Read Southern Rengma Naga ESTHER 5 Bible Online

ESTHER 5 - Southern Rengma Naga bible

ESTHER 5

¹Esther le nyen tseo jonshen nyü rajagi phinya senlo-o raja ka günyu yügü rajakhün le kebin katsen gü kepen ka sobin. Raja gü le kanyu ki rajakhün ge dun-o khenpfüzin ntsun bin.

²Raja gü le Esther le tegwenzin so kebin hyushüo shwi a-kenyüo suna thün gü keta pe tsügi tsüshü. Tsüselo a-le ryü a-thün nmhushü.

³Tsontsin raja gü le, “Nyuthyü ola, Raja gi Esther?” Nle nyu lonyü bin yo aka zoshülo,“ A raja kazü ponhae pe ntsüla ti.”

⁴Esther le a-jo kenishü, “Raja gü le a-kendo yatselo nle lo Haman no ntsoje ale ngenyu keho ndo keshü ka ryünyü bin nle.”

⁵Tsüselo Raja gü le Haman au Esther le keho ndo keshü nyu gü nrün genyu whütse ryülo tse ahza shü. Tson-o raja lo Haman au le Esther keho nyu gü.

⁶Raja gü le vainzu tsü kebin ka tsügi ketso shü, “Nle nyu hinyü bin yo aka zoshülo pe ntsü lati. Nle a raja kazü ponha hi-e pe ntsüla tile.”

⁷Esther le a-jo kenishü,

⁸“Raja gü le ashwinjün-o akehi thyü pe atsü tiya tselo, nle lo Haman no sendu ki ale keho kecha nme ndo keshü nyu asin thyüni nyü bin nle. Tsügwünkho ka ale nyu hinyü bin yo pe nka zoshü ti.”

⁹Haman le asherhün lo a-dyüben-o tinla. Ai a-le raja kanyu keyü tsonka Mordekai hyushü, lo Mordekai le ngiso nmvue a-kerühvu zansü nme thyü mvutse tinla, tsügenyu Haman le a-ge a-nyunthün lola.

¹⁰Ai a-kekheni-o ka ki gunla. Tson-o a-le a-pfünyu ju kope a-ka ki shülo lo a-nu Zeresh no ryü anyugun zen kehun lotse shü.

¹¹A-le ketekho-o a-le dihontse nnya bin yo, a-nyu peche dikho le bin yo, dihontse raja gü le a-penso shüyo, lo raja gü hensin kedanyu dan nyu a-zanchwi yo pe anyugun ka zoshü.

¹²“Tsünyeki rajagi Esther le keho thyüo temi kechanyu nme komvu ai raja gü lo a-npfü no gü, lo senduki ko ayi ko bin nle.

¹³Ai Juda nyu Mordekai le raja kanyu keyütson ka dun kebin then hi aphu a-kon a-ni kendi le.”

¹⁴Tsüselo a-nu lo a-pfünyu aphu a-ka, “Temi hü nrün biin ketetso miter nki thyülo-o lonyüki raja gü ka hilo njüo Mordekai pe tsü ge hüla lo nle nshekerhün thyü keho günyu gü logwa le,” tse zoshü. Haman le hile gwa letse rüchünlo-o, kehü bin thyülo.