Read Southern Rengma Naga CHWEKETIN 13 Bible Online

CHWEKETIN 13 - Southern Rengma Naga bible

CHWEKETIN 13

¹Npugü le Mosa ka zoshü.

²“Peche nyuri aphu thyü kenshün pe atsülo, kechamvule Israel nyu peche nyuri lo senru nyuri ligü higü ahon genyu.”

³Mosa le temi dan ka zoshü, “Jon higü rüchün hülo, hagun le medo thyü kebin Ijipt nyu chwiryü kela jon gü hi. Jon hi nyu Npugü le a-kekvu keda sen-o hagun zen chwiryü. Kebu no keshü tensü tyü nya.

⁴Ahib shye ge nthu hagun le Ijipt kheo tin jü nyo.

⁵Npugü le hagun bon nyu dan ka, Kanan nyu, Hitnyu, Amornyu, Hivtnyu, lo Jebusnyu kazü pe hagun tsü titse a-johoshü bin nyo. Tsügenyu a-le hagun zen gun gü kazü kebwe kegwa tsünyu shü lolo, chenkechwi hagun le shyekeri gü ka nga higü zen hüti.

⁶Jon tsenyü hagun le kebu shükemvu tensü, tyü lo jon tsenyü nyü Npugü kerhvu nga thyü mvuloshvu.

⁷Jon tsenyü hagun le kebu keshü tensü lihi-e tyü nya; hagun kazü nyu kebu nmvue kebu no keshü tensü no lika hika bin nya.

⁸Nga solo, hagun nyu peche juka, hagun le Ijipt nyu tin kejüka Npugü le nyuthyü shüyo tsü genyu hagun le thahi aphu thyükebin kon zope anyugun zen shülo.

⁹Hi thyüzen kehü le thapeha pe nben ge phin kenjü nmvue nsenpfü gen shükenjü hontse nno nsi rüchün ni loti. Npugü le a-kekvu kedanyu Ijipt nyu hagun zen chwiryü kela genyu Npugü tejvü kezo lo keswü tsüle hagun no hagun si rüchün loti.

¹⁰Tsügenyu chenkechwi gwenkho tho kenjü gü nyu nga higü zen hüti.

¹¹“Npugü le hagun bon nyu lo hagun ka a-johokeshü hontse hagun zengü Kanan kazünyu shüti. A-le tsüpe hagun ketsü ka,

¹²hagun le peche nyuri gü pe Npugü tsümvu loshvu. Nsenru aphu peche nchelo kerigü tsüle Npugü hon,

¹³ai gada nyu sunka tanyü nyu pe kerüshvu thyüo tsü heinilo la mvuloshvu. Lo nle gada gü tsü heinilo nyümvu yatselo a-gunda bosela mvuloshvu. Lo nnyu dan nyu peche nyuri lihigü nle hei lola mvulo shvu.

¹⁴Hisiki, nnyu le hithen kehü hile nyu genyula tse ketso lo nle a-ka, ‘Agun le Ijipt ki medo thyü kebin ka Npugü le kekvu keda sen-o agun zen chwiryü lale tse zoti.

¹⁵Ijipt raja güle a-nyunrüo agun hoshümvu kela ka, Npugü le Ijipt kazünyu temi lo senrue nyuri gü aphu dushvu la le. Tsügenyu agun le senru peche nyuri lihi-e pe Npugü rüshvu hü, ai temi peche dan we heinilo la hü nle.

¹⁶Hithen kehü hile thapeha pe agun ben ge phinpfü, nmvue agun senpfü ge shüpfü kehü hontse agun sirüchünni loti; tsüle Npugü le a-kekvu keda sen-o Ijipt nyu agun zenchwi keryü agunno rüchün loti.’ ”

¹⁷Ijipt raja güle temi dan hoshü kela ka, Sunggigü le a nyugun zen-o Filistian nyu kazü tson gunmvu, tson tsügü le zükvu-e. Sunggigü kerüchün le, “Temi dan le teri teno lolo rani Ijipt ki tsüla lo keshvu genyu.”

¹⁸Tsonkethyü gü mvu le a-le anyugun tsonrio tehenyhun kemvunyu vüho-o Zükenhon Zida kipon gun. Israel nyu dan le terithyü nrün gwe nda pfühü.

¹⁹Mosa le Josef kesi mi pfühü, Josef le Israel nyu dan no swe-o johoshü kenjü hontse. Josef le anyugun ka, “Sunggigü le hagun kenikeshü nyu bin hinyu amin sentin lalo,” tsonzo shü.

²⁰Israel nyu le Sukkot nyu tsonchü gü tehenyhunkemvu te Etham ka binlo.

²¹Nhenyu Npugü le nmhu chweme nyu anyugun tsontsin lo kheje ki lo mah chweme nyu anyugun gwenben hü, tson-o anyugun no kheje ki lo nhenyue tsonchülo nrün genyu.

²²Nhenyu nmhu chwe gü lo kheje ki mah chwe gü le temi dan mhundyü bin zin hü.