Read Southern Rengma Naga CHWEKETIN 10 Bible Online

CHWEKETIN 10 - Southern Rengma Naga bible

CHWEKETIN 10

¹Tson-o Npugü le Mosa ka, “Gü raja gü teno shülo. Ale anyugun dan nyu nduntho hidan thyüshü nrün genyu raja gü lo a-hensin kedanyu dan nyu thyüpe rüla so,

²lo hagun no ale ndun tho hidan thyüo Ijipt nyu dan thyü kelu keshü rüla pe hagun nyenyu lo hagun nyenyu ju nyenyu ka zoshülo nrün genyu. Hagun aphu ale Npugü letse shaloti.”

³Tsügenyu Mosa lo Aaron au le gü raja gü ka, “Npugü Ibrinyu Sunggigü le kezole, ‘Dithen laki nle tsenyuo ahensin ryümvu bin tila? Atemi dan no arüshvu nrün genyu, anyugun no chwila lo.

⁴Nle nmvu yatselo, ale sendu ki tsekhvu senryü nkazünyu shüti.

⁵Tsüle chonritsin-o nkazü hen shü lati. Anyugun le tegwün le nke kensen lihi-e tyü lati, senbin kebin dan-e tyü kü lati.

⁶Anyugun le nraja ka, nhensin kedanyu dan ka, lo ntemi dan ka aphu kesü thyü lati. N pvübon nyu le ryüo kazü higü nyu yhun kelo ka ryü nthu keti hyu shwi kemvu gwakemvu ketsin thyüti.’ ” Tsonshüo Mosa le rani tinla.

⁷Raja hensin kedanyu dan le a-ka, “Dithen ki temi higü no kenjün kethyü pe ngun tsübin tila? Israel nyu temi dan no anyu Npugü rüshvu nrün genyu chwilalo. Ijipt nke kela shalo mvuzun ole?”

⁸Tson-o Mosa lo Aaron au zen raja gü ki rani ryü laryü a-le au ka, “Hagun le gü Npugü, hagun Sunggigü rüshvu lo gwa le. Ai senyu le gü tila?”

⁹Tsontsin Mosa le, “Agun aphu güti, ntsenyu lo püshünyu dan aphu kesin ti. Agun le agun nyenyu peche lo tenu-e, agun tanyü, tenyü lo methu-e zen güti, Npugü kerühvu nga nme thyü nrün genyu.”

¹⁰Raja güle, “Ale Npugü zan nyu swe-o zo bin nyo ale thame ka-e hagun no tenunyu lo ntsenyu ju zen gü loha! Hagun le gwakemvu rhibin tsentsü laso.

¹¹Kemvui! Hagun le günyü ya tselo pechenyu dan nti chwigü Npugü rüshvulo.” Tsonshüo raja gü mhundyü nyu au hüshwila.

¹²Tsontsin Npugü le Mosa ka, “Nbenshwe pe Ijipt kazü so shüo tsekhvu senryülo. Anyugun le ryüo lihi-e senchwiryü kebin tegwün le jon kensen dan tyü lati.”

¹³Tson-o Mosa le a-thün penso shü, lo Npugü le npho kipon tsangkenbu nme no tsünyü jongwen lo tsüje khensin kazü gü nyu nbu shü. Lonyü gü tsekhvu when senryü shü.

¹⁴Anyugun le a-dan thyü ryüo Ijipt kazü apentha nyu bin lola. Tsüle chon pe himhundyü hyuhü kemvu lo hisiki-e hyuni kemvui thyüla.

¹⁵Tsüle kazü hen pe metsen tsela; anyugun le tegwün le jon kensen lihi-e lo senbin ge terasha dan-e aphu tyüla. Ijipt kazü nyu senbin ge lo kazü nyu-e tehen kenjvü nme ndila.

¹⁶Tsontsin raja gü le nyhun-o Mosa lo Aaron hvu ko shüo au ka, “Ale Npugü hagun Sunggigü mhundyü nyu lo hai mhundyü nyu-e mu laso.

¹⁷Tsügenyu nthu gwen hi akemu jüshülo, lo Npugü hagun Sunggigü no age kesi shaja higü hi sentin lalo tse kehi thyü shüta.”

¹⁸Mosa le raja gü nken chwigü Npugü ka kehi thyüshü.

¹⁹Tsontsin Npugü le npho tsangkenbu kelu pe nkhün tsangkenbu kekvu nme thyüshüla, tsüle tsekhvu dan whün sengü kenhon züdanyu shüla. Ijipt aphu nyu tsekhvu nme bin mvula.

²⁰Ai Npugü le raja gü nyun thyüpe rüla, tson-o a-le Israel nyu dan no chwimvula.

²¹Npugü le Mosa ka, “Nbenshwe pe tsang denzin shülo, kezün nme no Ijipt kazü henlo la nrün genyu.”

²²Mosa le a-ben shwen pe tsang denzin shü laryü Ijipt kazü aphu nyu jonshen züntin tsela.

²³Ijipt nyu le khinyunyu kehyu mvula, tsügwen kho ka temi nme a-ka nken mvula. Ai Israel nyu le kehübin ki we keben le bin.

²⁴Raja gü le Mosa ko shüo a-ka, “Hagun le gü Npugü rüshvu lo gwa le; tenunyu lo ntsenyu ju-e hagun zen gü logwa. Ai hagun tanyü, tenyü lo methu dan we no hiki binlo.”

²⁵Tsontsin Mosa le, “Tsonyatselo nle agun no kerüshvu lo rope kerüshvu thyüpe agun Npugü Sunggigü tsü nrün genyu nyukhu dan khipe agun tsülo.

²⁶Tsügenyu kemvui, agun le agun senru zen agun thenti; nme nti-e khepe agun siki shü kemvui le. Agun npfü nyukhu digü pe Npugü agun Sunggigü rüshvu tiyo kejüti. Lo tsüki gülo kemvu kawe, nyu nyukhu pe a-rüshvu tiyo agun le sha kemvui le.”

²⁷Npugü le raja nyun thyüpe rüla, tson-o a-le anyugun no chwimvula.

²⁸Raja gü le Mosa ka, “Amhundyü ka hü nyao tin la! Ano nhyusin nya! Ale nhyu ni kethyü nyü nle tsünyü siti!”

²⁹Mosa le a-jokenio, “Nle njü le.” “Nle thame ka-e ahyu sin loha.”