Read Southern Rengma Naga ESTHER 8 Bible Online

ESTHER 8 - Southern Rengma Naga bible

ESTHER 8

¹Tsü jon nyü raja Xerxes le Judanyu shwikerüchün gü Haman hon aphu pe rajagi Esther tsüla. Esther le Mordekai au kenyethyü kebin rüla pe raja gü ka zoshü, tsüsiki Mordekai le raja gü mhundyü kegü khin mvula.

²Raja gü le a-mehor le a-ge kebin benkhin (Haman ben ka khikelo) khipe Mordekai tsüla. Lo Esther le Mordekai no Haman hon kentsen gü thyü lola.

³Tsüselo Esther le raja gü phanyu chetsü lo-o a-ka zoni. Agag tsipwen Judanyu kenrhi gü Haman le thagwakemvu rhi keshü gütsü tha peha thyüo tsü khinla lo tse raja gü ka hishü.

⁴Lo raja gü le suna thün gü keta pe tsügi tsüshü laryü a-le solo njüo zoshü,

⁵“Tsüle raja gü le a-kendo, lo nle aphin rüchün, lo tsüle nmhundyü nyu njü yatselo, nchenoe lesü nme thu pe Agag tsipwen Hammedatha nyugü Haman le keda kazü nyu Judanyu aphu nkela lo tse ahza hoshü kebin dan tsü khinla lo.

⁶Ale dihontse kenke le atemi ge keryü lo ashvunye nyu aphu dukeshvu le ryü yatselo nyhelo tila?”

⁷Tsontsin raja Xerxes le rajagi Esther lo Judanyu temi Mordekai au ka zoshü, “Haman le Judanyu ntsun-o tharhi kethyü genyu ale a-hüla lo ale a-hon pe Esther tsü laso.

⁸Ai raja gü zan nyu lesü nme thuo raja mehor le vükela tsü rhonilo nrün ndi. Tson-e hai le nyu thu nyüyo thu pe Judanyu tsüshü logwa; lo azan nyu thuo raja mehor pe vü shü logwa le.”

⁹Hile shyeshen gü, Sivan shye jon nki kenshen nyü. Mordekai le raja gü hensin kethu nyu koshüo no a-jo dan thu pe India ka gü Sudan keti kazüsakethü 127 aphu nyu Judanyu, ahng nyu, kekvu kesen nyu, lo kedanyu aphu tsüshü. Lesü dan le kazüsakethü nmeme tse tsügü khwe lo tsügü jvü nyu thu shü lo Judanyu khwe lo jvü ka pe Judanyu tsüshü.

¹⁰Mordekai le raja Xerxes zan nyu thu lo-o, raja gü mehor pe vüla-o raja gü keru kenmhe tsin dan ge bin lesü dan kenjü shüla.

¹¹Lesü hidan ka thu keshü le raja gü le nyida lika hika Judanyu no kengü lo-o anyugun ntsenlo gwa. Kazüsakethü lo senye lika hikae terikanyü sen-o Judanyu temi, nmvue nche tenu whe yatselo Judanyu le anyugun whe keryü nyu nkela logwa: aphu dushvu lao anyugun hon khilola logwa.

¹²Ahza higü hile Persia nyu raja kazü aphu nyu jon tho kebin shye tseryü kenyhun, Adar shye jonryü kenshen nyü thyüti.

¹³Hi lope tejvü nme hontse zoshüo kazüsakethü aphu nyu temi aphu no shalo, tson-o Judanyu no jon tsügü le ryülo anyugun shwikerüchün nyu ge khün zolo nrün genyu.

¹⁴Raja gü le johoshü kela hontse raja keru ge kebin dan le nmhesa güla. Lo ahza gü tsü pe nyida günyu Susa ka ko aphu tesha shüla.

¹⁵Mordekia le raja nyu phinya, kenzi lo kechon, linen phi kemeren, lo suna raja perün gingvü kethyü pfüo raja kanyu chwiryü. Tsüselo Susa tsonda nyu temi le nyunkenyü lo shekerhün thyüo nra sen sola.

¹⁶Judanyu le sherhün, nyunbwe, a-kenyü lo kvukelo rüchün bin kela genyu.

¹⁷Nyida lo kazüsakethü aphu nyu raja gü johokeshü swü keshü ka Judanyu le shekerhün thyü shvutio ho pe nyunkenyü thyü. Temi kechon le anyugun nshvulo kela genyu Judanyu thyü lola.