Read Southern Rengma Naga NEHEMIAH 4 Bible Online

NEHEMIAH 4 - Southern Rengma Naga bible

NEHEMIAH 4

¹Sanballat le agun Juda nyu le chwida khweni kebin rüla nyü kelo ka a-nyuntao agun shwinyü so.

²A-le a-pvünyu dan lo Samaria nyu rihü dan mhundyü ka zoshü, “Thakonthani kemvu Juda nyu hidan hile anyugun le nyuthyü bin nle tse rüchün bin yo no? Anyugun nyida gü thyüni titse bin nle? Anyugun kerüchün le kerüshvu thyü shüo khenyüme nyu thatho thyüpen lati tse bin le? Kerhukerhü kero mahchu pe ka kethyü tso thyülo ti ole?”

³Tobia le a-khoka so-o zonishü, “Anyugun le chwida dihontse kethyü khwelo tila? Mesükerun ai pela ren kelai le!”

⁴Ale, “O Sunggigü anyugun le agun shwikenyü khwe tsü nyü shüta! Anyugun le agun shwikenyü tsüno a-nyu pe ge güla! Me no a-nyugun hon aphu selo la lo anyugun tenzen-o sinrünyi kecha ki dothyü gü lalo.

⁵A-nyugun gwakemvu jü pe tsünya lo anyugun kemu dan nmhinla nya, anyugun le agun thatho thyü kebin dan nshwe kethyü genyu.”

⁶Tson-o agun le chwida gü khwebin, lo thonmvutse ponha kho khwe kü lola, temi dan le anyunshüo thatho thyü kebin genyu.

⁷Sanballat, Tobiah lo Arabia nyu, Amon nyu lo Ashdod nyu le agun le Jerusalem chwida khwelo bin kela lo kepe dan khin kela shalo-o anyugun nyuntasa lola.

⁸Tsügenyu anyugun aphu kengüryüo Jerusalem wheo kevü shü titse rhi lola,

⁹ai agun le agun Sunggigü ka kehithyüo nhenyu lo khejenyu temi no rikhun lola.

¹⁰Juda temi dan le lü nme thyü shü: “Agun le khvükensu pfüo hokeli laso; Kerhu kechon pfü pe shwela mvulo keshvu le bin. Dihontse nthu agun le chwida khwelo tila?”

¹¹N gun shwikerüchün nyu le ngun le anyugun hyumvu nmvue anyugun le ryü ngun dushvulao ngun tho gü no kenithyüla kemvu ka we ngun le shamvu ado tse rüchün bin.

¹²Ai gwünkho aphu ka ngun shwikerüchün nyu dan nyu yhun kehü Juda nyu dan le ryü agun shwikerüchün nyu le tharhi kebin dan genyu agun no petsü lolo tseshü.

¹³Tsügenyu ale temi dan no zhiethon, mi, lo tholevü sen-o pfüphun phun thyüo chwida khweti kemvu bin bin ka si kipon bin.

¹⁴Ale temi dan le nyun nkhi kebin hyushüo anyugun sharhi ju lo kedanyu ju ka zoshü; “Ngun shwikerüchün nyu nshvu nya. Npugü le ditsüki gon lo kenrin thyüyo rüchün lo-o, hagun temi, hagun nyenyu, hagun nu, lo hagun ka genyu teri thyülo.”

¹⁵Agun shwikerüchün nyu le agun le anyugun le rhikebin shalo kela shala, lo Sunggigü le anyugun le rhikebin sokvu kela shalo la. Tsüselo agun aphu nigü chwida gü khwe tinla.

¹⁶Tsügerho atemi ponha le thatho thyü lo peha le terironye, mi, gida lo tholevü tse sen so-o rikhun. Lo agun sharhinyu le temi dan keche

¹⁷chwida khwe kebin dan. Chwida kekhwe kanyü pfü kebin dan ko benha pe thathyü lo benha pe teri kanyü sen,

¹⁸lo tso khwe kebin nyu aphu zhiethon pe a-se sen pfü. Lo shukhun shü nrün gü le akhoka hü.

¹⁹Ale temi dan, anyugun sokedanyu lo sharhi dan ka zoshü, “Thatho gü le nmhun sa-o ngun khinyu nyu zen-o nithen ki chwida ge nrenru laso.

²⁰Tsügenyu hagun shu kekhun khwenyü lolo, ryü akhohunlo nye. Ngun Sunggigü le ngun genyu teri thyüti.”

²¹Tson-o khenyütsen, tsangben keshü ka gü shyenyü chwikeryü keti agun ponha le chwida khwe lo ponha le mi sen so-o rikhun.

²²Higwünkho ka ale temi dan lo anyugun che kehünyu aphu no khejenyu Jerusalem nyu bin-o nyida gü rikhunlo, lo nhenyu thatho thyü lolo tse zoshü.

²³Ale, azen kehü nyu, agonyu, nmvue arikhun nyu agun temi nme-e khejenyu lale agun phiyhün lamvu. Lo agun aphu terikanyü hoshü mvu.