo Eufrates nkhünzin kazü sakethü aphu so kekvu sen lo khajana shvulo hü.

²¹Tsügenyu akipon johoshü pe anyugun tsü kemvuthen no nyida gü thyüni nya lotse ahza pe anyu tsü shülo.

²²Whütse hi thyü shülo, agenyu gwakemvu tho thyüsin shü lamvu nrün genyu.”

²³Artaxerxes ka keryü lesü higü swü pe Rehun, Shimshai lo au zenkengü kehü dan zenshü ntsin, anyugun le whütse Jerusalem kigü Judanyu dan kemvu thyüo no nyida gü thyüni nya lotse khinla.

²⁴Kershvuka thyü kebin tho gü khinla, tson-o tsü le matse bin-o Persia Raja Darius le Raja thyükelo chen hvu gü ti.