Read Southern Rengma Naga CHWEKETIN 18 Bible Online

CHWEKETIN 18 - Southern Rengma Naga bible

CHWEKETIN 18

¹Midia nyu Püshükedagü Jethro, Mosa a-migü le Sunggigü le Ijipt nyu Israel nyu zenchwi keryü ka Mosa lo Israel nyu genyu thyükeshü rüla aphu nyülo.

²Tsügenyu a-le Mosa le a-nu Zipporah nipe kaki shükela gü zen-o Mosa ki ryü,

³lo anyu Gershom lo Eliezer au kotse. (Mosa le, “Ale sinrünyi ki tesin thyühü nle,” tson-o a-nyu nme zan pe Gershom tholo.

⁴A-le zonio, “A-pvübon nyu Sunggigü le Ijipt nyu raja gü le adushvu lalo kegwanyu akecheshü lo akenishüle,” tson-o a-nyu kechagü zan pe Eliezer tholo.)

⁵Jethro le Mosa nu lo a-nyu hvu zen-o tehen nyu Mosa le kazüthun kenshün gü ka nsen kebin ka ryü.

⁶A-le anyugun le ryüjü nle tse jo sinpe Mosa tsüshü.

⁷Tsü genyu Mosa le a-teno titse chwigü a-kelu-o a-nboshü. Tson-o anyugun le khinyunyu rüla ketso shüo Mosa phikanyu yüla.

⁸Mosa le Jethro ka Npugü le Israel nyu kenilo nrün genyu Ijipt nyu raja gü lo a-temi dan ge thyükeshü aphu joshü. Lo a-le temi dan le tsonnenyu thakerü teno kelo ka dihontse Npugü le anyugun kenishü yo tsü rüla ko zoshü.

⁹Jethro le hi aphu nyülo njüo a-sherhün-o,

¹⁰“Ijipt nyu temi lo raja gü bennyu hagun kenikeshü gü Npugü shwe! Donyu a-temi dan kenikeshü gü Npugü shwe!

¹¹Ntsoka we ale Npugü le tero aphu nyeki gonkvu tse kethyü sha laso, Ijipt nyu le Israel nyu süjünmvu kebin ka a-le hihontse thyü keshü genyu.”

¹²Tson-o Jethro le apentha rope kerüshvu nme lo kerüshvu kecha-e thyüpe Sunggigü kishü; Aaron lo Israel nyu sharhinyu aphu a-zen gü kerüshvu tho thyüo kenshün chvu tsü tyü.

¹³Tsüsinyü Mosa le dun-o temi dan le kenya kebin jünkera, lo a-le lonyü gü kheje ki keti rabin.

¹⁴Jethro le Mosa le temi dan genyu tha aphu thyü kebin hyushüo Mosa ka, “Nyuthyüo nle temi dan genyu hi aphu thyü bin nla? Nle nyuthyüo nnpfü aphu thyüo temi no lonyü gü kheje ki keti so-o nhunpfü bin hü nla?”

¹⁵Mosa le, “Temi dan le Sunggigü kendasha nyüo aki ryü kebin genyu ale hon mvulo shvu la hü nle.

¹⁶Temi mihvu le kenya lolo, au le akiryüo ale digü le njü yo pen pe tsü hü, lo ale Sunggigü johokeshü lo tejvü dan zope hishü hü nle.”

¹⁷Tsontsin Jethro le, “Nle thyü kebin tsüle gwa mvu.

¹⁸N-e lo temi dan-e hokeli kelai le. Nle nnpfü hi thyüti tse kethyü tsenri.

¹⁹Ale thakegwa peha rhipe ntsü tile, lo Sunggigü le nzen hüti. Nle temi dan sunthyü lo anyugun le kenya kebin sen-o Sunggigü mhundyü nyu gü kethyü tsüle njü.

²⁰Nle Sunggigü johokeshü dan pe anyugun senthyü lo anyu no dihontse yhun lo nyuthyü mvulo shvuyo zokekho pe anyu zenmvu loshvu.

²¹Tsünyeki temi aphu dannyu thathyü lo kekü Sunggigü kenshvu, tenyenlo kekü, lo jwe ntsü kehünyu kejü pe no yie, tsi, henpvün lo tseryü so sharhinyu thyülo.

²²Tson-o tsüdan no gwenkho aphu ka temi dan jünkera pe tsülo. Anyugun no a-kerü dan aphu sen nki ryülo, ai kenyakenyü keshe dan we anyugun no kerathü pe tsü lalo. Anyugun no keche-o nkhvu pfü keshü güle ngenyu nne ti.

²³Nle hihontse thyülo yatselo, Sunggigü le johokeshü hontse nle nhokelila loho, lo temi hidan aphu anyugun jünpen lo-o kaki gun loti.”

²⁴Mosa le Jethro khwenyüo,

²⁵Israel nyu aphu dannyu tha thyülo kekü temi kejülo. Yie, tsi, henpvün lo tseryü so sharhi kejü külo.

²⁶Tson-o anyugun no gwenkho aphu ka temi dan jün kera pe tsü, jokerü dan sen-o Mosa ki ryü, ai keshe dan we anyugun npfü penla hü.

²⁷Mosa le Jethro kelushüo no ranio a-kaki gunla.