Read Southern Rengma Naga CHWEKETIN 26 Bible Online

CHWEKETIN 26 - Southern Rengma Naga bible

CHWEKETIN 26

¹“A kehü phika kenshün gü tsü linen nikegwa pe kedo kenzi, kemeren, lo thyühü kenhon pe kedo tseryü pe thyüti. Lo cherubim men zü kegwa thyüpe a-ge shüti.

²Kethon lo keda ketun küti, kethon le tsu nkio tetse lo keda le tsuzi.

³Pvün rikesü pe nme thyü lo kecha pvün rikesü pe nme thyü tse ti.

⁴Phi kenzi pe a-so kipon a-te ge ju kesülo kegwa thyü pe kerigü lo kenyhun gü ge-e shülo.

⁵Ju kesülo kegwa gü tsü henpvün thyüpe kerigü geshü lo tsü kendyü to henpvün thyü pe kecha gü ge ko shülo.

⁶Phi kenyhun tsü hükesü pe nme thyü nrün genyu nle suna pe hükesü henpvün thyülo.

⁷“Phika gü so hen nrün genyu tenyü hü pe kedo phi tseryü nme thyülo.

⁸Aphu thyüpe ketun külo, kethon tsu shenryü lo keda tsu zi.

⁹Pvün rikesü pe nme thyü lo kecha tsero rikesü pe nme thyülo. Tson-o tsero rikesü kethyü gü kese kenyhun thyüpe phika gü kamhun kipon a-soge shülo.

¹⁰Ju kesülo kegwa henpvün thyü pe nme gü a-tezin shü, lo ju kesülo kegwa henpvün thyü pe kecha gü ge shülo.

¹¹Lazo pe hükesü henpvün thyülo-o pe phi kenyhun ge ju kesü lo kegwa nyu shü lo njüo sükerhün pe nme thyülo.

¹²Kerche ponha tsü pe phika gü sizin hüsü shü.

¹³Lo lizin hizin kethon tsu nmeme rüche kebin tsü no phika gü te kepen hen lo.

¹⁴“Tegwen zin hen nrün genyu, tanyü gi rün nhon kela nme lo thyügikegwa kecha nme tse thyü sinlo.

¹⁵“Akakia sen pe phika gü genyu a-run kendun nme thyülo.

¹⁶A-run nmeme le kethon tsu tseryü lo keda tsu meo peha ti,

¹⁷a-run dan pe keren nme thyülo nrün genyu kendyüto kethyü a-to phahvu no binlo. A-run aphu ka a-pha hihontse kethyü no binti.

¹⁸Tesinzin genyu a-run nki thyülo

¹⁹lo rakagi pe a-pha ketun henzi thyülo-o ketun kenyhun pe a-run nme hensin shüo a-pha hvu no a-ge rhunti.

²⁰Phika gü tesozin genyu a-run nki thyülo

²¹lo a-run nme hensin ketun kenyhun no bin nrün genyu rakagi pe ketun henzi thyülo.

²²Phika gü sizin nkhün kipon a-run tsero,

²³lo a-qün hvu genyu a-run kenyhun thyü lo.

²⁴A-qün ka a-run hvu le a-phazin kehüsü lo senkesü kü gü a-ra titi.

²⁵Tson-o a-run tetse tsü nme hensin a-pha kenyhun lo rakagi pe kethyü ketun tseryüo tsero no bin ti.

²⁶“Akakia sen pe a-run pehazin genyu pvün pvün tseo phika gü kapha genyu tseryü pvün thyülo,

²⁷kechazin a-run dan genyu pvün, lo a-sikipon nkhünzin genyu pvün.

²⁸Alvu nyu kenpere gü no a-run neketunkü ka keshü gü tsü a-mün le phika gü nmezin gü kechazin titi.

²⁹Suna pe a-run dan jeh la, lo kenpere dan ka nna nrün genyu suna raho pe shü, kenpere suna pe jeh ti.

³⁰Ale kazüthun gü ge rhipe nhikeshü hontse phika gü thyülo.

³¹“Linen phi kegwa, kenzi, kemeren, lo kenhon no kedo pe kesunphi thyülo. Tsüge cherubim men zü pe shülo.

³²Tson-o pe akakia sen suna pe jeh la-o kehüsü pe shü la-o rakagi pe kethyü phaketun pezi ge dun kebin kachon ge sen shülo.

³³Kesunphi gü pe hükesü ge düsen la, tson-o tso ponhvu pe shü kenjü kejozenkelo khinpha gü pe kesunphi sizin shülo. Kesunphi gü le kenshün bin lo kenshün tsin bin hvu sathü kecha thyü lati.

³⁴Shwikenjün bin gü pe kejozenkelo khinpha so ge shülo.

³⁵Kenshüntsin Bin tegwenzin phika gü teso kipon miz gü pe shülo tesin kipon makenben bin pe shülo.

³⁶“Phika günyu keyü khünpfü genyu linen kegwa kenzi, kemeren, lo kenhon pe do-o a-ge a-jvüzü kethyü pe kesunphi thyüti.

³⁷Kesunphi higü genyu akakia sen pe kachon pvün thyüo suna pe jeh, lo suna pe kehüsü thyülo; kachon hidan genyu lazo pe ketun pvün thyülo.