Read Southern Rengma Naga EZRA 8 Bible Online

EZRA 8 - Southern Rengma Naga bible

EZRA 8

¹Hile Babilon ki me dothyü tinlao Artaxerxes le raja thyü kebin ka Ezra zen rani Jerusalem nyu keryü pfüphun pe dan:

²Phinehas pfüphun ka, Gershom Ithamar pfüphun ka, Daniel David pfüphun ka, Shecaniah nyugü Hattush Parosh pfüphun ka, Zechariah lo a-pfüphun ka temi 150 (anyu pvübon nyu rüla nyu thu bin.) Pahath Moab pfüphun ka, Zarahiah nyugü Eliehoenai le temi 200 zen ryü Zattu pfüphun ka, Jahaziel nyugü Shecanih le temi 300 zen ryü Adin pfüphun ka, Jonathan nyugü Ebed le temi 50 zen ryü Elam pfüphun ka, Athaliah nyugü Jeshaiah le temi 70 zen ryü Shephatiah pfüphun ka Michael nyugü Zebadiah le temi 80 zen ryü Jaob pfüphun ka Jehiel nyugü Obadiah le temi 218 zen ryü Bani pfüphun ka, Josiphiah nyugü Shelmith le temi 160 zen ryü Bebai pfüphun ka, Bebai nyugü Zechariah le temi 28 zen ryü Azgad pfüphun ka Hakkatan nyugü Johanan le temi 110 zen ryü Adonikam pfüphun ka, Eliphelet, Jeuel, Shemaiah tse le temi 60 zen ryü (kenkhin ki anyu l(...)

¹⁵Ale aphu kope Ahava rünyi nyu gü kebin zünyetson gü nyu kequenlo lo agun le jonshen tsüka nsen. Ale tsüdan nyu Püshükedanyu le bin ai Levinyu kendi hyulo.

¹⁶Tsüselo ale me nipe sharhinyu mi tekü: Eliezer, Ariel, Shemaiah, Elnathan, Jarib, Elnathan, Nathan, Zechariah, Meshullam, lo senkethyü nyu mihvu, Joiarib lope Elnathan au tse koshü.

¹⁷Ale anyugun nipe Casiphia ka temi dan pe thyü kebin gü Iddo kishü, a-le, a-zenkengü kehünyu, lo Kershvuka nyu thatho thyü kehünyu tse no temi nipe agun ki shüo Kershvuka gü nyu Sunggigü lotho thyü nrün genyu.

¹⁸Sunggigü shwikenjün nyu anyugun le thathyü lokekü Mahli pfüphun ka Levinyu nme Sherebiah lo a-nyu peche tseryüo tetse lo a-tsasikezen nyu dan le a-zen ryü.

¹⁹Anyugun le Merari pfüphun ka Hashabiah lo Jeshaiah au ko no au shvunye temi nki zenryü.

²⁰Tsünyeki, Raja David lo a-hensin kedanyu le n Levinyu keche lotse anyu pvübon nyu tenyen keshü Kershvuka nyu thatho kethyü nyu temi 220 le ryü. Anyu aphu zan thu küshü.

²¹Tsüka Ahava zünyetson ka ale agun aphu Sunggigü mhundyü nyu nyen-o agun thyü ketsenyo lo agun kenjwen nyu a-no tsontsin, agun, agun nyenyu lo agun hon aphu ntsen shü lotse a-ka hilo tse ahza hoshü.

²²Ale raja gü no keru shüpahü nipe agun kenjwen tson nyu shwikerüchün nyu ligü higü ben ka agun rikhun shülo tse hi kejala, ale agun Sunggigü le ligü higü a-tenyen kehü nyu jochü pe tsühü, ai a-le ligü higü a-kipon rani tinkela nyu ge a-kenyü hümvu lo shaja pe tsünyu tsühü nle tse zoshü kela genyu.

²³Tsügenyu agun le Nyen-o Sunggigü no agun ntsenlo lo kehikeni shü lotse kehithyü.

²⁴Püshükeda sharhinyu dan nyu ale Sherabiah, Hashabiah lo kecha min tseryü kejülo.

²⁵Tson-o ale rakagi, suna, lo lalü dan, Raja gü, a-tsonketsin nyu, a-hensin kedanyu, lo Israel nyu temi le Kershvuka gü genyu senlo tse keshü dan tsü ale pe püshükedanyu dan tsüla.

²⁶Ale pe anyugun ketsü le hi: rakagi - kilogram 22,000 rakagi lalü tsi -kilogram 70 suna - kilogram 3,400 suna khun 20- kilogram 8:4 lazo khun kegwa 2, suna khun au min kenme

²⁸Ale anyugun ka zoshü, “Hagun le Npugü hagun pvübon nyu Sunggigü mhundyü nyu nshün kethyü hontse a-kenyü ka hokeshü rakagi lo suna lalü hidan aphu nshün.

²⁹Hagun le gü Kershvuka gü tilo kemvuthen ntsen kegwa thyülo. Tsüki püshükedanyu katsen ka kensu süo pe püshükeda sharhinyu, Levinyu, lo Jerusalem nyu Israel sharhinyu ben ka shüshü lo.”

³⁰Tson-o püshükedanyu, lo Levinyu le rakagi, suna lo lalü dan sen gü Jerusalem ki Kershvuka kanyu shü titse khilo ti.

³¹Agun le Jerusalem ki gü titse Ahava zünyetson nken keshü tsü le shye kerigü jonryü kenyhun nyü. Agun Sunggigü le agun zen hü, tsügenyu agun kenjwen ka shwikerüchün nyu le agun whe lo tsonjwe kethyü nyu agun ntsen hü.

³²Agun le Jerusalem tilo-o jonshen rüyü lo.

³³Tson-o jonzinyü agun le Kershvuka kigü rakagi, suna, lo lalü dan kensu sü pe Uriah nyugü püshükeda gü Meremoth ben ka shüla. Phinehas nyugü Eleazar lo Levinyu mihvu, Jeshua nyugü Jozabad lo Binnui nyugü Noadiah tse le a-zen bin.

³⁴Nmeme tse swü lo kensu süo tsü gwünkho ka thu pen pe bin la.

³⁵Me kazü ki tinlao keryü nyu aphu rope kerüshvu rora thyü pe Israel nyu Sunggigü ki keshü senryü. Anyugun le Israel nyu aphu genyu methutse tseryü kenyhun pe rüshvu, tanyütse 92 lo tanyünyu 77; anyugun le tenyü tseryü kenyhun kope kemu nyu anyugun thyükenshün kerüshvu thyü. Senru hi aphu pe rora thyüo rope Npugü kishü.

³⁶Anyu le Raja gü le pe anyugun tsü keshü lesü gü ko khipe Eufrates nkhünzin kazüsakethü günyu ahng ju lo kedanyu dan tsüshü, tsüselo tsü dan le temi dan lo Kershvuka nyu kerüshvu kae anyu keche shü.