Read Southern Rengma Naga CHWEKETIN 22 Bible Online

CHWEKETIN 22 - Southern Rengma Naga bible

CHWEKETIN 22

¹“Temi nme le methu nmvue tanyü rühu pe dushvula nmvue jwe laya tselo, a-le methu nme sun methu pvün lo tanyü nme sun tanyü pezi pe tha mvuloshvu.

²A-le nyu rühu lo layo tsü sun khishüti. A-le thame ndi yatselo a-jwen pe a-le rühu lo kela pu tsü thoti. Rühu lo kela senru güle methu, gada nmvue tanyü-e a-kerhün sen kehü hyulo lo nme ge kenyhunyhun pe thoti. “Kerühu nyu nme le khejenyu meka rhebin-o dushvu laya tselo, a-dushvu kelo gütsü le teshü thyü kela pe nmu loho. Ai tsüle nhenyu yatselo teshü kethyü pe nmu ti.

⁵“Temi nme le a-senru no low nmvue vain low nme nyu a-chü tsütyü tseo gü kecha nyu low nmvue vainsha tyüla yatselo a-npfü a-lo nmvue vainsha kegwa tsin pe thoti.

⁶“Temi nme le a-low nyu mah thyü shüo tsüle tehen nro gü kechanyu low nyu logvü kemvu nmvue gvü kenjü rola yatselo, mah nro keshü gü no kenkie tsü thoti.

⁷“Temi nme le a-kendao me raka nmvue a-minketsen kanyü pe a-kanyu ntsen bin-o mele rühu lola, tson-o kerühu gü shalo layatselo a-no tsü jünhvu pe thoti.

⁸Ai kerühu gü shalomvu layatselo, kanyü ntsen kebin gü zen kerüshvubin gü ka ryüo, a-no kechagü kanyü tsü a-le rühu mvu letse swe ti.

⁹“Kekevü lihi-e, methu, gada, tanyü, phinya nmvue kanyü kecha-e nmhen kelagenyu yatselo ketesu kebin hvu zen-o kerüshvubin gü ka ryüti. Tson-o Sunggigü le nmu kela gü tsü no jün hvu pe kechagü thoti.

¹⁰“Temi nme le a-kendao kechanyu gada, methu, tanyü mvue senru kecha ntsen bin-o, sila, nmvue jünla, nmvue mele hüzen tinla-o temi nme hyumvu,

¹¹yatselo temi tsügü no kerüshvubin gü ka gü a-le kechanyu gü senru tsü rühu lola mvu letse swe ti. Senru npugü le keswe tsü nyüshüti tson-o kecha gü le a-thomvue gwa;

¹²ai senru gü rühu lola yatselo, a-le senru npugü tho mvu loshvu.

¹³Tehen thyü le tün laya tselo, temi güno tehen thyüle tünla ketsin tse kethyü tyükensen senryüti, tehen thyü le tün kela genyu tsü a-le tho mvue gwa.

¹⁴“Temi nme le kechanyu senru tepu senryüo a-npunyu kendi ka tsüle sila nmvue jünla yatselo a-le tsü tho mvuloshvu.

¹⁵Ai a-npugü le kehü ka yatselo, temi güle tsü tho mvue gwa. Tsü ngulo yatselo, a-ngu le kenke kethun ti.

¹⁶“Temi nme le lünyu phousen mele ketsomvuzun kethyü sazen gü nrhula yatselo, tümi thyüo tsügi pe a-nu thyümvu loshvu.

¹⁷Ai a-pvü le tsügi pe a-tsümvu yatselo, a-le phousen nyu mikho pisa pe tenu gi a-pvü tsümvu loshvu.

¹⁸“Tenunyu temvu kehü nyu lihigü boshvu lamvu loshvu.

¹⁹“Nyukhu zenzhü kethyünyu lihigü boshvula mvu loshvu.

²⁰“Ligü higü kerüshvu thyüpe Npugü ntimvuo tero kecha kerüshvu gü boshvu lamvu loshvu.

²¹“Tesin ge a-zükemvu thyü mvue nshwe nya; hagun ko Ijipt ki tesin thyühü tse rüchün lo.

²²Maginyu nmvue tegonyu nshwe nya.

²³Nle anyugun nshweo anyu le aka keche hi shülo ale anyugun kehi thyüshüo,

²⁴anyun nta-o nno terinyu silati. Tson-o hagun nunyu no magi lo hagun nyenyu no tego ti.

²⁵“Nle raka pe atemi thakendinyu ligü higü tepu lo, raka pe me tepuo a-kechwi lo kehünyu hontse kechwi hinya.

²⁶Hakhin zansü nle temi peha phi khilola yatselo, yhüko chekemvu ka khini pe tsüla mvuloshvu,

²⁷nyün lo nrün genyu a-kehen le tsü nti genyu. A-no nyu ben-o zhü tila? Ale me njün kehü genyu a-le aka keche hishü yatselo ale a-kehi keni shüti.

²⁸“Sunggigü zo nshvu nya, lo ntemi sharhinyu swetsü nya.

²⁹“N shye, n vain zu, lo oliv terzü a-gwenkho ka khipe arüshvulo. “N nyuri gü pe atsülo.

³⁰Nthu lo tanyü nyuri gü pe atsülo. Peche nche keri gü no jon tsenyü a-tsü zen bin lo-o jon tetsenyü pe arüshvulo.

³¹“Hagun le atemi, tsügenyu nyukhu lihi-e tehen thyü no tün kela thyü tyünya; tsonkethyü gü mvule khi pe tehi dan tsüla.