Read Southern Rengma Naga EZRA 6 Bible Online

EZRA 6 - Southern Rengma Naga bible

EZRA 6

¹Tson-o Darius Raja gü le Babilon nyu raja gü le lesü thu pe bin kenjü dan füshwi lo tse ahza hoshü.

²Ai Media kazüsakethü nyu Ecbatana nyida gü ka hidan hi thu kenjü hyulo:

³“Sairus le Raja thyükelo chen kerigü ka, Jerusalem nyu Kershvuka gü thyüni lo-o tsünyu rora lo rope kershvubin nme thyülo lotse johoshü. Kershvuka gü ketetso no meter nkio tsenyü lo kegon no meter nkio tsenyü thyüti.

⁴A-kehü le tesen tson me pe tso tsonshen soka shüshü tseti. Lo kenke aphu raja kenya kanyu khipe a-min thyü lati.

⁵Tsünyeki Raja Nebuchadnezzar le Jerusalem nyu sen Babilon ki ryükela suna lo rakagi lalü tsü aphu rani pe Jerusalem Kershvuka günyu a-bin ka shüni lati.”

⁶Tsüselo Darius le anyu jokeni keshü hi nishü: “Pe Eufrates nkhünzin ahng gü Tattenai, Shethar Bozenai lo hai zen kehü Eufrates nkhünzin kedanyu tsü shü le. “Kershvuka gü khoka bin nya

⁷lo tsü kethyü ketekhi nyalo. Juda ahng gü lo Judanyu sharhi dan no himhundyü bin ka Sunggigü Kershvuka gü thyünilo.

⁸Ale hagun no anyu kecheo tsü thyünilo lotse johoshü bin nle. Anyugun le nkekela tsü Eufrates nkhünzin khajana hyukelo pe thyü lati, tsügenyu thatho gü ketekhila nya.

⁹Khenyütsen Jerusalem nyu püshükedanyu le nyu sen mvulo shvu letse hagun ka zoshü yo pe tsümvukela thyü nya: methu tsebwe, tanyü nmvue tanyü nyu rope Tsangge kebin Sunggigü kishü, nmvue, thoshe, tsi, vainzu nmvue oliv ter.

¹⁰Hihontse shüo anyugun no Tsangge kebin Sunggigü le lolo kekü rora thyü pe a-rüshvuo a-jochü hipe age lo anyenyu ge shüti.

¹¹Ale zosin shü kebin gü le ligü higü ahza higü zenmvu yatselo a-kanyu kasin nme rholo-o a-rasü pe a-jenphe la. Lo a-ka boren pe kerhu kequen kenjü thyü lalo.

¹²Jerusalem pe a-kershvubin thyü titse kejü kelo Sunggigü no raja, nmvue senye ligü higü johokeshü hi bokekhün lo tsünyu Kershvuka gü nkela titse ndo kethyü gü khipe shwe lalo. Ale Dairus, ale ahza higü khishü bin nle. Tsü then ti.”

¹³Tson-o ahng gü Tattenai, Shethar Bozenai lo au pfünyu kedanyu dan le Raja gü le johokeshü hontse thyüshü.

¹⁴Judanyu sharhi dan le Kershvuka gü thyü nmhelo, sidyükesha Haggai lo Zechariah au le anyugun nyun thyü peche shü. Israel nyu Sunggigü lo Persia nyu raja Sairus, Darius lo Artaxerxes tse le johokeshü hontse anyugun le Kershvuka gü thyü penlo.

¹⁵Anyugun le Darius le Raja thyükelo chen tsero gü Adar shye jonshen nyü Kershvuka gü thyü penlo.

¹⁶Tson-o Israel nyu temi- püshükedanyu, Levinyu, lo me kazü ki dothyü hüo ranikeryü nyu aphu shekerhün thyü Kershvuka gü thyükenshün lo.

¹⁷Thyükenshün genyu anyu le methutse tsime, tanyü tsihvu, lo tanyü nyu tsizi tse pe rora thyüshü lo tsipwen nme ka nmeme tseo tenyü tseryü kenyhun pe kemu ro thyü shü.

¹⁸Anyugun le Mosa lesü nyu thu kenjü hontse Jerusalem Kershvuka nyu thatho thyü nrün genyu püshükedanyu lo Levinyu ko tse pe anyugun tho ka shülo.

¹⁹Tsüsigü chen shye kerigü jonryü nyü me kazü ki dothyü hüo ranikeryü temi dan le Nkenkela Nga lo.

²⁰Püshükedanyu lo Levinyu aphu anyugun npfü anyu thyükenshün lo-o nshün külo. Levinyu le ranikeryü temi aphu genyu, püshükedanyu, lo anyu npfü anyu genyue rora kethyü senru dan dushvulo.

²¹Me dothyü tseo rani keryü nyu aphu, lo kazü tsü gü nyu yhun kebin tero kerüshvu temi dan tson khekela nyu aphu lo Israel nyu Npugü Sunggigü rüshvu titse keryü nyu le rora kethyü thyü tsü tyüla.

²²Jon tsenyü anyugun le shekerhün thyüo kebu no shükemvu Tensü ketyü Nga tsü thyülo. Anyugun aphu shekerhün thyü, Npugü le Assiria nyu raja gü thyüpe no anyugun shwi a-kenyü lo no Israel nyu Sunggigü Kershvuka kethyü ka anyu che keshü genyu.