Read Southern Rengma Naga NEHEMIAH 6 Bible Online

NEHEMIAH 6 - Southern Rengma Naga bible

NEHEMIAH 6

¹Sanballat, Tobiah, Geshem lo agun shwirüchün kehü kecha nyu dan le agun le chwida khwe penlo lao kepekü nme ndi kela shalo, agun le khinrun kakhin we pe shümvu zun.

²Tsüselo Sanballat lo Geshem au le me nipe aki shüo ano ryü Ono Ketejon ki rünyi nme ka anyugun zen keteno lotse zoshü. Hile anyugun le age tha gwakemvu rhi kebin nme.

³Ale lilo nipe no anyugun ka zoshü, “Ale thatho keda thyü kebin genyu nshyeryülo kemvui le. Ale hagun teno gü lao thatho gü khin lo kemvui.”

⁴Anyugun le gwenzi ge jolo tsü hontse nipe akishü, ai ale a-kenme tse zope anyugun jo kenila.

⁵Tsüsika Sanballat le gwünpvün ge gü a-lesü khin khin mvu tse a-gonyu nme no senryü atsüshü.

⁶Tsünyu thu keshü le: “Geshem le aka kezo le, nle lo Juda nyu temi le kevü titse rüchün-o chwida khwe bin nle tse kethyü Juda kemvunyu dan nyu zosü bin laso. Lo nle raja kethyü ndo bin nle tse kethyü ko a-le zobin,

⁷lo nle sidyükeshanyu peha no nle raja letse Jerusalem nyu zo senshü nrün ndo la sele tse bin. Raja gü le johi shalo tsentsü so, tsügenyu nnyi keteno-o hi rüla kenthon shülo gwa titse ale zoshü bin nle.”

⁸Ale me nipe a-jo kenishü: “Nle zo kebin tsü nme ketsin mvu. Nle n npvü tsü aphu rüchün kebin nti.”

⁹Anyugun le agun ketsun-o thatho gü khinla titse kebin gwünzin. Tsügenyu ale kehithyüo, “Sunggigü athyü nko shülo!”

¹⁰Higwünkho ka khenyüme ale Delaiah nyugü Shemaiah a-bon le Mehetabel teno shü titse gü, tsügü le a-ka nkenlo shvubin. Tsontsin a-le aka zoshü, “Nnyi Kershvuka ki gü kenshün bin nyu kebuo kakhin lola mvulo shvule, anyugun le ryü ndushvula titse kebin genyu. Anyugun le khejenyu ndushvu la titse ryüti.”

¹¹Ale zoshü, “Ale tin-o kebu kehü-e temi kemvu. N kerüchün le ale rhünlo titse tin gü Kershvuka nyu kebu ti ado tse rüchün bin le? Ale tson loho!”

¹²Ale tsü rüchün nikeshü ka Sunggigü le Shemaiah nthon shü mvu ai Tobiah lo Sanballat au le jvüjwe pe a-tsüo no jo hihontse kethyü pe aka zo kebin rüchün lo.

¹³Au le a-chün thyüo no a ketsun pe ano mulao, azan kegwa nmhenla lo ano keja pfü loti tse kethyü gwünzin.

¹⁴Ale kehithyüo, “Sunggigü Tobiah lo Sanballat au le nyu thyüshü yo rüchün shüo shaja pe au tsülo. Nodiah tenugi lo sidyükeshanyu a ketsun kethyü nyu aphu rüchün shülo.”

¹⁵Jon henpvün kenyhun ka, Elul shye jon nkipvün nyü chwida gü aphu khwepen lola.

¹⁶Agun shwikerüchün Juda kemvunyu agun hunpfü kebin dan le hi rüla nyü kelo ka anyugun mhun gwamvu la, temi aphu Sunggigü kechenyu thatho gü thyükelo sha kela genyu.

¹⁷Higwünkho aphu ka Juda nyu sharhi ju le Tobiah zen lesü thu pe ketsü hü.

¹⁸Juda nyu kechon le a-kipon bin hü, a-nu a-pvü Shekaniah, Arah nyugü le Juda nyu genyu. Tsünyeki a-nyugü Jehojanan le Berechiah nyugü Meshullam nyugi lo.

¹⁹Temi dan le a mhundyü ka Tobiah le thyü keshü a-tho kegwa rüla aphu zohü. Lo a-le a ketsun kethyü lesü nipe atsü hü.