Read Southern Rengma Naga ESTHER 4 Bible Online

ESTHER 4 - Southern Rengma Naga bible

ESTHER 4

¹Mordekai le thathyü kela rüla tsü aphu nyükelo ka a-nyun gwamvuo a-phi sürhenla. Tson-o ronphi ben, jonbü pe a-pe ge shü pfü tseo nyida günyu ho-o chü nra nhuo,

²raja kanyu keyütson ka ryü. Temi nme ronphi ben kehü nyu no tsünyu yü hü kemvu genyu a-le tsünyu yü mvu.

³Kazüsakethü aphu ka raja gü le johokeshü shakelo ka Juda nyu dan nyu chechü nra nhu kü bin. Anyugun le nyen, chü, chechü, lo kechon gü le ronphi ben-o jonbü nyu keto bin.

⁴Esther gogi ju lo a-kentsen ju le Mordekai le nyuthyü binyo pe a-ka zokeshü ka tsügi le a-kevü sala. A-le Mordekai no ronphi ben nyao kecha ben lotse phi peha nishü, ai a-le lomvu.

⁵Tsüselo a-le raja gü le kejü pe a-go thyülo tse keshü raja kanyu tenunyu keshwi nyu nme Hathach koshüo, a-no Mordekai kigü nyuthyüla seyo lo nyu genyu yo ketsoshü lotse shü.

⁶Hathach le nyida nyu raja kanyu keyü tson ka Mordekai kigü.

⁷Mordekai le nyunyu thyüla yo lo Haman le Juda nyu aphu boshvula yatselo pisa dikho pe raja gü kenyakhin nyu shü titse zoshwi shüyo aphu pe a-ka zoshü.

⁸A-le Juda nyu nkela lotse Susa nyu ahza nishwi keshü nme pe Hathach tsü shü. Mordekai le a-no tsü sen gü Esther tsüshü, dihontse bin yo pe zoshü, lo tsügi no gü raja gü no a-temi dan shwinjün shülo tse hilo tse shü.

⁹Hathach le hi thyüshü,

¹⁰lo Esther le a-no jolo higü sen nigü Mordekai tsüshü lotse shü.

¹¹“Peche nmvue tenu ligü higü koshü mvue kanyu ki yügü raja le hyulo temi tsügü no sila hü. Tejvü gü le tson bin; raja gü tsontsin kehü nyu ka tsügü kazüsakethü ki kebin temi aphu shabin nyo. Ai raja gü le akoshü kemvu le shyeme thyü laso.”

¹²Mordekai le Esther jolo hi shakelo ka,

¹³a-le tsügi no petsü lolo tse shü: “Nle raja kanyu kebin genyu nle Judanyu kecha nyeki kenshvu ndi letse rüchün nya.

¹⁴Nle gwünkho hihontse kethyü nme ka ntsemala yatselo, tsangge keche le Judanyu kiryüo, anyugun kenilo ti, ai n we siti lo npfü kami le kenithyü lati. Gwünkho hihontse kethyü nme genyu n lope rajagi thyüshü bin-e shamvu!”

¹⁵Esther le hi hontse Mordekai jo kenishü:

¹⁶“Gü Susa nyu Judanyu aphu ko kequen lo-o; nyen lo agenyu kehithyü binlo. Tsangkeben jonshen lo kezün jonshen thame tyütsü nya. Ago gi ju lo ako tsü hontse ti. Tsüsiki tejvü mvu yatse-e ale raja gü ki gÜ ti. Ale si mvulo shvu yatselo, ale si lati.”

¹⁷Mordekai le gü Esther le a-ka zokeshü aphu thyülo.