Read Southern Rengma Naga CHWEKETIN 14 Bible Online

CHWEKETIN 14 - Southern Rengma Naga bible

CHWEKETIN 14

¹Npugü le Mosa ka,

²“Israel nyu temi dan no ranio Pi Hahiroth mhundyüzin Migdol lo Kenhon Zida gü au janyu, Baal Zefon kho ka sunlo lotse zoshülo.

³Raja gü le Israel nyu dan le lojvü nyu nmhon-o tehen nyu anyugun khinpfü kebin giso tse rüchünti.

⁴Tson-o ale a-nyun thyü pe rüla-o, a-le hagun sithen ryülo, ale raja lo a-rihüdan so kvuo azan kechwi thyü loti. Tsüka Ijipt nyu le ale Npugü letse sha loti.” Israel nyu le tsühontse thyülo.

⁵Ijipt raja güka temi dan le tinla sele tse zokeshü ka, a-e lo a-hensin kedanyu le anyugun nyu kelunio, “Israel nyu no ngun do thyü kebin nyu tinkela hile ngun le nyuthyü la sela?”

⁶Tson-o raja güle a-terigari lo a-rihüdan ndalo.

⁷A-le a-kerugari dan aphu, a-kegwa tsin tsitsero dan-e sin, kedanyu dan no ketsen külo-o tsonchü shü.

⁸Npugü le raja gü nyuthyü pe rüla, tson-o a-le kvuo tin kejü Israel nyudan hü gunla.

⁹Ijipt nyu rihü dan le anyugun keru, kerugari lo tsü kesen nyu aphu anyugun sithen gü Kenhon Zida ka Pi Hahiroth lo Baal Zefon khoka a-nyu kensenbin ka anyugun hü lola.

¹⁰Israel nyu le raja gü lo a-rihü dan le anyugun ntsun ryü kezhü hyushüo nshvu sala, tson-o nrao Npugü ka keche hishü.

¹¹Anyugun le Mosa ka, “Ijipt nyu sika ndio, nle agun zenryüo hiki tehen yhunkemvu bin ki agun no sila titse ole? Nle nyuthyüo Ijipt nyu agun zenchwiryü yo, shwishüta!

¹²Hihontse kelai letse agun le Ijipt nken kemvu ka nka hoshümvu ole? Agun no agun keshathyü Ijipt nyu dothyü bin lotse agun le nka zoshü. Ryüo hiki tehenyhunkemvu bin ki sikela gümvule tsüki medo thyü kebin gü we gwakvu.”

¹³Mosa le temi dan ka, “Nshvu nya! So matse binlo, nthu Npugü le nyu hontse thyüo hagun kenishü tiyo hagun le hyuti; hagun le Ijipt temi hidan hi hyu sin loha.

¹⁴Npugü le hagun genyu teri thyüti, hagun le thame thyümvue gwa.

¹⁵Npugü le Mosa ka, “Nle nyuthyüo keche hi bin nla? Temi dan no mhundyü tsonchü shülo tse zoshülo.

¹⁶Nthün penso lo-o keta pe Zida so ge shülo. Zü güle kenjünkho la-o Israel nyu dan le Zida gü pfüthüo kazü kesin ki güla nrün genyu.

¹⁷Ale Ijipt nyu nyun thyüpe rülati, tson-o no anyugun sithen güti, lo ale raja gü, a-rihüdan, a-kerugari dan, lo tsü kesen nyu sokvu lo-o no arühvu loti.

¹⁸Ale anyugun nyekvu kela ka, Ijipt nyu le ale Npugü tse sha loti.”

¹⁹Tson-o Sunggigü lokethyü, Israel nyu rihüdan mhundyü rikehü gü tsüle ketu-o anyugun sizin güla. Lo nmhu chwe gü ko ketu-o,

²⁰Ijipt nyu lo Israel nyu au jaka sun lola. Nmhu güle Ijipt nyu genyu kezün thyüla, ai keben khipe Israel nyu tsüshü, tson-o khensin rihü dan le khinyunyu khonni gü mvu.

²¹Mosa le a-benshwe pe Zida gü soshü, laryü Npugü le npho zin tsangkenbu kenko nme no Zida gü whün tesen nila. Tsüle khensin nbuo Zida gü no kazü kesin thyüla. Zü kenjünkhola,

²²lo Israel nyu le kazü kesin nyu Zida pfüthü güla, lizin hizin züle kabon hontsela.

²³Ijipt nyu le anyugun keru, kerugari, lo tsü kesen nyu aphu zen-o anyugun hü gü.

²⁴Tsangben gü kejü ka Npugü le mah chwe lo nmhun chwe ge Ijipt nyu rihü dan nri shüo anyugun pe thyülo keshvu nyu shüla.

²⁵A-le anyugun kerugari pha thyüpe nsüla, tson-o ketu rüsala. Ijipt nyu le “Npugü le Israel nyu nopen-o ngun ntsun bin laso. Ngun tin la tile khun!” tsonso.

²⁶Npugü le Mosa ka, “Zü gü no Ijipt nyu lo anyugun kerugari lo tsü kesennyu so ryü la nrün genyu nben shwepe Zida gü so shülo tsonshü.”

²⁷Tsügenyu Mosa le tsangben chwikeryü ka a-ben keta pe Zida gü soshü laryü a-bin ka niryüla. Ijipt nyu le Zü gü nken lati tseso, ai Npugü le anyugun shwe pe Zida günyu shüla.

²⁸Zü gü le rani ryüo Ijipt nyu kerugari, tsü kesen nyu, lo rihü dan Israel nyu hüo Zida günyu keyü nyu aphu kemihen lola; anyugun nme-e nsenmvu.

²⁹Ai Israel nyu dan we lizin hizin zü le kabon hontseo kazü kesin nyu Zida gü pfüthü-o tsonchü chwila.

³⁰Tsünyü Npugü le Ijipt nyu ben nyu Israel nyu kenilo, lo Israel nyu dan le Ijipt nyule Zida seki si kebin hyu.

³¹Israel nyu le Npugü le kekvu keda sen-o Ijipt nyu nyeki kvu kela hyu shüo Npugü nshvu la; lo anyugun le Npugü lo a-gogü Mosa tenyen lo.