Read Southern Rengma Naga NEHEMIAH 9 Bible Online

NEHEMIAH 9 - Southern Rengma Naga bible

NEHEMIAH 9

¹Shye tsügü jon nki pezi nyü Israel nyu le anyugun kemu dan genyu nyungwakemvu pe hishü nrün genyu kequen-o nyen. Israel nyu le sinrünyi kechanyu dan nyu anyugun khikho kecha thyü lola. Anyugun nyungwakemvu zansü ronphi ben lo kenphü pe anyu pe ge shü. Tson-o solo njüo anyugun lo a-nyu pvübon nyu kemu zoshwi.

³Tegi kevüja kenshen NPugü anyugun Sunggigü tejvü gü swü pe anyu hishü, lo tsüsika tegi kevüja kenshen anyugun kemu zoshwio Npugü Sunggigü rüshvu.

⁴Tsüka Levinyu genyu binjwe nme le bin, tsüge Jeshua, Bani, Kadmiel, Shebaniah, Bunni, Sherebaih, Bani, lo Chenani tse le sobin. Anyugun le nra sen-o Npugü a-nyu Sunggigü ka kehi thyü shü.

⁵Levinyu hidan le me zen-o rüshvu: Jeshua, Kadmiel, Bani, Hashabneiah, Sherebiah, Hodiah, Shebaniah, lo Pethahiah. Anyugun le zoshü: “Solo-o Npugü hagun Sunggigü shwelo; kethonthen a-shwelo! Temi aphu no a-zan gingvü kethyü shwelo, temi le a-keshwe nme-e gon timvu yatse-e.”

⁶Tsüselo Israel nyu le hihontse kehi thyü: “Npugü, n nti Npugü le; nle kazü lo tsangneki shyenyü dan thyü shü. Nle kazü lo züda lo tsünyu kebin aphu thyüshü; nle kerhün ronzin pe aphu tsüshü. Tsangge kekvu dan le nkhün tsüryü nrüshvu hü.

⁷Npugü Sunggigü, nle Abram kejü lo tson-o Babilon ki Ur ka a-zen chwiryü; nle a-zan thakela pe Abraham thyüla.

⁸A-le njozen kehü nle hyu lo-o, nle a-zen kejozen lo. Nle Kanan nyu, Hitnyu, Amornyu, Periznyu, Jebus nyu lo Girgashite nyu dan kazü khipe a-tsipwen dan no yhun titse zoshwi shü. Nle tenyen lo kekü gü genyu nle zoshwi keshü tsü then hü.

⁹“Agun pvübon nyu le dihontse Ijipt ki kenjün thyü layo nle hyula; nle anyugun kehinyü shüo kenhon zida ka anyugun cheshü.

¹⁰Nle ndun tho dan thyü pe Raja gü, a-hensin kedanyu lo a-kazü nyu temi dan ge shü, anyugun le ntemi dan kenshwe nle sha kebin genyu. Tson-o nzan kechwi tsüle nthu keti bin nyo.

¹¹Nle Zida nyu ntemi dan genyu tson ndashü; tson-o anyugun no kazü kesin nyu tsonchü chwila. Anyugun hü keryü nyu le zü kentsun nyu nrhe shvula, tso hontse züda nyu jonphün la.

¹²Nhenyu lo nle nmhu chwe me no anyugun tsonri lo khejenyu lo mah no anyugun tson ben.

¹³Sinai kazüthun ka nle tsangge tsenryü; nle ntemi dan nthon-o tejvü kegwa lo senkethyü jo kenjü pe anyugun tsüshü.

¹⁴Nle anyugun no n Sabbath jon zen kenshün lolo tse senthyü shü, lo ngogü Mosa ge nle ntejvü gü pe anyugun tsüshü.

¹⁵“Anyugun le nnyo kelo ka nle tsangge tensü pe anyugun tsü, lo anyugun le teri kelo ka tsonye nme ge zü pe anyugun la. Nle anyugun no kazü gü ketsen lolo tse shü nle pe anyugun ketsü gü tsü.

¹⁶Ai agun pvübon nyu le ketekho lo anyugun nyun rüo njohokeshü dan zen mvu la.

¹⁷Anyugun le njozen mvu; nle thyü keshü aphu nmhinla; anyugun le nle ndun tho thyü keshü dan nmhinla. Anyugun le ketekho-o anyugun zen rani gü Ijipt nyu dothyü titse sharhi nme kejü lola. Ai nle me kemu jüshü kehü Sunggigü; nle me shwinjün lo me so, nnyunta whütse hü mvu. N shwikenjün le gon, nle anyugun khela mvu.

¹⁸Anyugun le methu joja teromen nme thyülo-o Ijipt ki anyugun zen chwikeryü tero gü le tsü letse! Ditsüki thyü anyugun le n nshwela, Npugü!

¹⁹Ai nle tsüki kazü kesi ki anyugun kheshü lamvu, n shwikenjün le gon keri genyu. Nle nmhu gü nmvue mah gü sen tin lamvu tsüle khensin jongwÜN anyugun tson tsin shü.

²⁰N kegwa nyu anyugun no nyuthyü mvulo shvuyo nle pe anyugun ka zoshü; nle manna pe anyugun gin thyü lo zü pe anyugun la.

²¹Chen henzi kazü kesinyu nle anyugun genyu mvulokeshvu aphu khishü; anyugun phinya le ren lamvu lo anyugun pha nyüo nme lamvu.

²²“Nle anyugun no senye lo rajaphen so kvulo, anyugun zen keterhi kebin kazü dan. Anyugun le Sihon le keda thyü kebin Heshbon kazü so kvulo, lo Og le raja thyü kebin Bashan kazü so kvulo.

²³Nle tsangge shyenyü hontse kethyü anyugun nyenyu kechon khishüo no kazü gü lolo-o tsünyu yhunlo; nle pe anyugun pvübon nyu tsü titse zoshwi kenjü gü.

²⁴Anyugun le Kanan kazü lolo; nle tsünyu yhun kebin dan so kvulo. Nle kekvu pe ntemi dan tsüshüo anyugun no nyuthyü nyüyo thyülo Kanan temi lo raja dan ge.

²⁵Ntemi dan le chwida kebin nyida dan, kazü kegwa, kenya pe sü kenjü ka dan, zülvu tso kela, oliv bin, terasha bin, lo vainlow le kebin dan khin lola. Anyugun le nyu tyünyü yo tyüo dalo; anyugun le nle pe anyu ketsü thakegwa aphu sen anyugun kenyü thyülo.

²⁶“Ai ntemi dan le n ntsun lo njozen mvula; anyugun le ntejvü then mvuo rani tinla. Anyugun no petsü lolo tse keshü sidyükeshanyu dushvula, anyugun no nki raniryü lotse keshü nyu. Anyugun le n nshwe lo nshwenini,

²⁷tsügenyu nle shwikerüchün nyu no anyugun so kvulo-o keda thyü lola. Anyugun le kenjün thyü kelo ka nno anyugun cheshü lotse nkoshü; lo nle tsangge anyugun jo kenishü. Nshwikenjün keda nyu nle anyugun sharhi nyu nishü, tsüdan le anyugun kenrhinyu ben nyu anyu kenishwi shü.

²⁸Kebwe le ryülo ntsin anyugun le kemu thyü nila, tson-o nle anyugun shwikerüchün nyu no anyu sa kvuni lola. Tson-e anyugun le nyunkelu lo-o nno anyu kenishü lotse hikeshü ka, Nle tsangge bin anyugun khwenyü lo-o nshwikenjün keda nyu nle anyu kenishwi nishü.

²⁹Nle anyugun no nsen kethyü zen lolo tseshü ai anyugun le ketekho-o ntejvü dan kenila, ntejvü kethen le k erhün tson gü yatse-e. Anyugun nyun tsen lo rüo ntejvü zen mvula.

³⁰Chen kethon nle nnyunthon-o anyu no petsü lolo tse. Nle n sidyükeshanyu nyun thukeyhun pe anyugun kazo, ai ntemi dan le anyugun yhütin rügü la, tsügenyu nle senye kecha no anyu sa kvu lola.

³¹Tson-e nshwikenjün le gonri kethyü genyu nle anyugun khela nmvue nke lamvu. Nle keso lo shwikenjün Sunggigü le!

³²“O Sunggigü, agun Sunggigü, nle ditsüki thyü gonla! Ditsüki kenrin thyü lo kvula! Nle Kejozenkelo zoshwikeshü then hü. Assiria nyu raja jule agun nshwe kehü ka ryü ntsoka keti agun le ditsüki thyü kenjün thyü ola! Agun rajanyu, sharhinyu, püshükedanyu, sidyükeshanyu, agun pvübon nyu lo agun temi aphu kenjün thyü laso. Agun le ditsüki thyü kenjün thyü layo rüchün shüta!

³³Nle shaja pe agun ketsü le a-zü le agun le mula yatse-e nle joketsin zo.

³⁴Agun pvübon nyu, rajanyu, sharhinyu lo püshükedanyu le ntejvü then mvula. Anyugun le njohokeshü lo nle petsü lolo tse keshü jo nyü mvula.

³⁵Njochü sen-o rajanyu le ntemi so gon anyugun le nle pe anyu ketsü nkazü kemhun, kebwe nyu yhun kebin ka; ai anyugun le anyu kemu nyu raniryüo nlothyü lo mvula.

³⁶Ntsoka we agun le nle pe agun ketsü kazü günyu me do laso, nle chvü pe agun tsü kehü kazü kebwe higü nyu.

³⁷Kazü günyu hyukelo dan le agun kemu genyu nle pe agun so gon keshü raja jule khilo laso. Anyugun le agun lo agun senru-e pe anyugun kendo thyü lola hü nle, tson-o agun le kenjün thyüsa kethyü nyu bin nle!”

³⁸Hidan hi aphu genyu, agun Israel nyu le hika Kejozenkelo nme thu shüo agun sharhinyu, Levinyu, lo püshükedanyu dan no anyugun mehor pe vüla.