Read Southern Rengma Naga CHWEKETIN 19 Bible Online

CHWEKETIN 19 - Southern Rengma Naga bible

CHWEKETIN 19

¹Israel nyu le Ijipt nyu chwikeryü shyeshen gü jon kerinyü Refidim kheo Sinai tehen gü nyu ryüo, Sinai kazüthun phaka anyugun kensenbin thyülo,

³tson-o Mosa le Sunggigü teno titseo kazüthun gü ge küla. Kazüthun gü ge Npugü le a-ko shüo a-no Israel nyu, Jakob tsipwen dan ka zoshü lo tseshü:

⁴“Ale Npugü, Ijipt nyu ge nyu thyü shüyo, lo ale logi le a-sekin ge a-nyupfü kehü hontse hagun zenryü hiki aki shü loyo hagun le hyu laso.

⁵Tsügenyu hagun le ajonyü, lo azen kejozen kelo thyüzen hü yatselo hagun le atemi thyüti. Kazü apentha ahon, ai hagun le ale kejü kelo temi thyüti,

⁶thyükenshün pe a npfü aketsü thyüo püshü kedanyu thyü alothyü hüti.”

⁷Tson-o Mosa le tsenryüo temi dan sharhinyu ko kequen shüo Npugü le a-ka johokeshü dan aphu pe anyugun ka zoshü.

⁸Tsü selo temi dan le aphu kengüo, “Agun le Npugü le zokeshü aphu thyüti tsonshü,” lo Mosa le tsüpe Npugü ka zoshü.

⁹Npugü le Mosa ka, “Nthu gerho temi dan no ale nzen kenthon kebin khwenyüo ntenyen lo nrün genyu ale nmhu kezün nme ge nki ryüti.” Mosa le temi dan jo pe Npugü ka zoshü,

¹⁰lo Npugü le Mosa ka, “Temi dan ki gü anyugun no rüshvu nrün genyu nthu lo sendu anyugun thyü kenshün lolo tse zoshülo. Anyu no anyugun phinya thula mvuloshvu,

¹¹tson-o haduki genyu ndalo. Tsünyü temi aphu kehyu ka ale Sinai kazüthun ge tsenryüti.

¹²Temi dan no nken gü mvu nrün genyu terhi nme thyüpe kazüthun gü hunla, lo anyugun no kazüthun gü ge kü nmvue tsü kho nni nyalo tse zo shülo. Lihigü a-pha pe tsü kedyü kethyü gü no si lati;

¹³temi nme no a-kesü nyao tso pe jon nmvue levü pe shwe shvula mvuloshvu. Temi-e lo nyukhue tsühontse boshvu la mvuloshvu. Shu gü khun shülo temi dan no kazüthun gü ge küryüti.”

¹⁴Tson-o Mosa le kazüthun güge tsenryüo temi dan no rüshvu nrün genyu ndalo lotse zoshü. Tsügenyu anyu le phinya thula,

¹⁵lo Mosa le anyugun ka, “Hadu ki genyu nda binlo lo tenunyu kho nni günya.”

¹⁶Jonshen nyü lonyü gü tsangsen, tsangpera thyü nmhukezün nme le kazüthun gü henlo la lo shukhun tetsosa kethyü khwen nme nyülo. Tsontsin kensenbinnyu kebinnyu aphu nshvuo a-kensü sola.

¹⁷Tson-o Sunggigü teno titse Mosa le kensenbin nyu temi dan zenchwiryüo, kazüthun gü phaka solo.

¹⁸Lo Sinai kazüthun apentha mah kekhu le jeh pfülo la, Npugü le mah nyu tsüge tsangkeryü genyu. Mami kekhu hontse mah le khukü sola lo temi aphu a-kensü sa lola.

¹⁹Shu kekhun khwe gü le tetso ketsintsin tse so laryü Mosa le jo zoshü lo Sunggigü le tsangkesen nyu a-jo kenishü.

²⁰Npugü le Sinai kazüthun ra ge tsüryüo Mosa no kazüthun ra ge küryü lotse koshü. Tson-o Mosa le küla.

²¹Npugü le a-ka, “Tsen gü temi dan no terhi nkenryü a-nrimvu nrün genyu petsü lolo tse zoshülo; anyugun le tson yatselo anyugun kechon le si lati.

²²Püshükeda dan akho nniryü kehü dan-e no anyu npfü anyuthyü kenshün la kemvu we ale shaja pe anyugun tsüti.”

²³Mosa le Npugü ka, “Temi dan le küryü lo kemvui, nle agun no kazüthun gü le nshün letseo terhi thyüpe hun kela genyu.”

²⁴Tsontsin Npugü le, “Tsengü Aaron zen lo-o küryülo. Ai Püshükeda dan lo temi dan no terhi nken-o aki ryünya ryüya tselo ale shaja pe anyugun tsüti.”

²⁵Tson-o Mosa le tsengü Npugü le nyuzo shüyo pe temi dan ka zoshü.