Read Southern Rengma Naga ESTHER 9 Bible Online

ESTHER 9 - Southern Rengma Naga bible

ESTHER 9

¹Raja gü le johokeshü gü thyü nrün, Adar shye jonryü kenshen gü le ryüla, Judanyu shwikerüchün nyu le anyugun so kvulo titse nrin bin. Ai Judanyu le anyugun so kvulo la.

²Raja kazü nyu nyida aphu ka Judanyu dan le anyugun kebin bin ka kengü lo-o anyugun nthyünnyü titse kethyü nyu whe. Lika hikae temi dan le anyugun nshvuo nme-e anyu ntsun mvula.

³Kazüsakethü aphu nyu kedanyu dan- ahng nyu, kekvu kesen nyu, lo raja lothyü kebin nyu aphu Mordekai kenshvu genyu Judanyu keche la.

⁴Raja kazü aphu nyu Mordekai le raja kanyu kekvu nyu nme thyübin lo a-le kvukenye soryü kebin shakü kela genyu.

⁵Tsügenyu JUdanyu le anyugun shwikerüchün nyu ge nyuthyü nyüyo thyülo. Anyugun le zhethon sen tsüdan when-o dushvula.

⁶Susa nyida gü nyue Judanyu le temi tsipvün dushvula.

⁷Tsüdan nyu Hammedatha nyugü Judanyu shwikerüchün gü Haman nyu mitseryü dan ko bin: Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai, lo Vaizatha. Tson-e kanyü we khilo mvu.

¹¹Tsünyü Susa nyu temi dikho dushvu layo pe raja gü ka zoshü.

¹²Tsontsin a-le rajagi Esther ka zoshü, “Susa nyu nti-e Judanyu le Haman nyu mitseryü sin-o temi tsipvün dushvu laso. Lo kazüsakethü dan ki we dihontse lati sela! Ntsoka we nle nyu lonyü bin nla? Tsüthyü shüti. Nle nyu ko lonyü binyo aka zoshü lo, lo thyü shüti.”

¹³Esther le a-jo kenishü, “Raja gü le a-kendo yatselo Susa nyu kebin Judanyu no senduki ko nthu hontse thyüni lota. Lo Haman nyu mintseryü dan simin pe hüla lotse ahza hoshülo.”

¹⁴Raja gü le hihontse lalo tse ahza shüo Susa nyu johoshüla. Haman nyu mintseryü dan simin pe süda yhühyu nyu den la.

¹⁵Adar shye jonryü pezi nyü Susa nyu Judanyu le kequen nilo-o nyida günyu temi tsishen dushvu nila. Ai anyugun le kanyü we khilo mvu.

¹⁶Judanyu kazüsakethü ki kebin dan ko kengüo anyugun ketsenlo. Anyugun le anyu shwikerüchün nyu so kvulo-o anyu nrhi kehü temi yie hentsenyü pvün dushvula. Ai anyugun le kanyü we khilo mvu.

¹⁷Hile Adar shye jonryü kenshen nyü. Tsüsi jonryü pezi nyü we me dushvu sin mvulao anyugun le shekerhün thyüo keho thyü.

¹⁸Lo Susa nyu kebin Judanyu we jonryü pvün nyü shvuti. Anyugun le jonryü kenshen lo jonryü pezi tse anyu shwikerüchün nyu dushvu tseo jonryü pvün kinyu khe kethyü genyu.

¹⁹Tsügenyu rünyi keshe ki kebin Judanyu le Adar shye jonryü pezi nyü shekerhün shvuti jon thyüo keho lo ketyüketsü pe khinyu nyu ketsü jon thyü hü nyo.

²⁰Mordekai le hi rüla thu lo-o nipe Persia nyu raja kazü nyu Judanyu a-khoka lo nithen ki kebin aphu tsüshü,

²¹Chen kechwi Adar shye jonryü pezi lo pvün tsü pe shvuti jon thyüo then lotse.

²²Jon hile JUdanyu le a-shwikerüchün nyu sokvu kelo jon; hi shye ge nyungwakemvu lo shekese kelu pe shekerhün lo nyunkenyü thyü kela gwünkho. Anyugun no jon hi then-o keho thyü lo ketyüketsü pe khinyu nyu ketsü lo kendi nyu tsü lotse zoshü.

²³Tsügenyu Judanyu le Mordekai le zo keshü then-o chen kechwi tejvü higü rühvu tinla.

²⁴Agag tsipwen Hammedatha nyugü Haman Judanyu shwikerüchün gü le- Wheshwi(Nmvue “Purim” tse ko kekü) thyüo Judanyu nkela nrün jon kejülo; a-le anyugun no bin mvushü lati tseo.

²⁵Ai Esther le raja gü ki gü raja gü le ahza thu keshü ka Haman le Judanyu genyu gwakemvu rhibin-o a-npfü a-ge ryülo lo a-nyudan pe hüla.

²⁶Tsügenyu shvuti jon hi pe Purim tse kola. Morddekai lesü gü lo thathyü kela dan aphu genyu,

²⁷Judanyu le anyugun npfü anyugun, anyu nyenyu, lo ligü higü Judanyu thyükelo nyu no chenkechwi Mordedai le zokeshü hontse gwünkho toka jonhvu hi rühvu hüti tse pe tejvü nme thyüla.

²⁸Kethonthen kazüsakethü lo nyida aphu nyu ryü kezhü shenhe ki Judanyu kami aphu no Purim jon hi rüchün lo rühvu hüti tse penla.

²⁹Tsüsika Abihail nyugi rajagi Esther ko a-kekvu nyu Mordekai zen-o Mordekai le himhundyü thu shükela Purim rüla thu nishü.

³⁰Lesü gü le pe Judanyu aphu tsüo nipe Persia nyu raja kazüsakethü 127 ka shü. Tsünyu thu keshü le Judanyu no bwe lo kenshvu ndilo

³¹lo anyugun lo anyu tsipwen no anyugun le tsü nyüo rühvu lo chen kechwi gwünkho nme thyüti tse penlo kela tsü gwünkho toka Purim jon rühvu hülo tse shü. Hile Mordekai lo rajagi Esther au johokeshü le.

³²Esther le Purim tejvü zoketseni keshü gü pe lesü swü nme nyu thu la.