Read Southern Rengma Naga NEHEMIAH 13 Bible Online

NEHEMIAH 13 - Southern Rengma Naga bible

NEHEMIAH 13

¹Mosa tejvü gü swü tetso pe temi dan hi kebin ka, Ammon nyu nmvue Moab nyu no thame kae Sunggigü temi dan zen kerhün loho tse zo kenjü hyulo.

²Ammon nyu lo Moab nyu dan le Israel nyu le Ijipt nyu chwiryü kejü ka ketyüketsü pe anyugun tsü mvula. Tsünyeki Israel nyu swetsü la lotse pisa pe Balaam jonshe, ai ngun Sunggigü le shochün kelu pe jochü nme thyüla.

³Israel nyu tejvü higü shakelo ka anyugun dan nyu sinrünyi kechanyu aphu pe kecha thyüla.

⁴Püshükeda gü Eliashib, Kershvuka nyu kenya ka keshwi gü le jon kethon Tobiah zen-o kengü gwa gunryü.

⁵A-le Tobiah no katsen keda nme sen hü, tsü le Kershvuka nyu kesen kanyü, shye lo tharünkegwa, püshükedanyu genyu tha hokeshü, lo Levinyu, lü kethyünyu, lo kershvuka rikhun nyu ketsü, shye, vainzu, lo oliv terzü jüntseryü ka jünme, pe ketsü kehü katsen.

⁶Higwünkho ka ale Jerusalem nyu bin mvu, Artaxerxes le Babilon raja thyü kelo chen shenryü kenyhun ka ale a-nthon shü titseo tsüki rani gü kela genyu. Gwünkho peha siki ale a-ka hilo-o

⁷Jerusalem ki rani ryü. Tsüka Eliashib le Kershvuka nyu katsen nme pe Tobiah no sen kebin hyulo-o a kerü la.

⁸Ale nthün-o Tobiah kanyü aphu jün pe shwela.

⁹Ale katsen gü thyükenshün jvü thyüla lotse ahza hoshü, Kershvuka nyu kesen kanyü, shyeni kerüshvu lo tharünkegwa dan pe shü nila nrün genyu.

¹⁰Ale Kershvuka nyu lü kethyü nyu lo Levinyu dan ko temi dan le anyugun le sen-o yhunlo kekü pe tsümvu kela genyu Jerusalem nyu bin mvuo anyugun low ki rani gü kela ko shalo.

¹¹Kershvuka gü shwimvukela genyu ale kedanyu ju ko rhoshü. Tson-o ale Levinyu lo lü kethyü nyu zenniryü no thatho thyü nishü.

¹²Tsüselo Israel nyu aphu anyugun shye, vainzu, lo oliv ter jüntseryü ka jünme senryü Kershvuka kenya kanyu shüni so.

¹³Ale temi hidan pe kenya ka keshwi thyüshü. Shelemiah, püshükedanyu nme; Zadok, tejvü keshatsin nyu nme; lo Pedaiah, Levinyu nme. Zakkur nyugü Hanan, a-bon le Mattaniah, no anyugun keche. Temi hidan le ketsinyu tha kenjün pe anyugun pvünyu thatho kethyü nyu tsü shü logwa tse ale shakebin genyu.

¹⁴Rüchün shüta, a Sunggigü, tha hidan hi aphu n Kershvuka lo tsünyu kerüshvu genyu ale thyü shü.

¹⁵Tsügwünkho ka Juda nyu le Sabbath jon nyü vainsha zü thün kebin ale hyulo. Lo peha le shye, vainzu, vainsha, kherosha, lo thakecha pe gada khvü thyü pfüo Jerusalem nyu ryü; ale anyugun no Sabbath jon nyü thame jwe nyalo tse zoshü.

¹⁶Tur nyida nyu temi peha le Jerusalem nyu yhun hü, anyugun le Sabbath jon nyü jwe titseo tsehü lo kanyü kecha ko pfü ryü.

¹⁷Ale Juda nyu sharhi dan kesüo zoshü, “Hagun le gwakemvu thyü kebin shwishü ta! Hagun le Sabbath bo nrhu bin nyo.

¹⁸Hihontse kethyü genyu Sunggigü le shaja pe hagun pvübon nyu ge shüo nyida higü nkela. Tson-e hagun le Sabbath bo nrhuo Sunggigü nyunkekhü senryü Israel nyu ge shü bin nyo.”

¹⁹Tson-o ale Sabbath jon binzen-o, tsangzün ryü nyemhun nyida gü chwida dan khinla, lo Sabbath penla kemvuthen khinshe nya lotse ahza shüla. Sabbath nyü thame sen nyida günyu yüryü mvulo nrün genyu ale atemi peha pe khinrun ka shüla.

²⁰Gwüngwa gwünhvu tha lihie jwe kehü hakethyü nyu le jonpvün je chwida tegweki khwebin.

²¹Ale anyugun ka, “Tsüka khwebin-o tsang nben mvue gwa. Hagun le hisiki hihontse niya tselo ale hagun ntsun ti.” Tsügerho anyugun le Sabbath nyü niryü mvula.

²²Ale Sabbath zen kenshün ketsin thyülo nrün genyu Levinyu no anyugun thyükenshün lo-o gü Khinrun khwe lolo tse ahza shü. A rüchün shüta, O Sunggigü, higenyu ko, nkeso kedanyu a nrho shüta.

²³Tsügwünkho ka Juda nyu kechon le Ashdod, Ammon, lo Moab, nyu lü lo kebin ale shalo.

²⁴Anyugun nyenyu ponha khole Ashdod khwe nmvue khwe kecha zo-o ngun khwe zolo shamvu.

²⁵Ale temi dan rho-o shochün pe tsü, vü, lo anyugun pehü nchu. Tson-o anyugun no Sunggigü zan nyu sweo anyugun nmvue anyu nyenyu no sinrünyi kechanyu zen kelo sin loho tsela.

²⁶Ale zoshü, “Raja Solomon thyü pe no mukela tsü le sinrünyi kechanyu tenunyu le. A-le senye kecha raja dan nyeki gon kvu kethyü temi nme. Sunggigü le a-so-o a-lope Israel nyu aphu so raja thyü shü ai a-le kemu nyu chela.

²⁷Tson yatselo agun no hagun sithen-o sinrünyi kecha lü lo-o Sunggigü jo zenmvula tile?”

²⁸Joiada le püshükengun gü Eliashib nyu, ai Joiada le a-nyu nme no Beth Horon rünyi nyu Sanballat nyugi lo kethyü genyu ale Joiada no Jerusalem nyu bin mvuo tinla.

²⁹Rüchün shüta, O Sunggigü, temi tsüdan le dihontse püshükeda gü lotho kethyü bin, lo nle püshükedanyu lo Levinyu zen kejozenkelo kenyhun nren bonrhu layo.

³⁰Sinrünyi kechanyu dan nyu ale temi dan thyükenshün lo; Püshükedanyu lo Levinyu nmeme tseno a-tho thyüshü nrün genyu ale tejvü dan ndoshü;

³¹Gwünkho toka tesen pfüryü kerüshvu ro nrün ale ndoshü, lo temi dan no logvü lo keri shye lo terasha yün keri senryü lotse shü. Hi aphu rüchün shülo, O Sunggigü, tson-o a njün shülo.