Read Southern Rengma Naga CHWEKETIN 11 Bible Online

CHWEKETIN 11 - Southern Rengma Naga bible

CHWEKETIN 11

¹Npugü le Mosa ka, “Ale shaja nme nti nisin pe Ijipt raja gü lo a-temi dan ge shüti. Tsüsiki nyu a-le hagun hoshü ti. A-le hinyu hagun aphu hüshwi lati.

²Ntsoka Israel nyu temi dan ka zoshülo, anyugun aphu no anyugun kajonnyu rakagi lo suna ronyedan hi kü lolo.”

³Npugü le Israel nyu no Ijipt nyu keso pfülo. Ketsin thyü raja hensin kedanyu lo temi aphu Mosa rüchün ngon sala.

⁴Mosa le raja gü ka, “Npugü le zo, ‘Khejenyu tsangluka ale Ijipt nyu dan nyu güti,

⁵lo Ijipt nyu peche nyuri aphu si lati, raja nyugü rajakhün gwen nrün gü ka tsügü do penthu kehügi nyugü keti. Lo senru aphu nyuri gü le si lati.

⁶Ijipt kazü aphu nyu temi le chü nra sen pe himhundyü thame ka-e tsonhü kemvu lo hisi kie tsonsin kemvu thyüti.

⁷Ai tehi-e khun-o Israel nyu temi lo a-senrue ren loho. Tson-o hagun le Ale Npugü, Israel nyu lo Ijipt pe kechacha kethyü gü tse sha loti.’ ”

⁸Mosa le zosin-o, “Nhensin kedanyu le aphu ryü amhundyü nyu nkhün ti, lo anyugun le ano atemi dan aphu zen lo-o chwila lotse aka hiti. Tsüsikinyu ale tinti.” Tson-o Mosa le anyunta sa-o raja gü kanyu tinla.

⁹Npugü le Mosa ka, “Raja gü le nkhwenyümvu binti, ano Ijipt nyu nduntho dan thyü nchon shü nrün genyu.”

¹⁰Mosa lo Aaron au le nduntho hidan hi aphu raja gü mhundyü nyu thyüshü, ai Npugü le anyun thyüpe rüla-o a-le a-kazü nyu Israel nyu dan no chwimvula.