Read Southern Rengma Naga EZRA 7 Bible Online

EZRA 7 - Southern Rengma Naga bible

EZRA 7

¹Chen kethon siki, Artaxerxes le Persia Raja thyü kebin ka a-zan le Ezra tse kethyü nme le tsünyu bin. A-pvübon nyu swü gü püshükengun gü Aaron keti le hihontse: Ezra le Seraiah nyugü, Azariah nyu, Hilkiah nyu,

²Shallum nyu, Zadok nyu, Ahitub nyu,

³Amariah nyu, Azariah nyu, Meraioth nyu,

⁴Zerahiah nyu, Uzzi nyu, Bukki nyu,

⁵Abishua nyu, Phinehas nyu, Eleazar nyu, Aaron nyu.

⁶Ezra le lesü keshatsin nyu nme, tson-o Npugü Israel nyu Sunggigü le pe Mosa tsükeshü Tejvü gü tsü shasa bin. Ezra le Npugü a-Sunggigü jochü le a-ge kebin genyu raja gü le a-kehi aphu khipe a-tsü shü. Artaxerxes le Raja thyükelo chen tsenyü gü ka Ezra le Babilon ki Israel nyu dan me, tsünyu püshükedanyu, Levinyu, Kershvuka nyu lü kethyünyu, Kershvuka rikhun nyu lo thatho kethyü nyu tse zen Jerusalem kiryü.

⁸Anyugun le shye kerigü jon kerinyü Babilon nyu tsonchü shü, lo Sunggigü keche sen shye pvün gü jon keri nyü Jerusalem nyu ryülo.

¹⁰Ezra le a-keyhun sen-o Npugü tejvü gü swü, tsü thyü zen, lo tsünyu tejvü lo then mvulo keshvu pe Israel nyu temi sen thyü.

¹¹Artaxerxes le lesü higü pe Ezra, püshükeda lo lesükeshatsin, Npugü le tejvü gü lo joho pe Israel nyu tsü keshü gü shasa kebin gü tsüshü:

¹²“Raja gü Artaxerxes le pe püshükeda, Tsangge kebin Sunggigü tejvü gü lesü shasa kebin gü Ezra tsü shü.

¹³“A Raja lojvü nyu Israel nyu temi, püshükedanyu, Levinyu lo gü nyü kebin nyu aphu no nzen-o Jerusalem kigü logwa tse johoshü bin nle.

¹⁴Ale, ahensin kedanyu mitsenyü dan zenkengüo, nno Jerusalem lo Judanyu le dihontse ale ntenyen keshü n Sunggigü tejvü gü tsü thyüzen bin yo shwishü lotse nnishü bin nle.

¹⁵Nle, ale lo ahensin kedanyu dan le suna lo rakagi khipe Israel nyu Sunggigü, a-Kershvuka le Jerusalem nyu kebin gü tsü shünyü kebin dan sen gü ti.

¹⁶Lo nle Babilon kazüsakethü gü nyu Israel nyu temi lo a-nyu püshükeda nyu le khipe Jerusalem nyu a-nyu Sunggigü Kershvuka gü genyu shvukelo rakagi lo suna tsüko aphu sen gü ti.

¹⁷“Nle petsüsa tse pisa hipe methutse, tanyü, tanyünyu, shye,lo vainzu hei lo-o Jerusalem nyu Kershvuka nyu kershvubin ge pe rüshvulo.

¹⁸Lo nle rakagi lo suna nsen kelo dan tsü hagun Sunggigü kendo hontse nle lo hagun temi le pe nyuthyü nyüyo thyülo.

¹⁹Kershvuka gü nyu lotho kethyü ka sen nrün lalü pe ntsü keshü tsü aphu nle pe Jerusalem nyu Sunggigü mhundyü ka shüti.

²⁰Lo tsünye ki Kershvuka genyu nle sen mvulo keshvu lihie raja kenya ka gü nyu hyulo gwa le.

²¹“Ale Eufrates kazü sakethü gü ka kenya kanyu kedanyu aphu no Ezra, püshükeda, Tsangge kebin Sunggigü tejvü gü nyu lesü keshatsin gü le lihi hie pe tsü whü shülo tse johoshü bin nle,

²²rakagi kilogram 3,400, tho kilogram 10,000, vainzu liter 2,000, oliv ter liter 2,000 lo tsi senmvulo keshvu kho.

²³Hagun le petsüsa tse Tsangge kebin Sunggigü le a-Kershvuka genyu senmvulo keshvu lihie pe tsüshü mvu loshvu, tson-o a-no age nmvue asiki raja thyü nrün nyu ge thame kae a-nyunta kemvu thyülo.

²⁴Hagun no püshükedanyu, Levinyu, lükethyü nyu, rikhun nyu, thatho kethyü nyu nmvue Kershvuka higü genyu thatho kethyü nyu nme ka khajana shvulo nya lotse shübin nle.

²⁵“Ezra, nle n Sunggigü le pe nketsü kensü gütsü sen-o Eufrates nkhünzin n Sunggigü tejvü gü then-o yhun kehü temi aphu ketsen nrün genyu kekvu sen lo mejün kerathünyu kejülo. Nle tejvü tsügü pe shakemvu nyu ligü higü senthyü shü.

²⁶Ligü higü n Sunggigü tejvü gü zenmvu nmvue raja tejvü gü zenmvu lo whütse shaja pe a-tsü ti: kesi, nmvue no me kazü ki tinkela nmvue a-hon khilola nmvue dothyü lati.”

²⁷Ezra le zoshü, “Npugü, agun pvübon nyu Sunggigü shwe! A-le Raja gü thyü pe no hihontse Jerusalem nyu Npugü Kershvuka gü rühvu nyü shü.

²⁸Sunggigü shwikenjün nyu ale raja gü, a-hensin kedanyu, lo a-hensin kekvu kedanyu aphu sopfülo laso; Npugü a Sunggigü le kepeche pe atsü shü, tson-o ale Israel nyu pfüphun pe thyü kebin kechon nthon pe azen-o raniryü laso.”