Read Southern Rengma Naga ESTHER 7 Bible Online

ESTHER 7 - Southern Rengma Naga bible

ESTHER 7

¹Tson-o raja gü lo Haman au le Esther zen tyütsü titse güla

²gwünhvu ge gü. Vainzu tsü kebin ka raja gü le a-ka shün nishü, “Rajagi Esther, nle nyu lonyü bin nla? Nle aka zoshü lo pe ntsüti. Ale a raja kazü ponhae pe ntsü lati.”

³Rajagi Esther le a-jo kenishü, “Raja gü nle nkendo yatselo akehi thyü pe atsü shüta, a-kenyü gü le nno akeyhun lo atemi dan keyhun kenishü lotse bin nle.

⁴Atemi lo ae dushvula lotse pe jwe laso. Agun jwe pe medo kethyü nti yatse kethyü we, ale tsü pe nkevü mvuo ntsema lati; ai agun nkela lo agun no yhun mvushüla titse bin laso!”

⁵Tsüselo raja Xerxes le rajagi Esther ketsoshü, “Segü le nshvu mvuo tsü hontse thyü titse bin nla? Temi tsügü le diki la?”

⁶Esther le a-jo kenishü, “Agun shwikerüchün, agun nshwe kehü le, temi serikemvu Haman higü hile!” Tsontsin Haman le raja gü lo rajagi au nshvu sala.

⁷Tsüselo raja gü le a-nyunta sao chwi gü raja ka chwinyu yüla. Haman le raja gü le higenyu shaja pe a-tsü titse bin kela hyu shüo rajagi Esther no a-keyhun kenishü lotse hi titse sun bin.

⁸Raja gü le chwinyu hütseo kanyu niyü keryü ka Haman le Esther zhü ge keto-o a-shwikenjün hi kebin hyulo. Hi hyushüo, raja gü le nrao, “Temi higü hile a raja kanyu amhundyü ka rajagi sü titse bin ole?” Raja gü le hi zoshü nyemhun kedanyu jule phi pe Haman pe je lola.

⁹Tsüsika a-zan le Harbonaah tse kethyü nme le zoshü, “Haman le raja gü si keni keshü gü Mordekai hüla titseo a-ka ki kehübin nme ko thyü bin nle, tsüle ketetso le miter nki kenyhun le!” tsonshü. Tsontsin raja gü le, “Haman pe tsü ge hü lalo tse johoshü la.”

¹⁰Tson-o Haman le Mordekai hüla titse thyü keshü ge a-hü la. Tsüsika raja gü nyunkenta le ponlo.