Read Southern Rengma Naga NEHEMIAH 2 Bible Online

NEHEMIAH 2 - Southern Rengma Naga bible

NEHEMIAH 2

¹Tsüsi shye zi siki khenyüme Raja Artaxerxes le tyütsü kebin ka ale zu sen gü a-tsü shü. Tsü mhundyü a-le thame kae ale anyun gwamvu kebin hyu hümvu,

²tsügenyu a-le aketso shü, “Nyu genyu nshwi pe nnyun gwamvu sa bin nla? Nle homvu, tsügenyu n kenyü kemvu le bin tsentsü.” Ale akerü lao

³a-jokenishü,“ Raja gü no kethonthen yhun hülo! Apvübon nyu sun kenjü nyida gü le nke bin lo mah le a-khinrun nke kela le ale dihontse anyungwa mvu mvu lo semon?”

⁴Raja gü le ketsoshü, “Nle nyu lonyü bin nla?” Ale tsangge kebin Sunggigü ka kehi thyü lo-o,

⁵raja gü ka zoshü, “Raja gü nle ashwi njün lo akehi thyü pe atsüti yatselo, ano Juda kazü apvübon nyu pe sun kenjü nyida ki gü lota, ano nyida gü thyünilo nrün genyu.”

⁶Raja gü le, rajagi ko a-khoka dubin tseo akehi loshü. A-le ale jon dikho lo tiyo lo dinyü raniryü tiyo ketso-o, ale a-ka zoshü.

⁷Tson-o ale a-no a njün lo Eufrates nkhünzin kazüsakethü kipon ahng dan no akhin nyao ano Juda ki gü lolo tse kethyü lesü thu pe atsü shülo tse hishü.

⁸Ale a-no lesü thu pe raja gü chün kekhwe gü Asaph tsüshüo no Kershvuka rikhun bin Khinrun, nyida gü chwida, lo ale bin nrün ka gü tse genyu tesen khishü lotse hishü. Sunggigü le azen kehü genyu Raja gü le akehi aphu thyü pe atsü shü.

⁹Raja gü le rihü sokedanyu peha lo keru ge kedun shüpahü nishüo no azen-o Eufrates nkhünzin njwen gü. Tson-o ale raja gü lesü pe ahng dan tsü shü.

¹⁰Ai Beth Horon rünyi ka Sanballat, lo Ammon kazüsakethü nyu kedanyu nme Tobiah tse le temi peha le Israel nyu genyu thatho kegwa thyü titse ryü kebin jo nyülo-o au nyunta sala.

¹¹Ale Jerusalem ki ryüo jonshen bin

¹²ale temi nme kae Sunggigü le ano Jerusalem genyu nyu thyüshü lotse athu keyhun shüyo zomvu. Tson-o khejenyu tsanglvu ki ale soryüo apvünyu peha zenlo. Ale a-ge dun kethyü gada nme nti zenlo.

¹³Tsüle tsangzün bin zun ale nyida gü nken-o nkhünzin ketejon khinrun ka tse sen-o tesinzin Dragon zükepen nken-o Rubbish khinrun ka gü. Ale nyida gü chwida boren kela lo khinrun ro kela dan rhishü.

¹⁴Tsüsika nyida gü nphozin teso kipon Zükepen Khinrun lo raja gü Zibun ki gü. Ale a-ge dun kebin gada gü le chwilo kegwa tson hyulo mvula,

¹⁵tsügenyu ale Kidron Ketejon ki nshyeo, a npvü chwida gü nrishü. Tson-o rani ale keryü tson then-o Ketejon Khinrun ka tse nyida gü ki ryüla.

¹⁶Tsüka kebin kedanyu nme-e ale dika gü nmvue nyuthyü bin yo shamvu. Tsüketi ale thame pe apvünyu Judanyu, püshükedanyu, sharhinyu, kedanyu nmvue thatho nyu kengüo thyü nrün dan nme ka zomvu.

¹⁷Tsüsiki ale anyugun ka zoshü, “Jerusalem le nke kebin lo a-chwida bo nshvu kela genyu ngun le dihontse rünyumvu bin nla! Ngun nyida gü chwida khwenni lo lao keja kepfü thyü mvula tinu.”

¹⁸Tson-o ale dihontse Sunggigü le azen lo ache hüyo, lo raja gü le aka nyu zoshü yo pe anyugun ka zoshü. Tsüselo anyugun le, “Nu ngun thyüso ti sele!” Tson-o anyugun le ndo lo-o thatho gü thyüso.

¹⁹Sanballat, Tobiah lo a-zan le Geshem tse kethyü Arab nyu nme tse le agun le nyuthyü titse bin yo shalo-o, agun shwinyüo, “Hagun le nyuthyü bin nle tse rüchün bin la? Hagun le raja gü zen kentsun titse bin ole?” tse ketso.

²⁰Ale a-nyu jokenishü, “Tsangge kebin Sunggigü le agun keche shüti. Agun le a-gonyu dan, agun le thyüti. Ai hagun we Jerusalem nyu thame hagun kenjü ndi, lo tsü rüla nyu hagun jün nme ndi le.”