Read Southern Rengma Naga NEHEMIAH 5 Bible Online

NEHEMIAH 5 - Southern Rengma Naga bible

NEHEMIAH 5

¹Tsüsiki pechenyu lo tenunyu-e temi kechon le anyu pvünyu JUda nyu dan ge kenya sola.

²Peha le zoshü, “Agun le kami kedada, lo rhünbin nrün genyu shye senmvulo shvu laso,” tsonso.

³Kechanyu peha le, “ Agun le khün bin mvu nrün genyu agun low, vainlow lo agun kae pe metsü titse bin laso.”

⁴Kechanyu le, “Agun le agun low lo vainlow ngu pe raja tsü nrün genyu me pisa tepu kethyüi so.

⁵Agun le Judanyu kecha dan zen-o tsipwen nme. Agun nyenyu-e anyugun nyenyu hontse gwamvu ole? Ai agun nyenyu pe me dothyüla tiso. Agun nyugi peha jwe pe me dothyüla bin so. Me le agun low lo agun vainlow khilo kela genyu thame thyü keloi mvuso.”

⁶Anyugun le kenya kebin ale nyülo-o anyunta la-o

⁷thathyü titse rhilo. Ale sharhi ju lo temi dan so keda ju rho-o anyugun ka zoshü, “Hagun le hagun tsasikezen nyu nshwe bin nyo!” Tson-o kevü kebin gü genyu ale temi süda koshüo

⁸zoshü, “Agun le thyülo kegwa kho a-nyugun npvü anyugun khipe sinrünyi ki jwe kela ntsasikezen Juda nyu dan rhinhi shübin. Lo ntsoka hagun le hagun npvü hagun tsasikezen nyu kemvu thyüo no anyugun npvü anyugun khipe hagun Juda nyu ka jwe bin nyo!” Tsontsin sharhinyu jule thame zolo nrün ndio ma tsela.

⁹Tsüselo ale zoshü, “Hagun le thyü kebin tsü le njümvu! Hagun le Sunggigü jo zen-o kenjü gü thyü zü le. Tson yatselo ngun shwikerüchün nyu, Juda kemvunyu le ngun shwinyü la loho.

¹⁰Ale temi dan no pisa lo shye-e aka tepu, lo azen kehü nyu lo atho kethyü nyu-e tsonlo. Ngun aphu anyugun no ngun pu thonilo tse mvula tinu.

¹¹Anyugun le hagun pu pfü kebin pisa nmvue shyeni nmvue vainzu nmvue oliv terzü aphu khela. Anyugun low, vainlow, oliv bin, lo anyugun ka rani pe tsüla lo!”

¹²Sharhi nyu jule zoshü, “Nle zo keshü hontse agun le thyüti. Agun le anyugun hon rani pe tsü lati, lo tepu dan hini loha le.” Ale püshükedanyu dan koshüo anyugun mhundyü ka sharhinyu ju no anyugun le zo shwishükela then titse swe la.

¹³Tsüselo ale a senkephin shwü pe kesun-o, “Hihontse Sunggigü le hagun ligü higü zoshwio then kemvu gü kesun lati.” Ale zoshü, “Sunggigü le hagun ka lo hagun le nyu le bin yo aphu sentin lati lo thame nsen shü loho.” Tsontsin tsüka kebin nyu aphu “Amen” Npugü shwe tse zoshü. Tson-o sharhi jule anyugun le zoshwi keshü thenlo.

¹⁴Ale chen tseryü kenyhun Juda kazü so ahng thyü, Artaxerxes le raja thyükelo chen nki ka gü shenryü kenyhun keti, tsügwünkho ka ale lo ashvunye-e ahng nyu le tyükezü chvü tyümvu.

¹⁵A mhundyü ahng kethyü nyu aphu temi dan no a-genyu kenjün thyü kü, a-chvü lo vainzu genyu khenyüme raka henzi lohü. Anyugun go nyu-e temi dan nshwe hü. Ai a we Sunggigü rühvu kehü genyu tsü hontse mvu.

¹⁶Ale a kekvu aphu sen-o chwida gü khwe lo kenya nme fü mvu. Azen-o thatho kethyü nyu aphu tsü hontse thyü.

¹⁷Ale Juda temi sharhi nyu tsio henpvün no amiz ge tyütsü zin hü, tsünyeki senye agun hunpfü kebin aki keryü temi aphu sin.

¹⁸Khenyütsen ale methu tse nme, tanyü a-thyü kegwa tsero, lo tero kechon pe ketyüketsü ndo shü hü, lo jonryü ka vainzu keshün khishü hü. Ai ale temi dan khvü kensu shakebin genyu ahng nyu le hyulo kezüi tsü khilo mvu.

¹⁹O Sunggigü, ale nka hibin nle, ale temi hidan genyu thyü kebin aphu genyu aphin rüchün shülo.