Read Southern Rengma Naga ESTHER 1 Bible Online

ESTHER 1 - Southern Rengma Naga bible

ESTHER 1

¹Persia nyu rünyi nyida gü Susa nyu rajakhen ge bin-o Xerxes le India ka gü Sudan keti kazüsakethü 127 so keda thyü.

³A-le raja thyükelo chenshen ka a-hensin nyu kedanyu lo tejvü kesen nyu aphu kope keho nme thyü. Persia lo Media nyu rihü dan, lo kazüsakethü aphu ka ahng nyu lo teshwe kepfü dan-e bin.

⁴Shye tsero a-le a-raja kenya gingvü kethyü lo terünkepfü tsü pe me hi.

⁵Tsüsika Raja gü le Susa nyida günyu kebin kenya lo kendi nyu aphu genyu keho nme thyü shü. Tsüle jon tsenyü raja chwi nyu thyü.

⁶Kamhun le kesunphi kenzi lo kechon pe linen ron kegwa kemeren ge sen-o rakagi raho ge dyü pe marble kachon ge sen pe nthyü nzen. Nokun dan le suna lo rakagi pe chao marble kechon pe di, tsominketsen kenhon, kenshwe lo kenzi pe thyü.

⁷Suna honpen kenyhun nti-e kenme kemvu nyu vainzu lo shütsü, Raja gü le rajanyu vainzu nho satse khishü.

⁸Temi nme-e kemvu thyü pe no tsü mvu; raja gü le ahza pe raja kanyu kera nyu tsüo ligü higü dikho tsünyü bin yo no tsülo lotse shüla.

⁹Tson kebin ka Rajagi Vashti ko tenunyu dan zen-o Raja ka nyu keho thyü bin.

¹⁰Keho jon tsenyü nyü raja gü le vainzu tsü a-mhun yün pfüo, a-hensin ka a-lothyü kehü mitsenyü dan koshü, Mehuman, Biztha, Harbona, Bigtha, Abagtha, Zethar lo Karkas.

¹¹A-le rajagi Vashti no raja perün pfüo anyugun no a-zenryü lo tse shü. Rajagi le tenunyu kezegwa nme, tsügenyu raja gü le tsügi kezegwa pe a-hensin kedanyu lo a-sin nyu aphu hishü nyüso.

¹²Ai gonyu jule raja gü johokeshü pe rajagi Vashti ka zoshü, ai a-le ryü mvu letse la. Higenyu raja gü le a-nyunta sa lola.

¹³Tejvü lo ahza genyu raja gü le thakesha nyu kerüchün ketsoshü kehü jvü le bin, tsügenyu nyuthyü mvulo shvuyo tse kethyü shakehü a-tsontsin kehü dan koshü.

¹⁴A-le anyugun ka tsonketsin ketso kehü Persia lo Media rajaphen nyu kedatsin nyu min tsenyü le bin, tsüdan le, Karshena, Shethar, Admatha, Tarshish, Meres, Marsena, lo Memukan.

¹⁵A-le temi hidan ka zoshü, “Ale, Raja Xerxes, ale agonyu nipe rajagi Vashti kishü, ai a-le ajo zenmvu laso! Tejvü gü le ngun no a-ge nyuthyü lo tse zoshü tila?”

¹⁶Tsüselo Memukan le raja gü lo a-hensin kedanyu dan ka zoshü: “Vashti le raja gü ntimvu ai a-hensin nyu kedanyu lo a-raja kazü nyu pechenyu aphu nshwe laso!

¹⁷Raja kazü nyu tenunyu aphu rajagi le nyuthyü shüyo nyülo lo a-nyepvünyu süjün kemvui so. Anyugun le, ‘raja gü Xerxes le rajagi Vashti no ryülo tse koshü ai tsügi le nmvule tsela le,’ tse zoti.

¹⁸Persia lo Media raja gü hensin kedanyu dan nunyu le rajagi jvü rüla hi shalo lo lonyü tsangben kemvu ka anyugun nyepvü nyu ka zo kelai so. Lika hikae menunyu le a-nyepvü nyu rühvu mvulo me nyepvü nyu le a-nunyu ge nyunta ti.

¹⁹Tsügenyu raja gü le a-kendo yatselo Vashti no raja gü mhundyü nyu niryü nya lotse raja no lesü nme thu pe kenjün la. Tsü kelu nilo keho thyüo pe Persia lo Media nyu tejvü nyu thu lalo. Tson-o tenunyu a-nyeki gwakvu kethyü pe a-sunka rajagi thyü lalo.

²⁰N johokeshü pe raja kazü kenmhun hi aphu nyu teshala yatselo tenunyu nmeme aphu a-nyepvü nyu le n nyae ndi-e rühvu tin lati.”

²¹Raja gü lo a-hensin kedanyu dan le jo hile anyu kenyü lao raja gü le Memukan le zokeshü hontse thyüla.

²²A-le jolo nipe raja gü kazüsakethü aphu ka kazü tsügü khwe lo tsügü jvü thu shüo, me nyepvü nyu aphu no a-kakhün nyu Npugü thyüo kekvu senti tsonla.