Read Southern Rengma Naga ESTHER 2 Bible Online

ESTHER 2 - Southern Rengma Naga bible

ESTHER 2

¹Raja gü le a-nyunta mvukela siki, Vashti le nyuthyü layo lo a-le tsügi kentsun rüla johoshükela rüchün so.

²Tsügenyu Raja gü tsontsin kehü a-kho kenni nyu peha le hihontse rhishü, “Nyuthyüo lünyu phusen kezegwa peha fülo mvula?

³Raja kazü nyu kazüsakethü aphu ka kedanyu peha kejü pe no lünyu phusen kezegwa aphu senryüo nyida gü Susa nyu tenunyu dan kanyu shülo tse ahza shülo. Lo tenunyu keshwi gü Hegai no anyugun no zegwalo nrün kanyü dan pe anyugun tsüshü.

⁴Tson-o nkenyü ketsin gü no Vashti sunka rajagi thyü lolo.” Raja gü le jo higü le a-kendo lao thenlo.

⁵Jair nyugü Mordekai tse kethyü Juda nyu nme le Susa nyu bin; a-le Benjamin tsipwen ka Kish lo Shemei tsipwen.

⁶Babilon nyu raja Nebuchadnezzar le Jerusalem nyu Juda raja Jehoiachin tenzen tin kethyü ka Mordekai ko tenzen dothyü gü la.

⁷A-nyo nyugi Esther, Ibrinyu khwe ki a-zan le Hadassah, le a-zen bin hü; tsügi le zegwasa lo a-rhenrhü gwasa. A-pvü a-jvü le sikela siki Mordekai le leyi pe a-nyu thyü lola.

⁸Raja gü le ahza hokeshü pe tesha shüo lünyu kechon zenryü Susa nyu shü kelo ka, Esther ko tsüdan nyu bin. Tsügi ko pe raja kanyu tenunyu keshwi gü Hegai ben ka shüla.

⁹Hegai le Esther shwi a-yhüdyü lo a-kenyü lola. A-le whütse zegwalo kehü hon dan lo ketyüketsü gwakvu kethyü pe tsügi tsüshü. A-le tenunyu kanyu bin kegwatsin pe tsüshü, lo raja kanyu lünyu mintsenyü no a-lothyü lotse kejü shüla.

¹⁰Mordekai le a-ka zokeshü hontse Esther le a-le Juda nyu letse kethyü tsü kebu bin.

¹¹Esther le gwabin le mvuyo lo dihontse tiyo shalo nrün genyu khenyütsen Mordekai le tenunyu kamhun dyüka nsin-nshye hü.

¹²Tenunyu thyükenshün kethyü jvü le chenme shyetsero ter a-rünkegwa pe yün lo shyetsero ter a-rünketehi pe yün sin. Tsüsiki nyu lünyu nmeme zen-o Raja Xerxes ki gü.

¹³A-le tenunyu kanyu bin-o raja bin ki kegü ka phinya nyu sen nyüyo senhü.

¹⁴A-le ngwün gü tsüki güo tsüsi lonyü gü zenniryüo tenunyu ka kecha ki raja gü thenu dan kentsen gü Shaashgaz no nucha tin lahü. Raja gü le a-kenyüo a-zan ko-o ketsoshü kemvu we a-le raja gü ki nigü hümvu.

¹⁵Esther le raja gü ki kegü gwünkho le ryüla. Esther le a-leyi kelo gü Mordekai a-nyo Abihail nyugi; Esther le a-kehyu nyu aphu a-shwi pe me kenyü kü. A-gwÜNkho le keryü ka, tenunyu dan keshwi gü Hegai le a-no nyu ben nya lotse shüyo a-le tsü nti ben nyalo.

¹⁶Tson-o Xerxes le raja thyükelo chen tsenyü ka shye tseryü gü, Tebeth shye ge Esther zenryü, raja kanyu Raja Xerxes kishü.

¹⁷Raja gü le lünyu kecha aphu nyeki tsügi le a-kenyü kvula, tson-o kechanyu aphu nyeki a-sopfü lola. Tsügenyu a-le raja perün pe tsügi pe ge shüo no Vashti sunka rajagi thyü lola.

¹⁸Tson-o raja gü le Esther kerühvu ka keho keda nme nda shüo a-hensin nyu kedanyu lo kekvukesen nyu aphu koshü. A-le shvuti pe a-kazü nyu kebin apentha tsü lo raja nyu le pe me tsü kehü jwe dan kenjün pe me tsü.

¹⁹Tsügwünkho ka raja gü le Mordekai pe kekvu kesen nyu nme thyü shüla.

²⁰Tsü keti Esther le a-le Juda nyu letse kethyü me no shamvu. Mordekai le a-no temi nme ka zo nya lotse keshü, a-le lünyu keshe thyüo tsügü le a-nucha kebin ka a-jo zen kehü hontse.

²¹Mordekai le raja kanyu kedanyu thyü bin kehü ka raja gü khenpfü ka rikhun kehü Bigthana lo Teresh au le raja Xerxes nrhio a-dushvu lati tse rhi bin.

²²Mordekai le tsü rüla shalo-o pe rajagi Esther ka zoshü, lo tsügi le Mordekai zan ka pe raja gü ka zoshü.

²³Tson-o tsü rüla ketsoketsü gü laryü ketsin tse shalo la, tsügenyu au mihvu nren pe sen ge hüla. Raja gü le hi rüla pe raja lesü nyu thu bin lotse ahza shüla.