Read Southern Rengma Naga CHWEKETIN 21 Bible Online

CHWEKETIN 21 - Southern Rengma Naga bible

CHWEKETIN 21

¹“Tejvü hidan pe Israel nyu tsü shülo:

²Nle Ibrinyu do nme hei loyatselo a-le chen tsero ngo thyüti. Chen tsenyü gü ka a-mi thame lomvu tse a-hoshü lati.

³A-le a npfü ryüya tselo a npfü tinti; lo a-le tenu lozenryü yatselo a-nu zen-o tinti.

⁴A-npugü le a-nu lope a-tsüo anyu peche nmvue tenu nnyu pe a-tsülo, a-nu lo a-nyenyu dan le a-npugü hon thyüti, lo a-le a-npfü chwiti.

⁵Ai do güle ale a npugü, a-nu lo anyenyu dan so hü nle, ale do hinyu chwimvu le,

⁶tsonyatselo a-npugü le a-zen-o kerüshvubin gü ki ryüti. Tsüka a-no kakhin nmvue kincha kachon ka so lo-o a-npugü le a-yhütin bünphe lati. Tson-o a-le a-yhunthen a-go thyüti.

⁷“Temi nme le a-nyugi jwe pe dothyü layatselo pechenyu do hontse tsügi hoshü la loho.

⁸Temi peha le tsügi pe a-nu thyü titse hei lo-o a-kenyümvu yatselo, tsügi khinipe a-pfü ka jwe niti; a-npugü le a-khipe tesin ki jwe lo nrün ndi, a-le tsügi ge a-zümvu kela genyu.

⁹Temi nme le a-nyu gü tsü nrün genyu tenunyu do heilo yatselo pe a-npfü a-nyugi hontse ti.

¹⁰Temi nme le tenu kecha nme losin yatselo, a-nu kerigü ge himhundyü hontse ketyü-ketsü, phinya lo a-kenjü tsüno bin mvuloshvu.

¹¹A-le tsügi ge tha hidan hi thyüshü mvuyatselo, tsügi no thame pe a-tha mvutse a-le tsügi hoshü la mvuloshvu.

¹²“Ligü higü mevü shüo no sila yatselo a-ko no siti.

¹³Ai tsüle shwenron thyümvu le thyüzü kela nme yatselo, a-no tin-o chwilo nrün genyu ale bin nme kejü pe ntsüti.

¹⁴Ai temi nme le anyunta kelo ka shwenron thyüo temi kechanyu boshvu laya tselo, a-le a-kenilo titseo akershvubin ka tin gü la-e a-no siti.

¹⁵“Lihigü a-pvü a-jvü kevü nyu no siti.

¹⁶“Lihigü temi rühu yatselo jwe la-e lo a-ben nyu bin-e no siti.

¹⁷“Lihigü shochün pe a-pvü a-jvü ketsü gü no siti.

¹⁸“Kega-o temi nme le tso pe nme jon nmvue jenthün pe jen ai boshvu la mvu yatselo shaja pe a-tsünya. Mele vükela gü tsüle a-zhüka zhütseo,

¹⁹kenkhin ki solo-o thün sen ndalo lo, a-vü keshü gü no a-jon kegwenchün thyü lo a-le gwalo kemvuthen anucha ti.

²⁰“Temi nme le thün pe a-go peche nmvue tenu vüo a-bin ka sila yatselo, temi tsügü le shaja hyu loti.

²¹Ai do güle khenyü me jonhvu jaka simvu yatselo shaja pe a-npugü tsü loho. A-hon nkekela tsüle a-shaja kela genyu.

²²“Peha le kega bin-o nyuphou kepfünyu nme jün la-o no a-nyu nrhila, ai kejünkeja kecha we thyümvu yatselo, a-jün kela gü no tenugi nyepvü le lihi zoshüo jün keranyu le pen keshü gü pe thoti.

²³Ai tenugi ge keshvu le ryüla yatselo, shaja gü le temi phou sun temi phou,

²⁴pha sun pha,

²⁵kero sun kero, tejün sun tejün, kevü sun kevü no binti.

²⁶“Temi nme le a-go peche nmvue tenu vüo a-yhütyü gwamvu layatselo, yhütyü gü genyu a-hoshü lati.

²⁷A-le a-go gü nmvue go gi hü nme boryü layatselo hü tsügü genyu a-hoshü lati.

²⁸“Methu tse nme le me senshvu layatselo, tso pe jonshvu lati, lo a-thyü tyü loho; ai shaja we pe a-npunyu tsü loho.

²⁹Methu tse güle mesen kehü tsüpe a-npunyu tesha la; ai ntsenlo mvuo no me senshvu layatselo, tsope tsü jonshvu lati, lo methu tsü npugü kono siti.

³⁰Tson-e keshanyulaka methu npugü no a-phou sun tholo tse yatselo dikho hiyo tsüpe thoti.

³¹Methu tse güle ntsenyu peche nmvue tenu senshvu-e a-jvu le kemeti.

³²Methu tse güle do peche nmvue tenu-e senshvu layatselo a-npugü no raka shenryü pe do npunyu tsüti lo tso pe methu tse gü jonshvu lati.

³³“Temi nme le chwen nme sühvu; nmvue tso shüo methu tse nmvue gada nme le tsünyu che lalo,

³⁴a-le tsügü mi thoti. A-le pisa pe nyukhu npugü tsü lao a-kesi gü khilo ti.

³⁵Temi nme thutse le kechanyu thutse senshvu lalo, au le a-kerhün gü jwe kenjün ti, lo kesi gü thyü ko kenjün ti.

³⁶Ai a-npunyu le methu tse gü le mesen kehü shabin-e ntsenlomvu layatselo a-le methu tse gü sun methu tse pe kethun ti, ai a-le nyukhu kesi gü khiloti.