Read Southern Rengma Naga ESTHER 6 Bible Online

ESTHER 6 - Southern Rengma Naga bible

ESTHER 6

¹Tsüje raja gü le zhülo mvuo raja kazü rüla thu kebin senryü swüpe a-hi shülo tse ahza shü.

²Lo tsünyu rajabin nyu, raja gü katsen khwen kehü Bigthana lo Teresh au le raja gü boshvula titse rhi kebin Mordekai le zo keshü ko thu kebin swüshü.

³Tsontsin raja gü le ketsoshü, “Higenyu ngun le dihontse Mordekai rühvu lo a-chün thyü shüla?” A-gonyu jule a-jo kenishü, “A-genyu thame thyüshü mvu le.”

⁴“Rajabin nyu ahensin kedanyu nme-e hüle hü mvula? tse raja le ketsoshü. Higwünkho ka Haman le a-le kehübin ndo kebin gü ge Mordekai hüla lotse raja gü kahi titseo yüryü.

⁵Tsügenyu gonyu jule, “Haman le nteno shü titseo hika bin nle,” tse zoshü. Tsontsin raja gü le, “A-no yüryü,” tsonshü.

⁶Tson-o Haman le yüryü ntsin raja gü le a-ka zoshü, “Ale rühvu shünyü sa kethyü temi peha le bin nle. Ano temi higü ge nyu thyüshü tila?” Haman le a-nyunki rüchün-o, “Raja gü le rühvu nyüsa kethyü segü le bin mon? Ale le.”

⁷Tson-o a-le raja gü jo kenishü, “Temi higü genyu nle n npfü sen kehü raja nyu phinya senryü lotse ahza shü. Lo raja nyu tyü pe nnpfü nkeru nnushü.

⁹Tson njüo nhensin nyu teshwe kepfü tsin nyu nme no phinya hidan pe temi gü nben shüo no keru gü ge binlo-o zen nyida gü tsoncho nyu pfüthü gülo. Tson-o teshwe kepfü temi gü no sen-o, ‘Raja gü le rühvu kenyü temi gü ge hihontse ti! tse zolo.’ ”

¹⁰Tsüselo raja gü le Haman ka zoshü, “Whütse phinya dan lo keru ndolo-o Judanyu temi Mordekai rühvu shülo. A-ge nle zokeshü tsü aphu thyüshü. A-le raja kanyu keyü tsonka dun kebin nle hyu loti.”

¹¹Tson-o Haman le phinya lo keru ketsen lo-o phinya dan pe Mordekai nben shü. Mordekai le keru ge binlo lo Haman le mhundyü rio nyida gü tsoncho pfüthü güo temi dan ka: “Raja güle a-le rühvu kenyü temi gü ge hihontse shüti tse zo sen shü!”

¹²Mordekai le ranio raja kanyu keyü tsonki gülo lo Haman le a-pe henpfüo chü a-ka ki gunla.

¹³A-le nyuthyü layo tsü aphu pe a-nu lo a-pfünyu juka zoshü. Tsontsin a-nu lo a-pfünyu ju le a-ka zoshü, “Nle Mordekai sokvulo hobin laso. A-le Judanyu nme, nle a-nyekvulo kemvui. A-le nso kvula tsentsü ti.”

¹⁴Anyugun kenthon kebin ka raja kanyu kedanyu le Haman zen whütse Esther keho ki gü titse ryüla.