Read Southern Rengma Naga NEHEMIAH 8 Bible Online

NEHEMIAH 8 - Southern Rengma Naga bible

NEHEMIAH 8

¹Shye tsenyü gü tsüle Israel nyu aphu a-rünyi nyi nyu bin lola. Tsü gü shye jon kerinyü temi aphu ryü Zü Khinrun nyu tsoncho ka kequen lo. Tson-o püshükeda lo lesü keshatsin gü Ezra no Npugü le Israel nyu genyu khipe Mosa ketsü lesü gü senryü lotse hishü.

²Tsügenyu Ezra le tsü sen-o peche, tenu lo ntsenyu thashakekha lo kegwanyu aphu le kehun kebin ka ryü.

³Tsüka Khinrun tsoncho nyu lonyü gü ngwün gü keti a-le tejvü gü swü pe anyugun zenshü, lo anyugun aphu tsünyü petsü salo.

⁴Ezra le gwünkho tsügü genyu tesen pe binjwe kethyü nme ge sobin. Temi hidan le a-nzhüzin sobin: Mattithiah, Shema, Anaiah, Uriah, Hilkiah, lo Maaseiah; lo temi hidan le a-ngwazin sobin: Pedaiah, Mishael, Malchijah, Hashun, Hashbaddanah, Zechariah, lo Meshullam.

⁵Ezra le temi dan soki bin kejwe ge so kelo ka aphu a-nri rübin. Tson-o a-le lesü gü helo ntsin aphu solo la.

⁶Ezra le zoshü, “Npugü, keda Sunggigü shwe!” Tsonshü ntsin temi aphu ben shweo, “Amen! Amen!” tse shü. Anyugun le khosen-o nkhün tsü gü Npugü rüshvu.

⁷Tsonshüo anyugun bin ka solo lo Levinyu temi hidan le tejvü gü zokekho pe anyugun zen: Jeshua, Bani, Sherebiah, Jamin, Akkub, Shabbethai, Hadiah, Maaseiiah, Kelita, Azariah, Jozabad, Hanan, lo Pelaiah.

⁸Anyugun le Sunggigü tejvü gü zokela shüo temi dan no shalo nrÜN genyu a-kon zo kekha shü.

⁹Temi aphu tejvü gü nyu thyü mvulo keshvu rüla nyükelo ka chü sola. Tsügenyu Ahng gü Nehemiah, Püshükeda lo tejvü kesha gü Ezra, lo tejvü kon zokekha shü kebin Levinyu dan le temi aphu ka zoshü. “Jon higü hile NPugü hagun Sunggigü mhundyü ka nshün, tsügenyu hagun le nyungwamvu nmvue chü nyalo.

¹⁰Ka ki gun gü keho thyülo. Hagun ketyüketsü pe kendi gü zen kenjün tyütsülo. Nthu hile ngun Npugü mhundyü ka nshün tsü genyu nyungwamvu nya. Npugü le pe hagun ketsü shekerhün gü le hagun thyü nko shüti.”

¹¹Levinyu dan le ho-o temi dan nyun thyü nbwen lo anyugun no kenshün jon tsü hontse kethyü ka nyun gwamvu nyalo tse zoshü.

¹²Tson-o temi aphu ka ki gun gü shekerhün thyü tyütsü lo a-le nyu tyütsü yo pe kechanyu ko zen kenjün lo, kechamvule nyu swü pe anyugun zen shüyo tsükon shakela genyu.

¹³Tsüsinyü pfüphun pe dan, püshükedanyu lo Levinyu tse kengü tejvü gü senkethyü dan swü titse Ezra ki gü.

¹⁴Tsüka anyugun le Npugü le pe Mosa tsü keshü tejvü gü nyu Israel nyu no Then nyu kebin Nga ka then nyu bin lotse ahza khishü kenjü shalo.

¹⁵Tsügenyu anyugun le jolo hi nipe Jerusalem lo nyida lo rünyi kecha aphu ka shü: “Rincho ki gü sahü, oliv, myrtle, kvü, lo senbin kecha ro gwen senryüo tejvü gü nyu thu kenjü hontse then thyülo lo,” tsonshü.

¹⁶Tsüselo temi dan le senro gwen senryüo anyugun ka so ge, kamhun nyu, Kershvuka gü kamhun nyu, tsoncho dan ka, Zü Khinrun lo Efraim Khinrun ka tse then thyü külo.

¹⁷Me dothyü hüo raniryü kelo nyu aphu then thyü küo binlo. Nun nyugü Joshua gwünkho siki hithyü keritsin, tsügenyu temi aphu shekerhün thyü.

¹⁸Nga jon kerinyü gü kenkhin keti khenyütsen anyugun le Sunggigü tejvü peha swü shüshü tse. Anyugun le jon tsenyü nga, lo tejvü nyu kebin hontse jon tetse nyü nga penla.