Read Southern Rengma Naga EZRA 5 Bible Online

EZRA 5 - Southern Rengma Naga bible

EZRA 5

¹Tsügwünkho ka sidyükeshanyu mihvu, Haggai, lo Iddo nyugü Zechariah au le Israel nyu Sunggigü zan sen-o Juda lo Jerusalem nyu yhun kebin Juda nyu ka tha zoso.

²Shealtiel nyugü Zerubbabel lo Jehozadak nyugü Joshua tsele au jolo nyülo njüo Jerusalem nyu Kershvuka gü thyüni so, lo sidyükesha hvu le au keche shü.

³Tsüselo Eufrates nkhünzin ahng gü Tattenai, Shethar, Bozenai lo au pfünyu kedanyu dan le whütse Jerusalem nyu ryüo: “Segü le hagun no Kershvuka higü thyü lo tsünyu kanyü thyü lotse shüla, zoshülo?” tsonso.

⁴Anyugun le senyu le kecheo Kershvuka gü thyü bin yo, tsüdan zan ko ketsoshü.

⁵Ai Sunggigü le Judanyu sharhi dan shwi kebin genyu, Persia nyu kedanyu jule lesü thu pe Darius tsüshüo tsü kenikeshü hyulo kemvuthen thame thyümvu letse rhilo la.

⁶Anyu le nipe Raja gü tesha keshü le hi:

⁷“Raja Darius no kebwe nyu bin-o kekvu senlo.

⁸“Raja gü no shamvu lo keshvu gü le agun le Juda kazüsakethü ki gü laryü tso kedada pe Sunggigü keda gü Kershvuka thyünio tesen kasin pe tsünyu shü kebin hyulo le.

⁹“Tson-o agun le temi dan sharhinyu ka segü le kekvu pe anyugun tsüshüo Kershvuka gü lo tsünyu kanyü thyü bin yo agun ka zoshü lotse ketso.

¹⁰Thatho higü nyu senyu le sharhi thyü bin yo nka zoshü nrün genyu agun le anyugun zan ko ketso shü.

¹¹“Tsüka anyu le zonikeshü le, ‘Agun le tsang lo kazü Sunggigü gonyu dan le, lo agun le chen kethon gükela ka Israel nyu raja kekvu nyu nme le tsü lo tsünyu kanyü thyükeshü Kershvuka gü tsü thyüni bin nle.

¹²Agun bon nyu le Tsangge kebin Sunggigü no anyugun ge a-nyunta lao Chaldea nyu raja nme Babilon ka Nebuchadnezzar no anyu so kvulo la. Tson-o Kershvuka gü nkela lo temi dan tenzen-o Babilon ki dothyü güla.

¹³Tsontseo Babilon nyu Raja gü Sairus le raja thyü kelo chen kerigü ka Sairus le Kershvuka gü thyünilo lo tse ahza hoshü.

¹⁴A-le Nebuchadnezzar le Jerusalem Kershvuka günyu khilo lao sen gü Babilon ki kershvuka günyu shü kenjü suna lo Kershvuka nyu lalü dan ranishü la. Sairus le lalü hidan pe a-le kejü pe Juda ahng thyü keshü gü Shashbazzar ben ka shü.

¹⁵Raja gü le anyugun no tsü khi sen-o Jerusalem Kershvuka gü ki niryüo nduka bin nyu Kershvuka gü thyülo lotse zoshü.

¹⁶Tson-o Sheshbazzar le ryüo tsügü phasin dan pe shülo; tsü gerho ryü ntsoka keti ka gü thyü bin, ai Kershvuka gü thyüpen lo mvuzun.’

¹⁷“Tsügenyu, Raja gü le a-kendo yatselo Sairus le Jerusalem nyu Kershvuka higü thyüni lotse ahza hoshü le nmvuyo Raja gü le lesü thu pe bin kenjü dan füshwio, tha higü genyu n kerüchün gü pe agun tesha shülo.”