Read Southern Rengma Naga CHWEKETIN 15 Bible Online

CHWEKETIN 15 - Southern Rengma Naga bible

CHWEKETIN 15

¹Mosa lo Israel nyu dan le lü hi thyüpe Npugü kishü: “Ale lü thyüpe Npugü ki shüti, a-le gingvu tse kvulo kela genyu; a-le keru dan lo tsüge kedun dan shwe pe Zida günyu shü laso.

²Npugü le a kesun kenko gü; a kenikelo gü tsüle a-le. A-le a Sunggigü, lo ale a-shwe ti, A pvü Sunggigü, ale a-keda rüla zo lü thyüti.

³Npugü le teri kekvu nyu nme; a-zan le Npugü.

⁴“A-le Ijipt nyu rihüdan lo anyu kerugari dan shwe pe Zida nyu shüla; kedanyu kegwatsin dan le kenhon Zida nyu nrheshvu la.

⁵Zida kentsun le anyugun henla; anyugun le tso nme hontse zithin ki jonphün laso.

⁶“Npugü nben nzhüzin le kvupe ndun thyüle; tsüle shwikerüchün dan bothürü laso.

⁷N terünkepfü kekvu nyu nle nshwikerüchün nyu hü pe shwen laso; N nyunkekhü le nnyüchwiryüo npenkon kero hontse anyugun rolaso.

⁸Nle Zida vüshü lo zü le khwe tetso la; tsüle so pe kabon nme hontsela; Zida gü kentsun tsin kile nko la.

⁹Shwikerüchün nyu le zo, ‘Ale anyugun hüo anyugun tün loti; Ale anyugun kenya kenjün loti lo ale lokenyü aphu khi loti; Ale a zhethon tho lo-o anyugun hon kebin aphu khilo ti.’

¹⁰Ai Npugü, nle gwengwa nmhü keshü ka Ijipt nyu dan le zünyu nrheshvu laso; anyugun le guli hontse zü kenrin kethyü nyu jonphün yülaso.

¹¹“Npugü, teronyu dan nyu segü le nhontse ola? Segü le nhontse, Kenshün nyu ndun thyü ola? Segü le nhontse nduntho lo kekvu dan thyülo gwa tila?

¹²Nle nben nzhügü ketashü laryü kazü gü le agun shwikerüchün nyu nyilo laso.

¹³Nle zokenjü hontse nle rhinhilo kela ntemi dan tson tsin; nkekvu ka nle anyugun tsontsin pe n kazü keshün günyu shülo laso.

¹⁴Tsipwe dan le nyülo-o, anyugun kensü bin nyo; Filistian nyu le a-kekerü thyü bin nyo.

¹⁵Edom nyu sharhi dan le a-kerü laso; Moab nyu temi kekvu dan le a-kensü bin nyo; Kanan temi dan le a-kepeche ndi laso.

¹⁶A-kerü lo kenshvu le anyugun gen bin. O Npugü, anyugun le nkekvu hyu shüo n temi-- nle donyu rhinhilo kela dan le nken tinla kemvuthen nshvu pe rhokedyü thyüo so bin nyo.

¹⁷Nle anyugun zenryüo nkazüthun ge sen shüti, Npugü, nle nka thyüti tse, kejü kelo bin gunyu n npfü nben pe Kerüshvuka gü thyüshü.

¹⁸Npugü, Nle kethonthen raja thyüti.”

¹⁹Israel nyu le Zida lvunyu kazü kesin ka tsonchü chwila. Ai Ijipt nyu le anyugun kerugari, keru lo tsü kesen dan zen-o zida gü nyu yükelo ka, Npugü le zü senryüo anyugun kemihen la.

²⁰Aaron lügi Miriam sidyükesha gi, le tambourin senlo, lo tenunyu dan aphu tambourin sen a-sithen-o nashü.

²¹Miriam le anyugun ge nyu lüthyüo: “Lüthyüpe Npugü ki shülo, a-le zankechwi thyü kvulo kela genyu; a-le keru lo a-ge kebin dan shwe pe zida günyu shü laso.”

²²Mosa le kenhon zida ka Israel nyu zen-o Shur tehenyhunkemvu gü nyu ryülo. Jonshen anyugun le tehen gü pfüthü gun-e zü hyulo mvula.

²³Tson-o anyugun le Marah tse ko kehü bin nme ka ryülo, ai tsüka zü le khürio anyugun le tsülo shvula. Tsügenyu tsü zan pe Marah tho.

²⁴Temi dan le Mosa ka kenyao, “Agun no nyu tsü tila?”

²⁵Tsontsin Mosa le Npugü ka hishü, tsüka Npugü le sen bin me tsinpe a-hishüo a-le tsüpe zünyu shweshü laryü zü güle tsü gwala. Tsüka Npugü le anyugun no then-o yhun nrün tejvü dan pe anyugun tsüshü lo tsüka a-le anyugun kegwa keshvu shwishü.

²⁶A-le anyugun ka, “Hagun le ale nyule njü letseyo tsüthyüo ajo zenpen lo ajo hokeshü dan thyüzen hüyatselo, ale senryü Ijipt nyu ge keshü kethyü kenyü tsü nme-e pe hagun ge shü loho. Ale Npugü, hagun thyü kesherhün shü kehü gü le.”

²⁷Tsüsika anyugun le Elim ka ryülo, tsüka zükenthün bin tseryü kenyhun lo palm bin hentsenyü le bin; tson-o anyugun le zü khoka nsenlo.