Read Southern Rengma Naga EZRA 9 Bible Online

EZRA 9 - Southern Rengma Naga bible

EZRA 9

¹Tha hi aphu thyükela siki, Israel sharhinyu peha le ryü a-ka zoshü, temi dan, püshükedanyu, lo Levinyu le anyugun kajon nyu senye kecha Ammon, Moab, lo Ijipt nmvue Kanan, Hit, Periz, Jebus lo Amor nyu zen kekhao bin mvu. Temi tsüdan hontse anyugun ko kentsükenchen thyü bin nle.

²Juda nyu pechenyu le sinrünyi kecha lü lo-o Sunggigü temi kenshün dan nrhu laso. Sharhinyu lo kedanyu dan le me tson kekhin tsin nyu thyü bin nle.

³Ale hinyü kelo ka, anyungwa mvu ritsin lao aphi sürhen apehü lo a münhü jwi tsela.

⁴Ale anyungwa mvuo tsüka dun bin-o ngwüngü rora kethyü gwünkho ti, lo temi le ryü a-tekho hun-o Israel nyu Sunggigü le me kazü ki tinla-o rani keryü nyu nkemu rüla zokeshü shakelo nyu aphu a-kerü keshvu thyüla.

⁵Tson-o ngwün gü rora kethyü gwünkho ka ale anyungwamvu kebin bin nyu so-o aphi sürhen kela ben tse khosen-o aben shweo Npugü a Sunggigü ka kehithyü.

⁶Ale zoshü, “O Sunggigü, ale nmhundyü nyu aben shweshü keja ritsin le. Agun kemu le khwe pe agun pe soki laso; tsü le tetso küryü tsang ti laso.

⁷Agun pvübon nyu gwünkho karyü ntsoka keti agun ntemi dan le musa laso. Agun kemu genyu, agun, agun rajanyu, lo agun püshükedanyu le sinrünyi raja dan ben nyu yülao me no agun dushvu, agun hon selo lo tenzen dothyü tinla. Nthu keti hihontse agun le kemenisa laso.

⁸Ntsoka gwünkho keshanyu ka, Npugü agun Sunggigü nle agun shwinjün-o agun no donyu chwiryü bin kenshün higü nyu kenshvu ndi tse yhu bin. Nle donyu agun hoshüo keyhun keshün pe agun tsü.

⁹Agun le donyu, ai nle agun khepe donyu shü lamvu. Nle Persia nyu raja thyü pe no agun njün-o agun no ryü yhun lo, lo nkekela Kershvuka gü thyünilo, tson-o Juda lo Jerusalem hinyu kenshvu ndi lole.

¹⁰“Ai ntsoka, O, Sunggigü, tha tsü aphu thyükela siki, agun le nyu zo semon? Agun le johokeshü gü zenmvuni laso,

¹¹nle ngonyu sidyükeshanyu ge khipe agun tsü keshü gü. Anyugun le pe agun ka zokeshü le, agun le gü khinlo nrün kazü gü le nshün mvu laso, quen mezin gü kechazin keti tsünyu keyhun nyu le kentsükenchen lo thatho nshün kemvu pe sükela genyu.

¹²Anyugun le agun no temi tsüdan zen kelonya, lo anyugun keche pe no gwakenye nmvue kvulo nya, agun no kazü tsü gü nyu agun kenyü lo tsü kela pe kethonthen agun tsipwen tsünyü yatselo tse zoshü.

¹³Agun kemu lo thyükezü genyu shaja aphu agun ge ryü kela sikie, agun Sunggigü nle shaja agun le hyulokezü kho pe agun tsü mvuo agun nsen shü.

¹⁴Tson yatselo, agun le dihontse n johokeshü pe lihi kemvu thyünio temi serikemvu tsü dan zen kelo tila? Agun le tsühontse thyü yatselo, nle nnyunta sao agun nkeshü lao temi nme nsen mvu lati.

¹⁵Israel nyu Npugü Sunggigü, nle njü, ai nle agun nsen shü. Agun le agun kemu zoshwi pe nkishü bin nle; agun le nmhundyü nyu ryü kelo agun kenjü nme ndi le.”