Read Southern Rengma Naga CHWEKETIN 12 Bible Online

CHWEKETIN 12 - Southern Rengma Naga bible

CHWEKETIN 12

¹Npugü le Ijipt nyu Mosa lo Aaron au ka:

²“Hagun genyu shye higü pe chen günyu shye kerigü thyüti.

³Jo hidan pe Israel nyu apentha ka zoshülo: Hi shye jonryü nyü temi nmeme tse a-kakhün genyu tanyü nyu nmvue tenyü nyu nmeme kejü külo.

⁴Kami le temi rho rio tanyü pen tyülo kemvui yatselo, a-kajon gü zen temi nme le dikho tyü logwa yo rüchün-o tanyü nme kenjün logwa.

⁵Hagun le tanyü nmvue tenyü kejü logwa, ai tsüno a-ge tetsin kendi chenme nyu mvuloshvu.

⁶Tson-o shye jonryü pezi nyü ngwengü Israel nyu apentha a tanyü tsü dushvu kü loti.

⁷Temi dan no tezi gü peha pe thyü tsügü tyüla makebin ka gü nyu kakhin kachon hvu lo kakhin soki kepha gü yün lo.

⁸Tsüje thyü rope henkekhü lo kebu no shü kemvu tensü nyütyü ti.

⁹Ketegi nmvue nityü nya, ai apentha ro tyüti, a-pe, a-pha lo a-sen-ari sin-o.

¹⁰Keshanyu-e no bin-o tsang nben nya; nsen yatselo pe rola mvu loshvu.

¹¹Hagun le hihontseo tyüti: hagun sen phinpfü, hagun phakü pfü, lo hagun thün sen-o cho-o tyüti. Tsüle Nkenkela nga pe Npugü, arühvu nrün genyu.

¹²“Ale tsüje Ijipt kazü pfüthü gunti, tson-o peche nyuri boshvu kü lati, temi-e lo nyukhu metse, lo shaja pe Ijipt terodan aphu tsüti. Ale Npugü.

¹³Kakhin kachon ge tezi tsüle hagun le katsünyu bin tse kethyü zansü. Ale shaja pe Ijipt nyu tsü keryü ka, ale tezi hyu shülo hagun nkenla-o kenjün kethyü no hagun ge ryü loho.

¹⁴Hagun le, Ale Npugü, ale dihontse thyü shüyo rüchün hülo nrün genyu jon hinyü nga hümvu loshvu. Ryü kezhü gwenkho aphu hi kerühvu nga mvu loshvu.”

¹⁵Npugü le zo, “Jon tsenyü hagun le kebu no keshü tensü tyünya--kebu shükemvu tensü nti tyü mvu loshvu. Jon kerinyü hagun kanyu kebu aphu khishwila mvuloshvu, kechamvule lihigüe jon tsenyü ja katsü kebu no keshü tyü yatselo a-no atemi thyümvu lati.

¹⁶Jon kerinyü lo jon tsenyü nyü hagun le keteno-o rüshvu ti. Jon tsühvu ka tsü thathyü loho, ai hagun ketyü ketsü ndo logwa.

¹⁷Ale jon hinyü Ijipt nyu hagun zenchwi kela genyu Nga higü zen hülo. Ryü kezhü gwenkho aphu nyu hagun le jon higü rühvuo nga lo.

¹⁸Shye keri gü jonryü pezi nyü ngwün ki gü jon nki nme ngwün gü keti hagun le kebu no keshü tensü lihi-e tyünya.

¹⁹Jon tsenyü kebu nme no hagun kanyu bin nzhü nya, kechamvule phenyü nyue lo tesin metse kebu no keshü tensü tyü yatselo, a-no atemi thyümvu lati.”

²⁰

²¹Mosa le Israel nyu sharhi dan aphu ko shüo anyugun ka, “Hagun nmeme tse hagun kami no Nkenkela nga nrün genyu, tanyü nmvue tenyü nyu kejü külo njüo dushvu lo.

²²Tson-o hyssop chwe me khilo-o pe tezi no shü kenjü khun ka tezi ntsen lo njüo pe kakhin kachon hvu lo a-so kepha gü tsü yünlo. Tsangben kemvu then hagun temi nme-e kamhun ki chwinya.

²³Npugü le Ijipt kazü pfüthüo Ijipt nyu dushvu kegun ka a-le kakhin so kepha gü lo kakhin kachon hvu ge tezi hyu lolo kesi kapu güno hagun kanyu yü gü hagun dushvu loho.

²⁴Hagun lo hagun nyenyu dan no kethonthen tejvü hizen hümvu loshvu.

²⁵Npugü le pe hagun tsüti tse zokenjü kazü günyu yülolo, hagun le hijvü hi thyümvu loshvu.

²⁶Hagun nyenyu le ‘Hijvü hile a-kon le nyula? tse hagun ketsolo,’

²⁷Hagun le, ‘Hile Israel nyu le Ijipt nyu kehü ka, Npugü le Israel nyu ka nkenkela genyu kerüshvu thyüpe Npugü kerhvu le,’ tson zoti. A-le Ijipt nyu dushvula ai Israel nyu nrhoshü,” Tsontsin Israel nyu le khosen-o rüshvu.

²⁸Tsüselo anyugun le gü Npugü le Mosa lo Aaron au ka jo zokeshü tsü thyülo.

²⁹Khejenyu tsangluka Npugü le Ijipt kazü nyu peche nyuri nyu aphu, Raja gü nyu, a-rajakhün gwe kebin gü katsügü do kentsun tsin ki kebin nyugü keti dushvula; lo senru nyu dan aphu dushvula.

³⁰Tsüje, Rajagü, a-hensin kedanyu dan lo Ijipt nyu aphu soryüla. Kamenyu nti-e peche nyurigü sikemvu ka ndi kela genyu Ijipt kazü a phu nyu chü nra pe kesü thyü la.

³¹Tsüje raja güle Mosa lo Aaron au koshüo au ka, “Hai lo hagun Israel nyu dan chwila lo! A kazü nken lalo; gü hai le hi kehü hontse Npugü rüshvulo.

³²Hagun tanyü, tenyü lo methu aphu zen tinla lo. Lo jochü pe ako atsü shülo.”

³³Lo Ijipt nyu le temi dan no whütse anyu kazü gü nkenla lotseo; “Hagun le tinla mvu yatselo agun le aphu kesi so,” tson sola.

³⁴Tsügenyu temi dan le kebu no shükemvu tho yün kebin dan pe phi ka tsera pe anyugun buthun ka shü pen.

³⁵Lo Mosa le Israel nyu ka zokeshü hontse Ijipt nyu ka suna lo rakagi ronye lo phinya dan hilo.

³⁶Npugü le Ijipt nyu thyüpe no Israel nyu rühvuo anyugun le nyu hiyo pe tsüshü. Hihontseo Israel nyu le Ijipt nyu kenya pfü tinla.

³⁷Israel nyu dan le Rameses ka tsonchüo Sukkot nyu gun. Nchetenu sin kemvu le temi ye tsitsero kho.

³⁸Lo temi kecha danda lo tanyü, tenyü lo methu dan-e anyugun sin gü.

³⁹Anyugun le Ijipt nyu kebu no shükemvu tho senchwi keryü tsenlo, kechamvule whütse Ijipt nyu anyugun hüshwila-o anyugun le ketyüketsü nmvue kebu no keshü tensü nda lo fümvu kela genyu.

⁴⁰Israel nyu le Ijipt nyu keyhun le chen tsizio shenryü.

⁴¹Chen tsizio shenryü kepen jon nyü Npugü temi dan aphu Ijipt nken-o tsonchü shüla.

⁴²Kheje me tsü Npugü le khwen tseo Ijipt nyu anyugun zenchwila; tsügenyu ryükejü gwenkho aphu Israel nyu temi le tsüje tsü thyü kenshün pe Npugü tsüo khwebin hü.

⁴³Npugü le Mosa lo Aaron au ka, “Hidan hile Nkenkela nga jvü dan: Tesin no Nkenkela nga chvütyü nya,

⁴⁴ai do ligü higü-e hagun le heilo kelanyu le a-girü layatselo tyü logwa.

⁴⁵Kenjwenyu nmvue jonshe nyu no tsü tyü nya.

⁴⁶Ketyüketsü tsü apentha ka dika nda nron loyo tsünyu tyüla mvulo shvu; tsü sen kamhun ki chwi nya. Lo a-ru nme bosenya.

⁴⁷Israel nyu apentha nga higü zenmvu loshvu;

⁴⁸ai girü kemvu nyu no tsü tyünya. Tesin hagun dan nyu bin tinkelanyu nme le Nkenkela nga nyü yatselo, hagun le a-kami peche aphu giryü la rimvu loshvu. Tsonlo a-le phenyü nyu nme hontseo kengüo nga logwa.

⁴⁹Tejvu gü tsüno phenyü nyu lo hagun dan nyu bin tin kela tesin ge-e kenme ti.”

⁵⁰Israel nyu aphu Npugü le Mosa lo Aaron au ka zokeshü jozen-o tsühontse thyülo.

⁵¹Tsüjon nyü Npugü le Ijipt nyu Israel tsipwen zen chwiryülo.